Baegepeta ba futuhela 'muso oa Juda
1Hoba 'muso oa Rehoboame o tsitse, 'me a imatlafatse, eena le sechaba sohle sa Iseraele ba furalla molao oa Morena. 2Ka selemo sa bohlano sa puso ea khosi Rehoboame, Shishake, khosi ea Egepeta, a futuhela Jerusalema, hobane Baiseraele ba ne ba sa ka ba tšepahala ho Morena. 3A futuha ka likariki tsa ntoa tse sekete le makholo a mabeli, le ka bahlabani ba palamang lipere ba likete tse mashome a tšeletseng. O ne a e-na le sechaba se neng se ke ke sa baloa ke bongata, se tlileng le eena ho tsoa Egepeta, e le Balebia, le Basuke, le Bakushe. 4A hapa metse ea Juda e hahelelitsoeng, 'me a ea Jerusalema.
5Eaba moporofeta Shemaea o fihla ho Rehoboame, le ho mahosana a Juda, a neng a khōbōkane Jerusalema ka baka la ho tšaba Shishake, 'me a re ho bona: “Morena o bua tjena: ‘Le mphuraletse, ka baka leo, le 'na ke tla neelana ka lōna matsohong a Shishake.’ ”
6Mahosana a Iseraele le khosi ba ikokobetsa, 'me ba re: “Morena o lokile!”
7Eitse ha Morena a bona hore ba ikokobelitse, lentsoe la Morena la fihla ho Shemaea, la re: “Erekaha ba ikokobelitse nke ke ka ba timetsa, ke tla ba namo-namolela, nke ke ka sebelisa Shishake ka ho hlatsetsa khalefo ea ka holim'a Jerusalema, ka neelana ka eona ho Shishake. 8Leha ho le joalo, e tla ba bahlanka ba Shishake, hore ba tle ba tsebe hore na ke sebeletsoa joang, le mebuso ea linaha tse ling e sebeletsoa joang.”
9Eaba Shishake, khosi ea Egepeta, o futuhela Jerusalema. A hapa matlotlo a Tempele ea Morena, le matlotlo a ntlo ea khosi. A hapa tsohle; a hapa le lithèbè tsa khauta tse neng li entsoe ke Solomone. 10Sebakeng sa tsona, khosi Rehoboame a etsa lithèbè tsa lethose, 'me a li bea taolong ea balaoli ba balebeli ba neng ba lebela monyako oa ntlo ea khosi. 11Kamehla, ha khosi e ne e kena ka Tempeleng ea Morena, balebeli ba ne ba ee ba nke lithèbè tseo, ba be ba li khutlisetse ka tlung ea balebeli.
12Kahobane khosi e ile ea ikokobetsa, Morena a khaotsa ho e halefela, a se ke a e timetsa ho hang, etsoe le naheng ea Juda ho ne ho sa na le lintho tse lokileng.
Kakaretso ea puso ea Rehoboame
13Khosi Rehoboame a imatlafatsa a le Jerusalema, 'me a 'na a busa. O ne a e-na le lilemo tse mashome a mane a motso o mong ha a qala ho busa. A busa ka lilemo tse leshome le metso e supileng, a le Jerusalema, e leng motse oo Morena a neng a ile a o khetha har'a merabe eohle ea Iseraele, hore a khumamelloe ho oona. Lebitso la 'm'ae e ne e le Naama oa Moamone. 14A etsa bobe, hobane o ne a sa ikemisetsa ho sebeletsa Morena.
15Liketso tsohle tsa Rehoboame, ho tloha qalong ho isa qetellong, le tsa tlhatlhamano ea lelapa la hae, li ngotsoe Bukeng ea Moporofeta Shemaea, le Bukeng ea Moporofeta Ido. Lintoa tsa 'na tsa e-ba teng pakeng tsa Rehoboame le Jeroboame. 16Rehoboame a shoa, 'me a epeloa le bo-ntat'ae, Motseng oa Davida. Abiea, mora oa hae, a mo hlahlama.
