Tšokoloho ea Saule
1Saule, a sa ntse a pipitlellane ke moea oa ho sokela le oa ho bolaea barutuoa ba Morena, a ea ho Moprista e Moholo. 2A kōpa mangolo a eang Damaseka, matlung a thapelo, e le hore ha a ka fumana bao e leng ba Tsela ena ea Bokreste, leha e le banna kapa basali, a ba tlame, a ba tlise Jerusalema. 3Ha a ntse a tsamaea, a se a le haufi le Damaseka, hang-hang ha phatsima leseli le tsoang leholimong, la mo teela hare. 4A oela fatše, a utloa lentsoe le reng ho eena: “Saule! Saule! U ntlhorisetsa'ng na?”
5A botsa, a re: “U mang, Morena?”
Lentsoe la re: “Ke 'na Jesu, eo u mo hlorisang, 6empa tsoha, u kene motseng, 'me teng u tla bolelloa seo u lokelang ho se etsa.”
7Joale banna ba tsamaeang le eena ba ema tlekelele! kaha ba ne ba fela ba utloile lentsoe, empa ba sa bone motho. 8Saule a tsoha fatše, 'me ha a tutuboloha, o ne a se a sa bone. Ba mo tataisa ka letsoho, ba mo isa Damaseka. 9A qeta matsatsi a mararo a sa bone, a sa je, a sa noe.
10Ho ne ho e-na le morutuoa e mong Damaseka, ea bitsoang Ananiase; Morena a 'molella ka pono, a re: “Ananiase!”
Eena a re: “Ke 'na enoa, Morena!”
11Morena a re ho eena: “Ema, u ee seterateng se bitsoang Se Otlolohileng, 'me ka tlung ea Juda u batle monna ea bitsoang Saule oa Tarasuse. Bona, oa rapela, 12'me ponong o bone monna ea bitsoang Ananiase a kena, a 'mea matsoho hore a tle a boele a bone.”
13Ananiase a araba, a re: “Morena, ke utloile ka ba bangata kamoo monna eo a entseng tse ngata, tse mpe, ho balumeli ba hao ba Jerusalema, 14'me le mona o filoe matla ke baprista ba baholo, ho tlama bohle ba u rapelang.”
15Empa Morena a re ho eena: “E-ea, hobane monna eo ke mohlanka eo ke mo khethileng ho tsebisa balichaba, le likhosi, le bana ba Iseraele lebitso la ka. 16'Na ke tla 'montša tsohle, tseo eka khonang a li hlōkōfaletsoe ka baka la lebitso la ka.”
17Ananiase a ea, a kena ka tlung eo, a 'mea matsoho, a re: “Saule ngoan'eso, Morena, e leng Jesu ea ileng a iponahatsa ho uena tseleng eo u neng u e-tla ka eona, o nthōmile hore u tle u boele u bone, u be u tlale Moea o Halalelang.” 18Hang-hang mahlong a hae ha oa ho kang makhekhebu, 'me a boela a bona. A ema, a kolobetsoa. 19Eare hoba a je, a boela a matlafala.
Saule o ruta motseng oa Damaseka
Saule a hlola nakoana le barutuoa ba leng Damaseka, 20'me kapele-pele a phatlalatsa matlung a thapelo hore Jesu ke Mora oa Molimo. 21Bohle ba mo utloang ba makala, ba re: “Na eo hase eena ea ileng a felisa bohle ba rapelang Jesu, Jerusalema, ea bileng a tlileng moo ka hona hoo, hore a ba tlame, a ba ise ho baprista ba baholo na?” 22Empa Saule eena a eketsa ho ipha matla le ho ferekanya Bajuda ba ahileng Damaseka, ka ho ba bontša hore Jesu ke eena Mesia.
Saule o phonyoha ho Bajuda
23Ha ho fetile matsatsi a mangata, Bajuda ba rera ho bolaea Saule, 24empa morero oo oa bona a o tseba. Bosiu le motšeare ba lebela likhoro tsa motse, hore ba tle ba 'molaee, 25empa bosiu barutuoa ba hae ba mo nka, ba mo ntša le lerakong la motse ka ho mo lepeletsa a le ka sesiung.
Saule o etela Jerusalema
26Eare hoba Saule a fihle Jerusalema, a leka ho ikopanya le barutuoa, empa bohle ba ne ba mo tšaba, ba sa lumele hore ke morutuoa. 27Baranabase a mo nka, a mo isa ho baapostola, 'me a ba hlalosetsa kamoo Saule a ileng a bona Morena kateng tseleng, le hore o ile a bua le eena, le kamoo a ileng a bua kateng phatlalatsa Damaseka ka lebitso la Morena. 28Joale a tsamaea a e-na le bona Jerusalema eohle, a bua phatlalatsa ka lebitso la Morena. 29O ne a bua, a phehisana khang le Bajuda ba buang Segerike, 'me ba leka ho 'molaea. 30Ha balumeli ba tsebile, ba mo theolela Sesaria, ba mo rōmela Tarasuse.
31Kereke ea e-ba le khotso Judea eohle, le Galelea, le Samaria; ea bōpeha, ea phela ka ho tšaba Morena, 'me ea anafala ka khothatso ea Moea o Halalelang.
Enea oa folisoa
32Petrose o ne a tsamaea hohle, 'me ka mohlomong a theoha ho ea bona le balumeli ba ahileng Lida. 33Teng a fumana monna e mong ea bitsoang Enea, ea neng a qetile lilemo tse robeli a robetse liphateng, a shoele litho. 34Petrose a re ho eena: “Enea, Jesu Kreste oa u folisa; tsoha u alōle liphate tsa hao.” A tsoha hang-hang. 35Baahi bohle ba Lida le Sarone ba 'mona, 'me ba sokolohela ho Morena.
Dorokase o tsosoa bafung
36Motseng oa Jopo ho ne ho e-na le morutuoa ea bitsoang Tabitha, e leng ho re Dorokase. Mosali enoa o ne a etsa mesebetsi e mengata, e molemo, a etsetsa le mafutsana lithuso tse ngata. 37Matsatsing 'ona ao a kula, 'me a shoa. Hoba a hlatsuoe, a beoa kamoreng e kaholimo. 38Kaha Lida e le haufi le Jopo, barutuoa ha ba utloa hore Petrose o Lida, ba rōma banna ba babeli ho eena, ba mo rapela, ba re: “U se ke ua lieha ho tla ho rōna.”
39Petrose a ema, a ea le bona. Ha a fihla, ba mo isa kamoreng e kaholimo, 'me bahlolohali bohle ba mo teela hare ba ntse ba lla, ba 'montša mefuta ea liaparo eo Dorokase a neng a e etse ha a sa ntse a phela.
40Hoba Petrose a ntšetse bohle kantle, a khumama, a rapela; a ntan'o retelehela setōpōng, a re: “Tabitha, tsoha!” Tabitha a tutuboloha, 'me ha a bona Petrose, a lula. 41Petrose a mo tšoara ka letsoho, a mo emisa; eare hoba a bitse balumeli le bahlolohali, a mo hlahisa ho bona a phela. 42Taba ena ea tsejoa hohle Jopo, 'me ba bangata ba lumela ho Morena. 43Petrose a hlola Jopo matsatsi a mangata, ha motho e mong ea bitsoang Simone, sesuhi sa matlalo.
