LIKETSO 20

₁Ha moferefere o khaolitse, Paulosi a bitsa barutuoa, a ba khothatsa, a ba lumelisa, eaba o ea Masedonia. ₂Eare ha a fetile libakeng tseo, 'me a khothalitse batho ba teng ka puo e telele, a ea Gerike. ₃A hlola teng likhoeli tse tharo. Ha a se a tla tšelela Siria ka sekepe, Bajuda ba mo lalla, 'me a rera ho khutla ka la Masedonia. ₄A felehetsoa ke Sopaterose, mora oa Purose oa Berea, Arisetarekose le Sekundose ba Thesalonika, Gaiose oa Derebe, le Timothea, Tikikose le Terofimose ba Asia. ₅Ba re etella pele, ba ea re emela Terōoase. ₆Hoba ho fete matsatsi a mokete oa bohobe bo sa lomosoang, ra kena ka sekepeng, ra tloha Filipi, 'me kamora' matsatsi a mahlano ra fihla ho bona, Terōoase; teng ra hlola matsatsi a supileng.

₇Eare ka tsatsi le qalang beke, ha re phuthehile ho ngoatha bohobe, Paulosi a buisana le ba phuthehileng. Kaha a ne a ikemiselitse ho tloha ka le hlahlamang, a bua ho fihlela e e-ba seroko. ₈Ho ne ho e-na le mabone a mangata ka kamoreng e kaholimo, moo re neng re phuthehetse teng. ₉Eaba mohlankana e mong ea bitsoang Eutukose, ea neng a lutse fesetereng, o ea le sephume sa boroko ha Paulosi a ntse a buisana le bona nako e telele. A hlōloa ke boroko, a oela fatše a le mokatong oa boraro oa ntlo e kaholimo, 'me a nkoa a se a shoele. ₁₀Paulosi a theoha, a itihela holim'a hae, a mo hlasinya, a re: “Le se ke la tšoha, hobane o ntse a phela.” ₁₁A nyolohela kaholimo hape, 'me a ngoatha bohobe, a ja, a 'na a bua halelele ho fihlela bo e-sa, a nt'o itsamaela. ₁₂Ba tlisa mohlankana a phela, 'me ba tšeliseha haholo.

₁₃Rōna ra ba etella pele ka sekepe, ra tšelela Asose, moo re neng re ikemiselitse ho palamisa Paulosi teng, hobane o ne o lokisitse joalo hore eena o tla ea ka maoto. ₁₄Ha a teana le rōna Asose, ra mo palamisa, ra ea fihla Mitulene. ₁₅Ra tloha teng ka sekepe, 'me ka la hosasane ra feta pel'a Kiose. Ka le hlahlamang ra tšelela Samose, eare ho e-sa ra fihla Mileta. ₁₆Paulosi o ne a rerile ho feta feela Efese, hore a tle a se ke a lieha Asia, hobane o ne a itlhahaneletse ho ba Jerusalema ka letsatsi la Pentekonta, ha ho ka etsahala.

₁₇Joale ha a le Mileta, a rōmela Efese ho bitsa baholo ba kereke. ₁₈Ha ba fihla ho eena, a re ho bona: “Lea tseba kamoo ke phetseng le lōna kateng ka nako eohle, ho tloha ka tsatsi la pele leo ka lona ke qalileng ho bea leoto lefatšeng la Asia, ₁₉ke sebeletsa Morena ka boikokobetso bohle le ka meokho, le har'a meleko e ileng ea ntlhahela ka baka la maraba a Bajuda. ₂₀Lea tseba kamoo ke sa kang ka le patela letho le molemo kateng, ha ke ntse ke bolela, 'me ke ruta kapele ho sechaba le malapeng a lōna, ₂₁ke ntse ke qōphella Bajuda le Bagerike ho sokolohela ho Molimo le ho lumela ho Morena oa rōna Jesu.

₂₂“Joale bonang, ke ea Jerusalema ke susumetsoa ke Moea, ke sa tsebe tse tla ntlhahela teng, ₂₃haese hore Moea o Halalelang o ntemosa hore motseng o mong le o mong, litlamo le matšoenyeho li nkemetse. ₂₄Empa ha ke re letho ka bophelo ba ka, ha feela nka phetha mosebetsi oa ka, le tšebeletso eo ke neng ke e amohele ho Morena Jesu, ea ho paka tsa molaetsa o molemo oa mohau oa Molimo.

₂₅“Joale bonang, kea tseba hore lōna bohle bao ke tsamaileng har'a lōna ke ntse ke phatlalatsa tsa 'Muso, ha le sa tla bona sefahleho sa ka hape. ₂₆Ka baka leo, ke etsa bopaki ho lōna ka tsatsi lena, hore ha ke na molato maling a lōna bohle, ₂₇hobane ha kea ka ka tšaba letho, ke le phatlallelitse thato eohle ea Molimo. ₂₈Itlhokomeleng, le hlokomele le mohlape oohle, oo Moea o Halalelang o le beileng balebeli ba oona, hore le alose kereke ea Molimo, eo a iphumanetseng eona ka mali a Mora oa hae. ₂₉Kea tseba hore, ha ke se ke tlohile, liphiri tse sehlōhō li tla kena har'a lōna, 'me li ke ke tsa qenehela mohlape. ₃₀Esita le ho lōna ka sebele ho tla hlaha banna ba tla sotha 'nete, ho khelosa barutuoa hore ba ba sale morao. ₃₁Ka baka leo, falimehang, le 'ne le hopole hore, ka lemo tse tharo, ha kea ka ka phetsa ho eletsa e mong le e mong ka meokho motšeare le bosiu.

₃₂“Joale ke le bea matsohong a Molimo le mohaung oa lentsoe la hae le ka le hōlisang, la le nea lefa har'a bohle ba halalelitsoeng. ₃₃Ha kea ka ka tsoela silefera pelo, kapa khauta, kapa liaparo tsa motho. ₃₄Le lōna lea tseba hore matsoho ana a ile a sebeletsa seo 'na, le bao ke neng ke e-na le bona re neng re se hloka. ₃₅Ke le bontšitse linthong tsohle hore, ka ho sebetsa joalo ka thata eka khona le thuse mafutsana le ho hopola mantsoe a Morena Jesu, kamoo eena a neng a re: ‘Ho fana ke lehlohonolo le fetang ho fuoa!’ ”

₃₆Hoba a bolele tsena, a khumama, a rapela le bona bohle. ₃₇Ha e-ba le seboko se seholo ho bohle, ba kopa Paulosi ka molala, 'me ba mo aka. ₃₈Se ileng sa ba utloisa bohlōkō haholo ke polelo eo a ileng a e bolela, ea hore ha ba sa tla hlola ba bona sefahleho sa hae hape. Eaba ba mo felehetsa ho mo isa sekepeng.