Abosalome o rera ho fetohela khosi
1Kamora' mona, Abosalome a iketsetsa kariki ea ntoa, a batla le lipere, le banna ba mashome a mahlano ba tla mo etella pele. 2Abosalome o ne a ee a tsohe e sa le hoseng, a e'o ema tseleng e eang khorong ea motse. E ne e ee ere ha motho ea nang le nyeoe a e-ea ho khosi hore a e'o ahlōleloa, ebe Abosalome oa 'mitsa, o re ho eena: “U tsoa motseng ofe?”
Eo a re: “Mohlanka oa hao o tsoa ho o mong oa merabe ea Iseraele.”
3Abosalome a re ho eena: “Nyeoe ena ea hao e ntle haholo, e bile e nepahetse, empa ha ho le ea mong oa banna ba khosi ea tla u mamela.” 4Abosalome a tsoele pele, a re: “Hoja ke ne ke le moahlōli naheng ena, 'me bohle ba nang le linyeoe kapa litaba ba e-tla ho 'na, ke ne ke tla ba ahlōlela ka toka.”
5Ha motho a itihela fatše kapele ho eena, ho isa hlompho, o ne a ee a mo tšoare ka letsoho, a mo emise, 'me a mo ake. 6Abosalome a etsa tjena ho Baiseraele bohle ba neng ba ee ba tle ho khosi, hore ba ahlōleloe. Ka mokhoa ona Abosalome a hapa lipelo tsa bana ba Iseraele.
7Qetellong ea lilemo tse 'ne, Abosalome a re ho khosi: “Ke u kōpa hore nke ke ee Heborone, ke e'o phetha kano, eo ke ileng ka e etsetsa Morena. 8Ha mohlanka oa hao a sa le Geshure e Arame, o ile a etsa kano, a re: ‘Haeba ruri Morena a ka nkhutlisetsa Jerusalema, ke tla mo nyehella ke le Heborone.’ ”
9Khosi ea re ho eena: “Itsamaele ka khotso.”
Abosalome a tsamaea, a ea Heborone. 10Empa Abosalome a rōmela bahlohleletsi merabeng eohle ea Iseraele, a re: “Hang-hang ha le utloa molumo oa lenaka, le tle le re: ‘Abosalome o etsoa khosi koana Heborone!’ ” 11Banna ba makholo a mabeli ba tsoang Jerusalema, ba neng ba memiloe, ba ikela tjee ba sa tsebe letho, ba tsamaea le Abosalome. 12Ha Abosalome a ntse a nyehela ka mahlabelo, a bitsa Ahitofele oa Mogilo, moeletsi oa Davida, a le motseng oa habo oa Gilo. Morero ona oa bohlabaphieo o ne o le matla, le batho ba tšehetsang Abosalome ba 'na ba eketseha.
Davida o baleha Jerusalema
13Leqōsa la fihla ho Davida, la re: “Abosalome o hapile banna ba Iseraele.”
14Davida a re ho bahlanka ba hae bohle ba neng ba e-na le eena Jerusalema: “Emang, re baleheng, hobane re ke ke ra phonyoha ho Abosalome. Potlakang, re tsamaeeng, esere a re fumana re sa le mona, a re etsa hampe, 'me a bolaea baahi ba motse ona ka sabole.”
15Bahlanka ba khosi ba re ho khosi: “Bahlanka ba hao ba itokiselitse ho phetha tsohle tseo khosi e tla ba laela tsona.”
16Khosi ea tsoa motseng le bohle ba lelapa la eona, ea siea basali ba leshome, bao e neng e le basali ba mafielo ba eona, hore ba hlokomele lelapa.
17Khosi ea fela ea tsoa le sechaba sohle sa eona, ea fihla ea emisa tlung ea ho qetela. 18Bahlanka bohle ba khosi ba 'na ba feta kathōko ho eona: E le Bakerete bohle, le Bapelete bohle, le banna ba makholo a tšeletseng ba Bagate, ba neng ba sale khosi morao ha e tloha Gate. Batho bana ba fetela kapele ho khosi.
Davida le Itai
19Eaba khosi e re ho Itai oa Mogate: “U tsamaela'ng le rōna? Khutla, u e'o lula le khosi, hobane u molichaba, u bile u balehile naheng ea heno. 20U tsoa fihla maobanyana mona; joale ebe nka re u 'ne u lelere le rōna hohle moo re eang teng, empa ke sa tsebe le hore na ke ea kae? Khutla, u tsamaee le bana beno, 'me Morena a ke a u hauhele, a u etsetse tse molemo.”
21Itai a araba khosi, a re: “Ke hlapanya ka Morena ea phelang, le ka mong'a ka, khosi ea ka e phelang, moo mong'a ka, khosi ea ka, a tla ba teng, ebang o tla shoa kapa a phele, le hona moo mohlanka oa hao o tla ba hona teng.”
22Davida a re ho Itai: “Tsamaea, u fetele pele.” Itai oa Mogate a fetela pele le banna bohle ba hae, le bana bohle bao a neng a e-na le bona.
23Baahi bohle ba naha ba bokolla haholo, ha sechaba sohle se fetela pele. Ha khosi e tšela molatsoana oa Kiderone, sechaba sohle sa fetela pele, ka tsela e eang lehoatateng.
Davida le Balevi
24Sadoke le eena a tla, le Balevi bohle ba neng ba e-na le eena, ba nkile areka ea selekane sa Molimo. Ba fihla ba bea areka ea Molimo fatše, pel'a Abiatare, ho fihlela ha sechaba sohle se felella ho tsoa motseng.
25Khosi ea re ho Sadoke: “Khutlisetsa areka ea Molimo motseng; haeba Morena a ka nkhauhela, o tla nkhutlisa, 'me a mpontše eona le leaho la hae. 26Empa haeba Morena a ka re: ‘Ha u nkhahle,’ bona, ke 'na enoa, a nketse seo a bonang se lokile.”
27Khosi ea boela ea re ho moprista Sadoke: “Na u re u senohe? Ke re u khutlele motseng ka khotso, uena le Ahimase, mora oa hao, le Jonathane, mora oa Abiatare; ke ho re lōna le bara ba lōna ba babeli. 28Bona, ke tla emisa liphuleng tse lehoatateng, ho fihlela ke fumana molaetsa o tsoang ho lōna.” 29Bo-Sadoke le Abiatare ba khutlisetsa areka ea Molimo Jerusalema, 'me ba hlola hona teng.
30Davida a nyolosa moepa oa Thaba ea Mehloaare, a ntse a lla. O ne a ikhurumelitse hlooho, a tsamaea a sa roala letho maotong. Batho bohle ba neng ba e-na le eena le bona ba ne ba ikhurumelitse lihlooho, 'me ba nyoloha ba ntse ba lla. 31E mong a bolella Davida, a re: “Ahitofele o teng kahar'a mahlabaphieo a Abosalome.”
Davida a re: “Oho, Morena, kea u rapela: Ak'u nyōpise likeletso tsa Ahitofele.”
32Ha Davida a se a fihlile kaholim'a tlhōrō ea thaba, moo a neng a tloaetse ho khumamella Molimo teng, a bona ho fihla Hushai oa Moareke, seaparo sa hae se hahōhile, a itšetse ka lerōle hloohong. 33Davida a re ho eena: “Ha u ka fetela pele le 'na, u tla nkhōka. 34Ha u ka khutlela motseng, ua re ho Abosalome: ‘Oho, khosi, ke tla ba mohlanka oa hao; joalokaha ke 'nile ka ba mohlanka oa ntat'ao, ka mokhoa o joalo ke tla ba mohlanka oa hao,’ 'me ka ho etsa joalo u tla tseba ho 'nyōpisetsa likeletso tsa Ahitofele. 35Ha ke re hona moo le na le bo-Sadoke le Abiatare? Ka baka leo, ntho efe kapa efe eo u utloang e buuoa lapeng la khosi, u e sebele baprista, bo-Sadoke le Abiatare. 36Ba na le bara ba bona ba babeli hona moo, e leng Ahimase, mora oa Sadoke, le Jonathane, mora oa Abiatare, 'me ntho efe kapa efe eo le e utloang le tla ntsebisa eona ka bona.”
37Eaba Hushai, motsoalle oa Davida, o fihlellana le Abosalome motseng oa Jerusalema.
