1Bana beso, ha e le linako le metsotso ha le hloke hore le ngolloe ka tsona. 2Le lōna le tseba hantle hore Letsatsi la Morena le tla tla joaloka lesholu le tlang bosiu. 3Mohla batho ba reng: “Ke khotso, ha ho kotsi,” ke mohla timelo e tla ba tsometsa joalokaha bohlōkō ba pelehi bo tsometsa moimana, 'me ba ke ke ba phonyoha.
4Empa lōna, bana beso, ha le lefifing, hoo Letsatsi leo le ka le tsometsang joaloka lesholu. 5Lōna bohle, le leng bana ba leseli, le rata motšeare. Ha re ba bosiu, ha re rate lefifi. 6Ha ho le joalo, re se ke ra robala joaloka ba bang bohle, re mpe re falimehe, 'me re be le boitšoaro. 7Ba robalang ba robala bosiu, ba tahoang ba tahoa bosiu. 8Ha e le rōna ba ratang motšeare, a re beng le boitšoaro, re apare tšireletso ea sefuba, e leng tumelo le lerato, re roale katiba ea tšepe ea pholoho. 9Molimo ha aa re bōpela ho re halefela, empa o re bōpetse ho rua pholoho ka Morena Jesu Kreste, 10ea re shoetseng, e le hore, leha re falimehile kapa re robetse, re tle re phele 'moho le eena. 11Ka baka leo, le ke le tšelisane, 'me le matlafatsane, joalokaha le fela le etsa.
Likhothatso le litumeliso tsa ho qetela
12Bana beso, rea le kōpa: Hlomphang ba sebetsang ka thata har'a lōna ho le lisa le ho le eletsa lebitsong la Morena. 13Ka baka la mosebetsi oa bona, le ba hlomphe haholo, le ba rate. Phelisanang ka khotso. 14Bana beso, rea le rapela hore le khalemele likhōba, le khothatse ba nyahameng lipelo, le thuse ba fokolang, le mamelle bohle. 15Hlokomelang hore ho se be ea busetsang bobe ka bobe, 'me kamehla le pheelle ho etsetsana tse molemo, le ho li etsetsa bohle.
16Thabang kamehla, 17se phetseng ho rapela, 18lebohang linthong tsohle, hobane tsena ke tsona tseo Molimo a ratang hore le li etse ka Kreste Jesu.
19Se sitiseng Moea o Halalelang, 20se nyeliseng lineo tsa boporofeta. 21Hlahlobang tsohle, le bōlōke tse ntle, 22'me le sesefe bobe ba mofuta ofe kapa ofe.
23Eka Molimo ea fanang ka khotso, eena ka sebele a ka le halaletsa ka ho tlala, e le hore ka mokhoa o phethehileng le bōlōkehe moeeng, pelong le 'meleng, le tle le se ke la nyatseha mohla Morena oa rōna Jesu Kreste a tlang. 24Ea le bitsang oa tšepahala, 'me hona o tla ho etsa.
25Bana beso, re rapelleng le rōna.
26Lumelisang bana babo rōna bohle ka kako e halalelang. 27Ka Morena, ke ipiletsa ho lōna, ke re: Lengolo lena le balloe bana babo rōna bohle.
28Mohau oa Morena oa rōna Jesu Kreste o ke o be le lōna.
