Areka ea selekane e tlisoa Jerusalema
1Davida a boela a khōbōkanya mokhetho oohle oa banna ba Iseraele, ba likete tse mashome a mararo; 2a ema, a tsamaea le sechaba sohle se neng se e-na le eena. O ne a e-ea Baala e Juda, ho ea lata areka ea Molimo hona teng, e nang le lebitso, e leng lebitso la Morena oa mabōtho, ea lutseng holim'a likerubime. 3Ba bea areka ea Molimo holim'a kariki e ncha, ba e ntša ka tlung ea Abinadabe e neng e le leralleng. Bo-Usa le Ako, bara ba Abinadabe, ba qhōba kariki eo e ncha. 4Ba ntša areka ka tlung ea Abinadabe, e neng e le leralleng, 'me Ako a etella areka eo ea Molimo pele. 5Davida le bohle ba ntlo ea Iseraele ba etsa motjeko kapele ho Morena, ba letsa liletsa tsa mefuta-futa tse entsoeng ka sefate sa molutu; ba letsa le liharepa, le likatara, le merōpa, le merutlhoana, le matlheretlhere.
6Ha ba fihla seotlong sa Nakone, Usa a otlollela letsoho la hae arekeng ea Molimo, a e tšoara, hobane lipholo li ne li khōthōmetseha. 7Bohale ba Morena ba tlōkōmela Usa, 'me Molimo a 'molaea ka baka la ho ama areka. A shoela hona moo pel'a areka ea Molimo.
8Davida a tšoenyeha haholo, hobane Morena o ne a bolaile Usa; eaba sebaka seo o se rea lebitso la Kotlo ea Usa, 'me le kajeno-ea-bokajeno se ntse se bitsoa joalo.
9Ka lona letsatsi leo Davida a tšaba Morena, 'me a re: “Ekaba areka ea Morena e tla ea joang ha ka?” 10Eaba Davida o se a tšaba ha areka ea Morena e isoa Motseng oa Davida, 'me a e isa tlung ea Obede-Edomo oa Mogate. 11Areka eo ea Morena ea qeta khoeli tse tharo e le ha Obede-Edomo oa Mogate. Morena a hlohonolofatsa Obede-Edomo oa Mogate. Morena a hlohonolofatsa Obede-Edomo le bohle ba ntlo ea hae.
12Joale khosi Davida a tsebisoa, ha thoe: “Morena o hlohonolofalitse lelapa la Obede-Edomo, le tsohle tseo e leng tsa hae, ka baka la areka ea Molimo.” Davida a tsamaea, a ea lata areka ea Molimo tlung ea Obede-Edomo, a e isa Motseng oa Davida ka thabo. 13Eare ha ba jereng areka ea Morena ba tsamaile mehato e tšeletseng feela, Davida a nyehella Morena ka sehlabelo sa pholo le namane e nontšitsoeng. 14Davida a apara setipe se entsoeng ka lesela la lene, a hōbela ka matla a hae kaofela, a isa hlompho ho Morena. 15Eaba Davida le bohle ba ntlo ea Iseraele, ba nyolla areka ea Morena ka mehoo le ka ho letsa lenaka.
16Ha areka ea Morena e kena Motseng oa Davida, Mikale, morali oa Saule, a sheba ka fesetere, 'me a bona khosi Davida a ntse a tlala, a etsa menyakoe kapele ho Morena; a mo nyelisa ka pelong ea hae.
17Ba tlisa areka ea Morena, ba e bea litulong tsa eona, bohareng ba tente eo Davida a neng a e hlometse eona. Davida a etsetsa Morena linyehelo tsa secheso, le linyehelo tsa teboho. 18Hoba Davida a qete ho etsa linyehelo tsa secheso, le linyehelo tsa teboho, eaba o hlohonolofatsa sechaba ka lebitso la Morena oa mabōtho. 19Joale a abela e mong le e mong oa sechaba sohle, le letšoele lohle la Baiseraele, banna le basali, leqebekoane la bohobe, le leqa la nama e besitsoeng, le leqebekoane la mangangajane a morara. Eaba sechaba sohle sea qhalana, e mong le e mong o ea ha hae.
20Ha Davida a khutlela lapeng ho ea hlohonolofatsa lelapa la hae, Mikale, morali oa Saule, a tsoa ho khahlanyetsa Davida, 'me a re: “Kajeno khosi ea Iseraele ea tla ea itlhompha bo! E ile ea ipeketla kapele ho makhabunyane a bahlanka ba eona, joaloka e mong oa bafo ha a ipeketla a se na lihlong!”
21Eaba Davida o re ho Mikale: “Ke ne ke hōbella Morena ea nkhethileng ho ena le ntat'ao le ba ntlo ea hae eohle, hore ke be khosi ea sechaba sa Morena sa Baiseraele; ke ka baka leo ke neng ke hōbela kapele ho Morena. 22Ke hona ke sa tla itlontlolla le ho feta mona, ke be ke bone hore ke itheoletse fatše, empa makhabunyane ao, ao u buang ka 'ona, 'ona a tla ntlhompha.”
23Mikale, morali oa Saule, ha a ka a ba le ngoana ho fihlela a e-shoa.
