2 TIMOTHEA 1

₁'Na Paulosi, moapostola oa Kreste Jesu ka thato ea Molimo, ho ea ka tšepiso ea bophelo bo ho Kreste Jesu, ₂ke lumelisa Timothea ngoan'aka ea ratehang, ke re: Mohau, lereko le khotso ea Molimo Ntate le ea Kreste Jesu, Morena oa rōna, li ke li be le uena.

₃Ke leboha Molimo, eo ke mo sebeletsang ka letsoalo le khutsitseng joaloka bo-ntat'a rōna moholo. Kamehla, bosiu le motšeare, ha ke phetse ho u hopola lithapelong tsa ka. ₄Ke hopola meokho ea hao, 'me ke hlolohetsoe ho u bona, e le hore ke tle ke be le thabo e khaphatsehang. ₅Ha ke lebale tumelo ea hao e se nang boikaketsi, e leng tumelo eo nkhono'ao Loise le 'm'ao Eunike ba neng ba e-na le eona, 'me ke kholisehile hore le uena u na le eona. ₆Ka hona ke u hopotsa hore u tsosolose nèo ea Molimo, eo u e amohetseng ka hore ke u bee matsoho. ₇Molimo ha aa ka a re nea moea oa bokoala, empa o re neile moea oa matla, oa lerato le oa boitšoaro.

₈Ka hona se be lihlong ho paka Morena oa rōna, kapa 'na ke leng motšoaruoa ka baka la hae. Empa u mamelle le 'na mahlōkō a bakoang ke molaetsa o molemo, ka matla a Molimo, ₉ea re pholositseng, 'me ea re bitselitseng hore re halalele, e seng ka baka la mesebetsi ea rōna, empa e le ka baka la morero oa hae le mohau oa hae. O re file mohau ona ka Kreste Jesu, mehla e e-s'o be teng. ₁₀Empa kajeno re o senoletsoe ka ho iponahatsa ha Mopholosi oa rōna, Kreste Jesu, ea felisitseng matla a lefu, a senola bophelo le ho se shoe ka molaetsa o molemo. ₁₁Molimo o nkhethetse ho ba sebōhōli, le moapostola, le moruti oa molaetsa o molemo oo. ₁₂Ke ka lebaka lena ke utloang bohlōkō bona, empa ha ke lihlong. Ke tseba eo ke mo tšepileng, 'me ke kholisehile hore o na le matla a ho bōlōka se beiloeng paballong ea ka, ho fihlela Letsatsi lela le fihla.

₁₃Tiisetsa thutong ea 'nete eo u e utloileng ho 'na, e le mohlala oo u tšoanetseng ho o latela tumelong le leratong leo re nang le lona ka Kreste Jesu. ₁₄Bōlōka tse molemo tse beiloeng paballong ea hao ke Moea o Halalelang, o phelang ka ho rōna.

₁₅Ua tseba hore bohle naheng ea Asia, esita le Fugelose le Heremogenese, ba ile ba nkoenehela. ₁₆Morena a ke a sitse ba lelapa la Onesiforose ka mohau oa hae, hobane ka makhetlo o ile a nkhatholla, 'me ha aa ka a hlajoa ke lihlong ka baka la ho ba litlamong ha ka. ₁₇Empa hang hoba a fihle Roma, a mpatla ka mafōlōfōlō ho fihlela a mphumana. ₁₈Morena a ke a mo fumantše lereko ho Morena mohl'a Letsatsi lela. U tseba ho feta bohle kamoo a nthusitseng kateng ka tse ngata ha ke ne ke le Efese.