2 JOHANNE 1

₁'Na, moholo oa Kereke, ke lumelisa mofumahali ea khethiloeng, le bana ba hae, bao ke ba ratang kannete. Ha ba ratoe ke 'na feela, empa ba ratoa le ke bohle ba tsebang 'nete. ₂Ke ba rata ka baka la 'nete e ka ho rōna, e tla 'ne e be ka ho rōna kamehla eohle.

₃Ke re: Mohau, le lereko, le khotso ea Molimo Ntate le ea Morena Jesu Kreste, Mora oa Ntate, li ke li be le lōna ka 'nete le ka lerato.

₄Ke ile ka itumela haholo, hobane ke fumane ba bang ba bana ba hao ba tsamaea 'neteng, joalokaha re laetsoe ke Ntate. ₅Joale kea u kōpa, mofumahali, ke re a re rataneng. Ka ho rialo ha ke u ngolle taelo e ncha, empa ke taelo eo re bileng le eona ho tloha tšimolohong. ₆Seo lerato le leng sona ke hore re tsamaee ka litaelo tsa hae. Taelo eo esaleng le e utloa ho tloha tšimolohong ke hore le phele ka lerato.

₇Hohle lefatšeng ho tletse bathetsi, ba sa pakeng hore Jesu o ile a tla e le motho. Ea buang joalo ke eena mothetsi le Sera sa Kreste. ₈Itlhokomeleng, esere la lahleheloa ke tseo le li sebelelitseng, le tle le mpe le amohele moputso o tletseng. ₉Mang le mang ea khelohang, ea sa khomareleng thutong ea Kreste, Molimo ha a eo ka ho eena, empa ea khomarelang thutong ea Kreste, ke eena eo Ntate le Mora ba leng ka ho eena. ₁₀Haeba e mong a ka tla ho lōna, feela a sa tlise thuto ena, le se ke la mo amohela malapeng a lōna, leha e le hona ho mo lumelisa. ₁₁Ea mo lumelisang o iketsa molekane oa hae mesebetsing ea hae e khopo.

₁₂Ke sa na le tse ngata, tseo nka le bolellang tsona, empa ha ke rate ho li ngola; feela ke tšepa hore ke tla le etela, ke tle ke bue le lōna re shebane, e le hore thabo ea rōna e tle e be e tletseng.

₁₃Bana ba ngoan'eno ea khethiloeng baa u lumelisa.