Mosebetsi oa Paulosi Thesalonika
1Bana beso, le tseba ka bolōna hore ketelo ea rōna ho lōna ha ea ka ea e-ba ea lefeela. 2Kamoo le tsebang kateng, ha re le motseng oa Filipi, re ne re sa tsoa hlōkōfatsoa, re etsoa hampe, empa ka thuso ea Molimo oa rōna re ile ra ba sebete ho le bolella molaetsa o molemo oa Molimo, har'a khanyetso e kholo. 3Khothatso ea rōna ha e etsoe ka phoso, kapa ka morero o litšila, kapa ka mano, 4empa re bua joalokaha Molimo a rata, eena ea re amohetseng, a re nea molaetsa o molemo. Ha re lakatse ho khahlisa batho, re lakatsa ho khahlisa Molimo ea hlahlobang lipelo tsa rōna. 5Kamoo le tsebang kateng, ha rea ka ra tla ho lōna ka maleme a monate, le ka meharo. Molimo ke paki. 6Ha re e-s'o batle thoriso ho batho, kapa ho lōna, leha e le ho mang kapa mang, 7le hoja re ka be re 'nile ra le khōka, kaha re le baapostola ba Kreste. Empa re ile ra ba bonolo ha re le har'a lōna, joalokaha mosali a baballa bana ba hae. 8Kamoo re le ratang kateng, ha rea ka ra ikemisetsa ho abelana le lōna molaetsa o molemo feela, empa re ile ra ikemisetsa le ho le tella le bona bophelo ba rōna, hobane re le rata haholo. 9Bana beso, le tla hopola kamoo re neng re sebetse ka thata kateng, ra fufuleloa! Ra na ra sebetsa motšeare le bosiu, hore ha re ntse re le bolella molaetsa o molemo oa Molimo, re se ke ra khōka mang kapa mang oa lōna.
10Lōna le lipaki, le Molimo ke paki ea kamoo lōna ba lumelang re ileng ra le tšoara kateng ka mokhoa o halalelang, o lokileng, o sa nyatseheng. 11Lea tseba hore re ile ra tšoara e mong le e mong oa lōna hantle, joalokaha ntata a tšoara bana ba hae. 12Ra le khothatsa, ra le tšelisa, ra ipiletsa ho lōna hore le phele ka mokhoa o tšoanelehang mahlong a Molimo, ea le bitsetsang 'musong oa hae le tlōtleng ea hae.
13Le ka lona lebaka lena hè, ha re phetse ho leboha Molimo, hobane ha re ne re le tlisetsa lentsoe la Molimo, ha lea ka la le amohela joaloka hoja ke la batho, empa le ile la le amohela e le lentsoe la sebele la Molimo, ea sebetsang ka ho lōna ba lumelang. 14Le lōna, bana beso, le ile la tšoana le likereke tsa Molimo tse Judea, tseo e leng tsa Kreste Jesu, hobane le lōna le hlōkōfalitsoe ke ba habo lōna, joalokaha le tsona li ile tsa hlōkōfatsoa ke Bajuda. 15Bajuda ke bona ba ileng ba bolaea Morena Jesu le baporofeta, 'me le rōna ba re hlorisitse haholo. Ha ba khahlise Molimo, 'me ba hanyetsana le batho bohle. 16Ba ntse ba re sitisa ho bua ho balichaba hore balichaba ba tle ba pholosoe. Sena ke sebe sa ho qetela sa tseo ba 'nileng ba li etsa, 'me joale khalefo ea Molimo e qeteletse e ba khaolelitse.
Paulosi o lakatsa ho etela kereke hape
17Ha e le rōna, bana beso, re ile ra arohana le lōna hakhutšoanyane, empa leha re sa bonane ka mahlo, re ntse re e-na le lōna ka lipelo, 'me ka chesehelo e kholo re lakatsa ho le bona. 18Ke ka lebaka leo re neng re rata ho le etela. Ka makhetlo, 'na Paulosi ka sebele, ke ile ka leka ho tla, empa Satane a re thibela. 19Ana ha re ema kapele ho Morena oa rōna Jesu, mohla a tlang, tšepo ea rōna, thabo ea rōna, moqhaka oo re leng motlōtlō ka oona, e tla ba ofe, haese lōna? 20Ruri ke lōna boithoriso ba rōna le thabo ea rōna.
