2 BATHESALONIKA 2

₁Ha e le tabeng ea ho tla ha Morena oa rōna Jesu Kreste, le ea ho ba 'moho le eena, rea le kōpa, bana beso: ₂Le se phakise ho ferekana maikutlo kapa ho tšosoa ke boporofeta, kapa lipolelo, kapa lengolo leo ho ka thoeng le tsoa ho rōna, le reng Letsatsi la ho tla ha Morena le fihlile. ₃Ho se be ea le thetsang ka tsela efe kapa efe. Pele ho Letsatsi leo ho tla ba le bokoenehi, 'me ho senoloe Ea Khopo, ea tlamehileng ho timela. ₄Eena o tla loantša, a iphahamisetse tsohle tse bitsoang Molimo, tse khumameloang ke batho, hoo eena a tlang ho itulela ka Tempeleng ea Molimo, a iketse Molimo.

₅Na le sa hopola hore tseo tsohle ke ile ka le bolella tsona ke sa na le lōna? ₆Joale le tseba se thibetseng hore a senolehe nako ea hae e e-s'o fihle. ₇Bokhopo bo se bo ntse bo sebetsa ka sephiri; se setseng feela ke hore ea mo thibetseng a tlosoe tseleng, ₈hore Ea Khopo a tle a senolehe. Joale Morena Jesu o tla mo felisa ka ho mo bulula ka molomo feela, 'me a mo timetse ka khanya eo a tla tla ka eona. ₉Ea Khopo o tla tla ka mesebetsi ea Satane, 'me o tla etsa liketso tse matla, le mehlolo le limakatso tse thetsang. ₁₀O tla sebelisa mefuta eohle ea lithetso tsa bokhopo ho ba eang timelong, kahobane ha baa ka ba lumela ho rata 'nete e neng e tla ba pholosa. ₁₁Ka baka leo, Molimo o tla ba rōmela moea oa bokhelohi, ba tle ba kholoe leshano, ₁₂e le hore bohle ba sa kang ba lumela 'nete, ba mpa ba khahloa ke bokhopo, ba tle ba ahlōloe.

₁₃Ha e le rōna, re tšoanetse ho leboha Molimo kamehla ka baka la lōna, bana babo rōna ba ratoang ke Morena. Molimo o le khethile le le ba pele ba tla pholosoa ka matla a Moea o le halaletsang, le ka tumelo ea lōna 'neteng. ₁₄Molimo o le bitselitse hona ka molaetsa oa rōna o molemo, hore le tle le fumane tlōtla ea Morena oa rōna Jesu Kreste. ₁₅Kahoo, bana beso, emang le tiile, le khomarele meetlo eo re le rutileng eona ka molomo kapa ka lengolo.

₁₆Morena oa rōna Jesu Kreste ka sebele, le Molimo Ntat'a rōna ea re ratileng, eo mohaung oa hae a re fileng tšeliso e sa feleng le tšepo e tiileng, ₁₇a ke a tšelise lipelo tsa lōna, 'me a le matlafatse linthong tsohle tse lokileng tseo le ka li etsang kapa la li bolela.