Mekhabiso ea Tempele
1Solomone a etsa aletare ea lethose. Bolelele ba eona e ne e le limethara tse ka bang robong, bophara ba eona le bona e ka ba limethara tse robong, bophahamo e ka ba limethara tse 'ne le halofo.
2A etsa le tanka e chitja ka tšepe e qhibilisitsoeng. Boahlamo ba molomo oa eona e ne e ka ba limethara tse 'ne le halofo, bophahamo e ka ba limethara tse tharo. Bolelele ba ho pota-pota boahlamo ba eona bo ne bo etsa limethara tse ka bang leshome le metso e meraro le halofo. 3Katlas'a molomo oa eona, ho o pota-pota, ho ne ho e-na le litšoantšo tsa lipohoana, 'me halofong e 'ngoe le e 'ngoe ea methara ho e-na le lipohoana tse leshome. Lipohoana li ne li entse mela e 'meli, li bōpeletsoe le tanka.
4Tanka e ne e lutse holim'a mekokotlo ea lipohoana tse leshome le metso e 'meli; tse tharo li talimile lebōea, tse tharo li talimile bophirimela, tse tharo li talimile boroa, tse tharo li talimile bochabela. Tanka e ne e beiloe holim'a mekokotlo ea tsona, li furallane. 5Morumo oa tanka e ne e le limilemethara tse ka bang mashome a supileng a metso e mehlano, molomo oa eona o ahlame joaloka molomo oa komiki, o e-na le lithunthung tsa khahla. E ne e tšèla lilethara tse ka bang likete tse mashome a tšeletseng.
6Joale Solomone a etsa likotlolo tse leshome tsa lethose, tsa ho hlatsoetsa. A bea tse hlano ka lehlakoreng le letona, tse hlano ka lehlakoreng le letšehali. Ka ho tsona ho ne ho hlatsoetsoa lintho tse sebelisoang ha ho etsoa nyehelo ea secheso. Tanka eona e ne e sebelisoa ke baprista ha ba itlhatsoa.
7A etsa liluloana tsa mabone, tsa khauta, tse leshome, ho ea kamoo li neng li tšoanetse ho ba kateng, a li bea ka Tempeleng, tse hlano ka letsohong le letona, tse hlano ka ho le letšahali.
8A etsa le litafole tse leshome, a li bea ka Tempeleng; tse hlano ka letsohong le letona, tse hlano ka ho le letšehali. A etsa le likotlolo tse lekholo tsa khauta.
9A etsa seotloana sa baprista, le seotloana se seng se seholo, le mamati a liotloana, 'me mamati ao a a maneha lethose. 10A bea tanka ka lehlakoreng le letona, qetheng e ka boroa bo ka bochabela.
11Hurame a bōpa lipitsa, a etsa le likharafu le likotlolo. Joale eaba Hurame a qetile mosebetsi oa Tempele ea Molimo, oo a neng a o etsetsa khosi Solomone. 12E ne e le lintho tsena: litšiea tse peli, le likōtōla tse peli tse neng li le holim'a litšiea, le meqhaka e 'meli e khabisitseng likōtōla tse peli tse holim'a litšiea, 13le likharenate tse makholo a mane tse khabisitseng matlōoa a mabeli. Letlōoa ka leng le ne le e-na le mela e 'meli ea likharenate tse khabisitseng likōtōla tse peli tse holima litšiea. 14A etsa liluloana le likotlolo tse beoang holim'a tsona, 15le tanka, le lipohoana tse leshome le metso e 'meli tse e jereng, 16le lipitsa, le likharafu, le lifereko, le lintho tsohle tsa tsona.
Lintho tsohle tseo Hurame a neng a li etselitse khosi Solomone, bakeng sa Tempele ea Morena, e ne e le tsa lethose le phatsimang. 17Khosi ea etsetsa lintho tsena phuleng ea Jorodane, sethulelong sa letsopa se pakeng tsa Sukote le Sereda. 18Solomone o ile a etsa lintho tsena li le ngata; le boima ba lethose leo li entsoeng ka lona bo ne bo ke ke ba lekanngoa.
19Solomone a etsa lintho tsohle tsa Tempele ea Morena, le aletare ea khauta, le litafole tse neng li bea bohobe bo halalelang. 20A etsa liluloana tsa mabone le mabone a tsona ka khauta e hloekisitsoeng, e le hore a tle a 'ne a tuke kapele ho Sehalalelo joalokaha ho ne ho laetsoe. 21Ka khauta e hloekisitsoeng a etsa lipalesa, le mabone, le matlao. 22A etsa le likere tse lokisang likhoele tsa mabone, le likotlolo, le likhaba, le lipitsana tsa mokubetso, ka khauta e hloekisitsoeng. Holim'a monyako oa Tempele, le holim'a mamati a Sehalalelo se halalelang ka ho fetisisa, le holim'a mamati a Tempele, a maneha khauta e hloekisitsoeng.
