Elisha o thusa mohlolohali oa mofutsana
1Mosali e mong, eo monna oa hae e neng e le e mong oa sehlopha sa baporofeta, a fihla ho Elisha, a re: “Mohlanka oa hao, e leng monna oa ka, o shoele. Ua tseba hore mohlanka eo oa hao o ne a hlompha Morena. Joale motho eo monna oa ka a neng a nkile molato ho eena, o tlile ho tla nka bara ba ka ba babeli, ho ea ba etsa makhoba a hae.”
2Elisha a re ho eena: “Nka u thusa ka'ng? Ak'u mpolelle: U na le eng ka tlung ea hao?”
Mosali a re: “Lekhabunyane la hao ha le sa na letho ka tlung, haese pitsana ea ole feela.”
3Eaba Elisha o re: “Tsamaea, u e'o alima lipitsana tse sa tšelang letho, ho bohle bao u ahisaneng le bona. U hle u alime tse ngata. 4Ha u se u kene ka tlung ea hao, u ikoalle kateng le bara ba hao. Joale u tšèlè ole ka lipitsaneng tsohle, 'me pitsana e tlalang u e beelle kathōko.”
5Eaba mosali eo o tloha ho Elisha, o ikoalla ka tlung le bara ba hae, ba neng ba ntse ba mo tlisetsa lipitsana, 'me a tšèla ole ka ho tsona. 6Ha lipitsana tsena li se li tletse tsoete, a re ho mora oa hae: “Ntlisetse e 'ngoe hape.”
Mora oa hae a re ho eena: “Ha ho sa na e 'ngoe.” Eaba ole a khaotsa ho tsoa.
7Mosali eo a tla, a bolella moporofeta oa Molimo, 'me eena a re: “Tsamaea, u e'o rekisa ole ena, u lefe molato oa hao. Uena le bara ba hao le tla iphelisa ka e setseng.”
Elisha le mosali ea ruileng oa Shuneme
8Ka letsatsi le leng Elisha a ea Shuneme, moo ho neng ho phela mosali ea ruileng. Mosali eo o ne a ee a qophelle Elisha hore a ke a fumane lijo. Kamehla ha Elisha a feta moo, o ne a ee a fopohele, 'me mosali a mo phōmōsetse. 9Mosali eo a re ho monna oa hae: “Ke hlokomela hore monna enoa ea fapohelang mona ho rōna kamehla, ke monna ea halalelang oa Molimo. 10A re ke re hahe kamorenyana kaholim'a marulelo, re 'meele bethe, le tafole, le setulo, le lebone, e le hore kamehla ha a re fapohetse, a n'o phōmōla ka ho eona.”
11Ka letsatsi le leng Elisha a fihla moo, a kena ka kamoreng, a phōmōla kateng. 12Elisha a re ho Gehasi, mohlanka oa hae: “Ak'u mpitsetse mosali eo oa Moshuneme.” Ha a se a 'mitsitse, mosali eo a fihla a ema kapele ho Elisha. 13Elisha a re ho mohlanka oa hae: “E-re ho eena: ‘U ikhathalitse haholo ka ho re hlokomela; re ka u etsetsa eng? Na u na le seo re ka u buellang ka sona ho khosi, kapa ho molaoli oa mabōtho?’ ”
Mosali a araba, a re: “Ha ke tletlebisoe ke letho har'a sechaba sena sa heso.”
14Elisha a re: “Joale re ka mo etsetsa eng?”
Gehasi a re: “Ha a na ngoana, le monna oa hae o se a tsofetse.”
15Elisha a re: “'Mitse hape!” Ha a se a 'mitsitse, mosali eo a ema monyako. 16Elisha a re: “Isao, ka eona nako ena, u tla be u e-na le mora.”
Mosali a re: “Oee, mong'a ka, moporofeta oa Molimo, se ke ua thetsa lekhabunyane la hao.”
17Empa mosali eo a ithoala, 'me ka eona nako eo, ka selemo se hlahlamang, a beleha mora, joalokaha Elisha a ne a ile a 'molella.
18Ka letsatsi le leng, ha ngoana a se a hōlile, a tsamaea, a ea ho ntat'ae, ho bakotuli. 19A re ho ntat'ae: “Hlooho ea ka ea opa! Hlooho ea ka ea opa!”
Ntat'ae a re ho mohlankanyana e mong: “Mo ise ho 'm'ae!” 20Mohlankanyana eo a mo nka, a mo isa ho 'm'ae. 'M'ae a mo sika ho fihlela har'a mpa ea motšeare, 'me eaba oa shoa. 21Mosali enoa a mo isa kamoreng ea Elisha, a 'mea betheng ea moporofeta eo oa Molimo, a tsoa, a mo koalla ka tlung.
22A bitsa monna oa hae, a re: “Kea u kōpa: Ak'u nthòmelle e mong oa bahlankana, le e 'ngoe ea litonki, nke ke potlakele ho moporofeta oa Molimo, ke be ke khutle.”
23Monna oa hae a re: “Ke ka lebaka la'ng u eang ho eena kajeno? Khoeli ha ea thoasa, ebile hase Sabatha!”
Mosali a re: “Ho lōkile!”
24A qhaneheloa tonki, 'me a re ho mohlanka oa hae: “Khanna tonki. U hle u tsamaee, u se ke ua hata butle, haese haeba ke u bolella joalo.” 25Eaba oa tsamaea, 'me a fihla ho moporofeta oa Molimo, thabeng ea Karamele.
Moporofeta oa Molimo a 'mona a sa le hōle, 'me a re ho Gehasi, mohlanka oa hae: “Bona mosali oa Moshuneme ke eane! 26Kea u kōpa: Matha u mo khahlanyetse, 'me u re ho eena: ‘U phela joang? Monna oa hao eena o phela joang? Ngoana eena o phela joang?’ ”
Mosali a araba, a re: “Hantle!”
27Ha mosali a fihla thabeng, ho moporofeta oa Molimo, a mo tšoara maotong. Gehasi a re oa mo tlosa, empa moporofeta oa Molimo a re: “Mo tlohele; o tšoenyehile haholo. Morena o mpatetse taba ena, ha a ea mpolella eona.”
28Eaba mosali o re: “Na nkile ka kōpa ngoana ho mong'a ka? Na ha nka ka re: ‘U se ke ua nthetsa’?”
29Elisha a re ho Gehasi: “Itlame letheka, u nke molamu oa ka, u tsamaee. Ha u ka kopana le motho, u se ke ua mo lumelisa; haeba motho a ka u lumelisa, u se ke ua mo arabela. U fihle u bee molamu oa ka holim'a sefahleho sa ngoana.”
30Eaba 'm'a ngoana o re ho Elisha: “Ke hlapanya ka Morena ea phelang, le ka uena, hore nke ke ka khaohana le uena.” Elisha a ema, a latela mosali eo.
31Gehasi a ba etella pele, 'me ha a fihla a bea molamu holim'a sefahleho sa ngoana, empa ngoana a se ke a bua, kapa a hlasimoloha. Ka baka leo, Gehasi, a khutla ho ea khahlanyetsa Elisha, 'me a 'molella, a re: “Ngoana ha a ea tsoha.”
32Ha Elisha a kena ka tlung a fumana ngoana a le holim'a bethe ea hae, a shoele. 33Eaba oa kena, o ikoalla le ngoana, o rapela Morena. 34A hloella betheng, a paqama holim'a ngoana, a bea molomo oa hae molomong oa ngoana; mahlo a hae a e-ba holim'a mahlo a ngoana, le matsoho a hae a e-ba holim'a matsoho a ngoana. A paqama holim'a ngoana, 'me ngoana a qala ho futhumala. 35Elisha a ema, a 'na a tsamaea kahar'a ntlo. A boela a hloella betheng, a paqama holim'a ngoana, 'me ngoana a thimòla hasupa, eaba oa tutuboloha.
36Elisha a bitsa Gehasi, a re: “Bitsa mosali eane oa Moshuneme.” Gehasi a 'mitsa. Hoba mosali eo a kene kamoo Elisha a neng a le kateng, Elisha a re ho eena: “Nka mora oa hao.” 37Mosali a itihela maotong a Elisha, a obamela fatše, a nka mora oa hae, a tsoa.
Mehlolo e 'meli
38Elisha a boela a khutlela Gilegale, 'me a fumana naha e aparetsoe ke tlala. Ha sehlopha sa baporofeta se ntse se lutse kapele ho eena, Elisha a re ho mohlanka oa hae: “Tlhatleha pitsa e kholo, u phèhèlè sehlopha sena sa baporofeta lesheleshele.”
39E mong oa bona a ea naheng ho ea kha moroho. A fumana monyaku, a kha litholoana tsa 'ona, tsa tlala seaparo sa hae, a fihla a o khabella ka pitseng ea lesheleshele, hobane ba ne ba sa o tsebe. 40Ba qhatsetsa banna bao hore ba ke ba habōle. Ha ba qala ba habōla lesheleshele leo, ba hōoa, ba re: “Oho, moporofeta oa Molimo, ba re tšeletse!” Eaba ha ba sa le habōla.
41Moporofeta a re: “Tlisang phofo!” A faha pitsa ka phofo eo, 'me a re: “Qhatsetsa batho bana, ba habōle!” Lesheleshele le ne le se le se na kotsi.
42Monna e mong a fihla, a e-tsoa Baale-Shalesha, a tliselitse moporofeta oa Molimo bohobe ba lilopotsiea, e le linkhoa tsa harese tse mashome a mabeli, le liako tsa koro, a li kentse kahar'a serōtō sa hae. Elisha a re: “Li fe batho bana, ba je.”
43Empa mohlanka oa hae a re: “Lijo tse kaalenyana tsee, ke tla li abela banna ba lekholo joang?”
Elisha a pheta, a re: “Li fe batho bana, ba je, hobane Morena o bua tjena: ‘Ba tla ja, ba be ba li siee.’ ” 44Eaba o ba abela tsona. Ba e-ja, ba ba ba li siea, ho ea kamoo Morena a ileng a bua kateng.
