Puso ea Akasiea, khosi ea Juda
1Baahi ba Jerusalema ba bea Akasiea, mora oa Jehorame oa lethōpō, hore e be khosi, a hlahlame ntat'ae. Lebōthoana le hlaselang, le neng le tlile le Maarabia, le ne le ile la bolaea bara bohle ba baholo ba Jehorame. Akasiea, mora oa Jehorame, khosi ea Juda, a busa.
2Akasiea o ne a e-na le lilemo tse mashome a mabeli a metso e 'meli, ha a qala ho busa, 'me a busa ka selemo se le seng feela, a le Jerusalema. Lebitso la 'm'ae e ne e le Ataleea, setlōhōlō sa Omeri.
3Le eena a tsamaea mehlaleng ea lelapa la Akabe, hobane 'm'ae o ne a mo khothaletsa ho etsa bokhopo. 4A etsa bobe mahlong a Morena, joalokaha ba lelapa la Akabe ba ne ba ile ba etsa, hobane kamora' lefu la ntat'ae, ba lelapa la Akabe ba ile ba mo khothaletsa ho etsa bobe bo ileng ba mo isa timelong.
5A latela likeletso tsa bona. Bo-khosi Akasiea, le khosi Jorame, mora oa Akabe, khosi ea Iseraele, ba ea loantša Hasaele, khosi ea Arame, a le Rama e Gileade, 'me Baarame ba ntša Jorame kotsi. 6Khosi Jorame a khutlela Jesereele, ho ea okoa maqéba ao a a ntšitsoeng ha a le Rama, ha a ne a loantša Hasaele, khosi ea Arame.
Joale Akasiea, mora oa Jehorame, khosi ea Juda, a theohela Jesereele ho ea hloela Jorame, mora oa Akabe, hobane o ne a kula.
7Ke ka thato ea Molimo hore leeto lena la Akasiea, la ho chakela Jorame, e be sesōsa sa ho oa ha Akasiea. Eare a sa le moo, ba tsamaea le Jorame ho ea bona Jehu, mora oa Nimeshi, eo Morena a neng a mo tlotselitse ho timetsa lelapa la Akabe. 8Ha Jehu a ntse a phethahatsa kahlōlo ho ba lelapa la Akabe, a fumana mahosana a sechaba sa Juda, le bara ba bana babo Akasiea, ba neng ba sebeletsa Akasiea, 'me a ba bolaea. 9Joale ba tsoma Akasiea ea neng a ipatile Samaria. Ba mo tšoara, ba mo isa ho Jehu. Hoba ba 'molaee, ba mo epela, hobane ba ne ba re: “Ke mora oa Jehoshafate ea neng a sebeletsa Morena ka pelo ea hae eohle.” Ka baka leo, ha se ke ha hlola ho e-ba le ea mong oa lelapa la Akasiea ea neng a ka busa.
Ataleea o bolaea ba lelapa la khosi ea Juda
10Ha Ataleea, 'm'a Akasiea, a bona hore mora oa hae o shoele, a tsamaea, a ea bolaea bana bohle ba lelapa la khosi ea sechaba sa Juda. 11Empa Jehosabada, morali oa khosi Jehorame, a nka Jōoashe, mora oa Akasiea, a mo ntša har'a bara ba khosi ba neng ba lokela ho bolaoa. A mo pata hammoho le mohōlisi oa hae kamoo ho bōlōkoang liphate kateng. Kahoo Jehosabada, morali oa khosi Jehorame, khaitseli ea Akasiea, mohats'a moprista Jehoeada, a mo patela Ataleea, 'me Ataleea a se ke a 'molaea. 12Ka lilemo tse tšeletseng, ha Ataleea a ntse a busa naha eo, Jehosabada a pata Jōoashe ka Tempeleng ea Molimo.
