1Joale Solomone a qala ho haha Tempele ea Morena, Jerusalema, thabeng ea Moria, seotlong sa Orenane oa Mojebuse, moo Morena a neng a iponahatse teng ho Davida, ntat'ae; e leng sebaka seo Davida a neng a se khethe. 2A qala ho e haha ka letsatsi la bobeli la khoeli ea bobeli, selemong sa bone sa puso ea hae.
3Litekanyo tsa Tempele ea Molimo, eo Solomone a ileng a e haha, ke tsena: Bolelele e ne e le limethara tse ka bang mashome a mabeli a metso e supileng, bophara e le limethara tse ka bang robong. 4Bolelele ba lethule le kapele ho Tempele e ne e ka ba limethara tse robong, bo lekana le bophara ba Tempele; bophahamo le bona e ka ba limethara tse robong. Bokahare ba lethule a bo maneha khauta e hloekisitsoeng.
5Mabota a Tempele a a maneha mapolanka a molutu, le 'ona a a koahela ka khauta e hloekisitsoeng. Holim'a 'ona a etsa litšoantšo tsa lifate tsa lipalema, le meqhaka e lōhiloeng joaloka ketane. 6A khabisa Tempele ka majoe a bohlokoa, le ka khauta e tsoang Parefaime. 7A maneha bokahare ba marulelo, le likosene tsa menyako, le mabota, le mamati a Tempele ka khauta, 'me a etsa litšoantšo tsa likerubime maboteng.
8A haha Sehalalelo se halalelang ka ho fetisisa. Bolelele ba sona bo ne bo lekana le bophara ba Tempele, e le limethara tse ka bang robong, le bophara ba sona e le limethara tse ka bang robong. A se maneha khauta e hloekisitsoeng, e etsang boima ba lithane tse ka bang mashome a mabeli a motso o mong. 9Boima ba lipekere tsa khauta e ne e ka ba likeramo tse makholo a tšeletseng. Le bokahare ba likamore tse kaholimo bo ne bo manehiloe khauta.
10Ka Sehalalelong se halalelang ka ho fetisisa a etsa likerubime tse peli, tse betliloeng, 'me a li maneha khauta. 11Bolelele ba mapheo a likerubime ha a thathaletse e ne e ka ba limethara tse robong. Bolelele ba lepheo le le leng la kerubime ea pele e ne e ka ba limethara tse peli le halofo. Le ne le thetsitse lebota la Tempele, ha lepheo le leng, le ntseng le lekana le lona, lona le ne le thetsane le lepheo la kerubime e 'ngoe. 12Ka mokhoa o tšoanang, lepheo le leng la kerubime ea bobeli le ne le etsa bolelele ba limethara tse ka bang peli le halofo, le thetsitse lebota le leng la Tempele, ha lepheo le leng, le bolelele bo lekanang le ba lepheo la pele, le ne le thetsitse lepheo la kerubime ea pele. 13Mapheo a likerubime tsena tse peli, ha a thathaletse, a ne a etsa bolelele ba limethara tse ka bang robong. Likerubime tsena li ne li eme ka maoto, li talimile sehalalelong.
14A etsa lesira ka masela a maputsoa, le a perese, le a mafubelu, le a lene, 'me a etsa litšoantšo tsa likerubime holim'a lona.
Litšiea tse peli tsa lethose
15Kapele ho Tempele a haha litšiea tse peli, tseo bolelele ba tsona e neng e ka ba limethara tse leshome le metso e tšeletseng. Tšiea e 'ngoe le e 'ngoe e ne e e-na le kōtōla eo bophahamo ba eona e neng e ka ba limethara tse peli le halofo. 16A etsa mekhabiso e joaloka liketane, a e bea kaholimo ho litšiea; a etsa le likharenate tse lekholo, 'me a li hokela mekhabisong eo. 17A hloma litšiea tseo kapele ho Tempele; e 'ngoe ea e-ba ka letsohong le letona, 'me a e bitsa Jakine, e 'ngoe ea e-ba ka ho le letšehali, 'me a e bitsa Boase.
