Paulosi motseng oa Korinthe
1Kamora' tsena, Paulosi a tloha Athene, a ea Korinthe. 2Teng a fumana Mojuda e mong ea bitsoang Akulase, ea tsoaletsoeng Ponto, ea neng a sa tsoa fihla, a e-tsoa Italia le mosali oa hae Prisilla, hobane Tlelaudiose o ne a laetse hore Bajuda bohle ba tlohe Roma. Paulosi a ea ho bona, 3'me kaha e ne e le batho ba mosebetsi o le mong, a hlola le bona, 'me ba sebetsa 'moho. Mosebetsi oa bona e ne e le oa ho etsa litente. 4A buisana le batho ka tlung ea thapelo ka Sabatha se seng le se seng, a leka ho kholisa Bajuda le Bagerike.
5Eare ha Silase le Timothea ba fihla ba e-tsoa Masedonia, Paulosi a hapeha ke lentsoe la Molimo ka ho tlala, a paka ho Bajuda hore Jesu ke Mesia. 6Empa eare ha ba mo hanyetsa, ba mo nyefola, a hlōhlōra liaparo tsa hae, a re ho bona: “Mali a lōna a be holim'a lihlooho tsa lōna; 'na ha ke na molato. Ho tloha joale ke tla ea ho balichaba.”
7Eaba o tloha teng, o ea ha motho ea bitsoang Tite Jusetose, ea hlomphang Molimo, eo ntlo ea hae e neng e bapile le ntlo ea thapelo. 8Joale Kerisepose, mookameli oa ntlo ea thapelo, a lumela ho Morena, eena le lelapa la hae lohle. Le ba bangata ba Bakorinthe ha ba utloa, ba lumela, 'me ba kolobetsoa.
9Joale Morena a bua le Paulosi ka pono, bosiu, a re: “U se ke ua tšaba, empa u 'ne u bue, u se ke ua khutsa. 10Ke na le uena, 'me ha ho ea tla u loantša, le ho u etsa hampe, hobane ke na le batho ba bangata motseng ona.” 11A lula moo selemo le khoeli tse tšeletseng a nts'a ruta lentsoe la Molimo har'a bona.
12Ha Galeo e le 'musisi oa Akaea, Bajuda ba tsohela Paulosi matla ka maikutlo a le mang, 'me ba mo isa khotla, 13ba re: “Monna enoa o khothaletsa batho hore ba hlomphe Molimo ka mokhoa o hananang le Molao.”
14Eare ha Paulosi a re o tla bua, Galeo a re ho Bajuda: “Bajuda ting, haeba ho ne ho hlile ho e-na le molato o itseng kapa bolotsana bo bobe, ho ka be ho lokela hore ke le mamelle, 15empa haeba ke khang ea mantsoe, ea mabitso le ea Molao oa lōna, le ka bona e le lōna; ha nka ke ka ba moahlōli oa tsena.” 16Eaba o ba leleka khotla. 17Joale bohle ba tšoara Sosethenese, mookameli oa ntlo ea thapelo, ba mo teteka kapel'a lekhotla, empa Galeo a se ke a tsotella letho la litaba tsena.
Paulosi o khutlela Antiokia
18Paulosi ha a se a hlotse Korinthe matsatsi a mangata, a lumelisa balumeli, a kena ka sekepeng ho tšelela Siria, a e-na le Prisilla le Akulase. Ha a le Kenkeria a ikuta lekorana, hobane o ne a entse kano. 19Joale ba theohela Efese, moo a ileng a ba siea teng. Empa eena a kena ka tlung ea thapelo, 'me a buisana le Bajuda. 20Bona ba mo kōpa hore a hlole nako e teletsana, empa a se ke a lumela, 21a mpa a ba lumelisa, a re: “Ke tla boela ho lōna ha Molimo a rata.” A tloha Efese ka sekepe. 22Ha a fihla Sesaria, a nyolohela Jerusalema ho ea lumelisa kereke, a nt'o theohela Antiokia.
23Hoba a hlole teng nako e itseng a tloha, a tsamaea hohle naheng ea Galatia le Firigia ka ho latelana, a ntse a matlafatsa barutuoa bohle.
Apolosi o ruta batho ba Efese
24Moo Efese ha fihla Mojuda e mong ea bitsoang Apolosi, ea tsoaletsoeng Alekesanderia, e le monna oa kheleke, ea neng a hlalefetse Mangolo ka ho tlala. 25O ne a rutiloe Tsela ea Morena. A bua ka ho cheseha moeeng, a ruta litaba tse amanang le Jesu ka hloko, le hoja a ne a tseba kolobetso ea Johanne feela. 26A qala ho bua ka sebete ka tlung ea thapelo, 'me ha Prisilla le Akulase ba mo utloile ba mo isa ha bona, ba mo hlalosetsa Tsela ea Molimo ka hloko e fetang.
27Eare ha a rera ho ea Akaea, balumeli ba mo khothaletsa, 'me ba ngolla barutuoa hore ba mo amohele. Ha a se a fihlile, a ba le thuso e kholo ho bao e bileng balumeli ka mohau oa Molimo, 28hobane o ne a hlōla Bajuda pontšeng, ka matla a maholo, a supa ka Mangolo hore Jesu ke Mesia.
