Areka ea khutlisoa
1Areka ea Morena ea qeta likhoeli tse supileng e le naheng ea Bafilesita. 2Bafilesita ba bitsa baprista le linōhe, ba re: “Re etse'ng ka areka ee ea Morena? Re bolelleng hore na re e khutlisetse moo e tsoang teng ka mokhoa o joang?”
3Baprista ba re ho bona: “Haeba le khutlisa areka ena ea Molimo oa Baiseraele, le se ke la e khutlisa e se na letho, empa ruri eka khona le rōmele Molimo nyehelo e tlosang sebe. Ke hona le tla phekoleha, 'me le tsebe le lebaka leo ka lona a sa kang a khaotsa ho le otla.”
4Bafilesita ba boela ba botsa, ba re: “Nyehelo e tlosang sebe, eo re tla mo rōmela eona, e ka ba ea eng?”
Eaba ba re: “E be litšoantšo tse hlano tsa mathōpa a mokoteng, tse bōpiloeng ka khauta, le litoeba tse hlano tse bōpiloeng ka khauta, ho latela palo ea likhosi tsa Bafilesita, hobane lōna bohle, le likhosi tsa lōna, le ile la otloa ka seoa se tšoanang. 5Ka baka leo, le etse litšoantšo tsa mathōpa a lōna a mokoteng, le litšoantšo tsa litoeba tse le senyetsang naha. Le tla tlōtla Molimo oa Baiseraele, 'me mohlomong o tla tlosa kotlo ea hae holim'a lōna, le holim'a melimo ea lōna, le holim'a naha ea lōna. 6Ke hobane'ng ha le thatafatsa lipelo tsa lōna, joalokaha Baegepeta le Faro ba ne ba thatafatse lipelo tsa bona? Na hase 'nete hore e ne ere ha a se a bontšitse matla a hae har'a bona, ea e-ba hona ba lōkōllang Baiseraele, 'me ba itsamaela?
7“Ka baka leo he, etsang koloi e ncha, le nke le likhomo tse peli tsa litsoetse, tse e-s'ong ho ka li panoa, le li pane koloing, le khethele manamane a tsona, le a khutlisetse sakeng. 8Le nke areka ea Morena, le e bee holim'a koloi; lintho tse bōpiloeng ka khauta, tseo le li rōmelang Molimo e le nyehelo e tlosang sebe, le li kenye ka letlōleng, pel'a areka; ebe likhomo li hula koloi, li ikela le eona ho se motho. 9Joale le shebe! Haeba areka e nyolosa ka 'mila o eang Bete-Shemeshe, naheng ea habo eona, e tla ba ke Molimo he, ea re etselitseng koluoa ena e kholo, empa haeba ho se joalo, re tla tseba hore hase Molimo ea re bolaileng, ke ntho e re hlahetseng e ne e sa reroa.”
10Banna ba etsa joalo; ba tšoara likhomo tse peli tsa litsoetse, ba li pana koloing, 'me manamane a tsona ba a koalla ka sakeng. 11Ba bea areka ea Morena holim'a koloi, le letlōle le kentseng litoeba tse bōpiloeng ka khauta le litšoantšo tsa mathōpa a mokoteng. 12Likhomo tsa otloloha feela ka 'mila, e leng 'mila o eang Bete-Shemeshe. Tsa tsamaea ka 'mila o le mong feela, li ntse li tsamaea li lla; tsa se ke tsa khelohela ka ho le letona kapa ka ho le letšehali. Likhosi tsa Bafilesita tsa sala likhomo tseo morao, ho ea fihla moeling oa naha ea Bete-Shemeshe.
Areka e fihla Bete-Shemeshe
13Baahi ba Bete-Shemeshe ba ne ba hèla koro ka khohlong. Ha ba phahamisa mahlo ba bona areka, 'me ba nyakalla ho e bona. 14Koloi ea fihla tšimong ea Joshua oa Mobete-Shemeshe, ea emisa hona teng, pel'a lefika le leholo. Ba ratha lithupa tse entseng koloi, 'me ka likhomo tseo ba etsetsa Morena nyehelo ea secheso. 15Balevi ba theola areka ea Morena, le letlōle le pel'a eona, le neng le kentse lintho tse bōpiloeng ka khauta, 'me tsena ba li bea holim'a lefika le leholo leo. Ka lona letsatsi leo, banna ba Bete-Shemeshe ba etsetsa Morena linyehelo tsa secheso le mahlabelo. 16Ha likhosi tsa Bafilesita li bona tsena, tsa khutlela Ekerone ka lona letsatsi leo.
Linyehelo tsa khauta
17Ana ke mathōpa a mokoteng, a bōpiloeng ka khauta, ao Bafilesita ba ileng ba a rōmela ho Morena e le nyehelo e tlosang sebe: Le leng e ne e le la Ashedode, le leng e le la Gasa, le leng e le la Ashekelone, le leng e le la Gate, le leng e le la Ekerone. 18Palo ea litoeba tse bōpiloeng ka khauta e ne e lekana le palo ea metse eohle ea likhosi tse hlano tsa Bafilesita, e nang le liqhobosheane le e se nang liqhobosheane. Le kajeno-ea-bokajeno lefika le leholo, leo areka ea Morena e neng e beoe holim'a lona, le ntse le le teng tšimong eo ea Joshua oa Mobete-Shemeshe, e le bopaki ba se ileng sa etsahala.
Kotlo ea ho hlompholla
19Banna ba Jekonia ba se ke ba thaba 'moho le baahi ba bang ba Bete-Shemeshe, ha ba bona areka ea Morena, 'me Morena a bolaea ba mashome a supileng ba bona. Sechaba sa e-ba bofifing, hobane Morena o ne a bolaile batho ba bangata.
Areka e fihla Kiriate-Jearime
20Joale banna ba Bete-Shemeshe ba re: “Ke mang ea ka emang kapele ho Morena, Molimo eo ea halalelang? Areka ee re tla e isa ho mang, hore e tlohe pel'a rōna?”
21Ba rōmela maqosa ho baahi ba Kiriathe-Jearime, ba re: “Bafilesita ba khutlisitse areka ea Morena. Tloong, le tl'o e lata.”
