Paulosi o ikarabella kapele ho Ageripa
1Ageripa a re ho Paulosi: “U lumeletsoe hore u ipuelle.”
Eaba Paulosi o otlolla letsoho, 'me a ikarabella, a re: 2“Khosi Ageripa, ke iphumana ke le lehlohonolo ha e le mona kajeno ke tla ikarabella kapele ho uena, holim'a tseo ke qōsoang ka tsona ke Bajuda; 3haholo ha u bile u le setsebi sa meetlo eohle le likhang tsohle tsa Bajuda. Ke ka hona ke kōpang hore u be pelonolo ho 'mamela.
4“Bajuda bohle ba tseba kamoo ke phetseng kateng ho tloha bocheng ba ka. Ba tseba hore ho tloha khale ke phetse har'a sechaba sa heso le mona Jerusalema. 5Kaha ba ntsebile ho tloha khale, haeba ba rata ba ka paka hore ke ile ka phela ke le Mofarisi, ke le oa mokha oa tumelo ea rōna, o litaelo li thata. 6Joale ka baka la ho tšepa tšepiso eo Molimo a e etselitseng bo-ntat'a rōna, ke eme mona ho ahlōloa. 7Melōko ea rōna e leshome le metso e 'meli, ha e ntse e pheella ho sebeletsa Molimo motšeare le bosiu, e tšepile hore tšepiso eo e tla phethahatsoa, 'me ke ka baka la eona tšepiso eo, khosi, ke qōsoang ke Bajuda. 8Ke ka baka la'ng lōna le lekanyang hore ke ntho e ke keng ea lumeloa ea hore Molimo a ka tsosa bafu na?
9“Joale le 'na ke ne ke hopotse hore ke tšoanetse ho etsa lintho tse ngata tse loantšanang le lebitso la Jesu oa Nasaretha. 10Ka fela ka li etsa Jerusalema. Ka matla ao ke a neiloeng ke baprista ba baholo, ka koalla ba bangata ba balumeli lichankaneng. Leha ba ne ba bolaoa, ke ne ke ananela. 11Hangata, ka ho ba otla ka matlung 'ohle a thapelo, ka leka ho ba tlamella hore ba nyefole. Kaha ke ne ke ba halefetse ka ho fetisisa, ka ba hlorisa ho ea fihla le metseng e ka mathōko.
Paulosi o bolela tsa tšokoloho ea hae
12“Eaba ke ea Damaseka ke neiloe matla le thōmo ke baprista ba baholo. 13Joale, khosi, har'a mpa ea motšeare, ha ke le tseleng, ka bona khanya e fetang ea letsatsi e tsoang leholimong; ea nteela hare le bao ke neng ke tsamaea le bona. 14Eare hoba bohle re oele fatše, ka utloa lentsoe le re ho 'na, ka Seheberu: ‘Saule! Saule! U ntlhorisetsa'ng na? Ho thata ho uena ho raha litsenene!’
15“Eaba ke re: ‘U mang, Morena?’
“Morena a re: ‘Ke 'na Jesu, eo u mo hlorisang.’ 16Empa tsoha, u eme, hobane ke iponahalitse ho uena, hore ke u khethe ho ba mosebeletsi le paki ea tseo u li boneng ka 'na, le tseo ke tla iponahatsa ho uena ka tsona. 17Ke tla u namolela ho Bajuda le ho balichaba, bao 'na ke u rōmang ho bona. 18U tla ba tutubolla, ba tsoe lefifing ba ee leseling; ba tsoe matleng a Satane, ba ineele ho Molimo, 'me ka ho lumela ho 'na ba tle ba fumane tšoarelo ea libe tsa bona, ba be le kabelo har'a ba halalelitsoeng!
Bopaki ba Paulosi ho Bajuda le balichaba
19“Ke ka hona, khosi Ageripa, ke sa kang ka hana ho mamela pono eo ea leholimo. 20Empa ke qalile pele ka ba leng Damaseka le Jerusalema, le ba naheng eohle ea Judea, hamorao ka ea ho balichaba, ka ba phatlalletsa hore ba bake, ba sokolohele ho Molimo, ba etse mesebetsi e lokelang pako. 21Ke ka lebaka la tsena Bajuda ba ileng ba ntšoara ke le ka Tempeleng, 'me ba leka ho mpolaea. 22Ka fumana thuso ea Molimo, ho fihlela ka letsatsi lena ke ntse ke eme ho paka ho ba baholo le ba banyenyane, ho se letho leo ke le bolelang ntle ho tseo baporofeta le Moshe ba itseng li tla etsahala; 23e leng hore Mesia o tla hlōkōfatsoa, e be oa pele ho tsoha bafung, a tle a bontše sechaba sa Bajuda le balichaba leseli.”
Paulosi o khothaletsa Ageripa ho sokoloha
24Eare a sa ntsane a ikarabella, Fesetose a bua ka lentsoe le phahameng, a re: “Ua lora, Paulosi! Tsebohali ena ea hao ea u hlantša!”
25Empa Paulosi a re: “Fesetose ea khabane, ha ke hlanye, ke bua mantsoe a 'nete, a nang le kelello. 26Khosi e tseba tsena tsohle; ke ka baka leo ke buang ka sebete, hobane ke kholoa hore ha ho letho le patiloeng ho eona, hobane ha lia etsetsoa sephiring. 27Khosi Ageripa, na u lumela baporofeta? Kea tseba hore ua lumela.”
28Eaba Ageripa o re ho Paulosi: “U hlōma eka u ka ntšokolla habonolo hakaalo hore ke be Mokreste!”
29Paulosi a re: “Leha e ka ba habonolo kapa hathata, ke rapela Molimo hore e se be uena feela, empa le bohle ba nkutloang kajeno ba be seo ke leng sona, re fapane feela ka mahlaahlela ana.”
30Ke ha khosi le 'musisi le Berenike le ba neng ba lutse le bona, ba ema. 31Hoba ba tsoe, ba buisana, ba re: “Motho enoa ha a ea etsa letho le lokeloang ke lefu kapa ke chankana.”
32Eaba Ageripa o re ho Fesetose: “Motho enoa a ka be a lōkōlōtsoe, hoja ha aa ka a ipiletsa ho Sesare.”
