LIPOLELO 33

“Morena o ne a e-tsoa Sinai,

chaba a se chabela a e-tsoa Seire;

a phatsima

a le holim'a Thaba ea Parane,

kete tsa bahalaleli li mo apere,

ka le letona a utlile sabole

e tukang malakabe.

₃E, ruri chaba sa hae oa se rata,

bahalaleli ba hae bohle

oa ba sireletsa.

Ba lutse fatše, maotong a hae,

ba mametse mantsoe

a taelo tsa hae.

₄Moshe o re laetse Molao,

ke lona lefa

la phutheho ea ba Jakobo.

₅E ne e le khosi ea Jeshurune,

ha hlooho tsa sechaba li khōbōkane,

merabe ea Iseraele e le 'moho.

₆“Rubene a phele a se k'a timela,

bahlabani ba hae

ba se be 'maloana.”

“ ‘Morena, sekeha tsebe,

u e sekehele sello sa Juda

u 'musetse ho ba morabe oa hae,

a itšireletse ka matsoho a hae,

u be mathusetsa ho eena

lireng tsa hae.’

“ ‘Thumime ea hao

u e abetse Molevi,

Urime ua e nea mohalaleli,

eo u ileng ua mo lekela Masa,

ua loana le eena metsing a Meriba.

₉A bua ka 'm'ae le ntat'ae,

a re:

“Ha ke e-s'o 'mone le ho 'mona!”

Esita le bana babo a ba latola,

le bana ba hae a se ke a ba tseba.

Ba hlokometse lentsoe la hao,

selekane sa hao ba se bōlōka.

₁₀Ba tla ruta Jakobo taelo tsa hao,

ba rute Iseraele Molao oa hao.

Ba tla u tlisetsa mokubetso,

ba etse nyehelo ea secheso,

ba e etse aletareng ea hao.

₁₁Ak'u hlohonolofatse

maruo a hae, Morena,

mesebetsi ea hae

u e amohele u nyakaletse.

Khahlōla liholoholo tsa ba-mo-hloi,

lira tsa hae

li se hlole li ema hape.’

“ ‘Moratuoa oa Morena

o tla lula ka khotso pel'a hae,

Raliphahama

o mo sireletsa letsatsi lohle,

o lula tlas'a tšireletso ea hae.’

“ ‘Morena a hlohonolofatse

naha ea hae,

ka phōka ea bohlokoa

ea leholimo,

le ka metsi a khukhuthang

katlas'a lefatše;

₁₄ka tholoana tsa bohlokoa

tse butsoisoang ke letsatsi,

le ka tsa bohlokoa

tse melang ka khoeli le khoeli;

₁₅ka tse ntle-ntle

tse tsoang thabeng tsa boholo-holo,

le ka tsa bohlokoa

tsa maralla a mehla eohle;

₁₆ka tsa bohlokoa

tsa lefatše le tsohle tse ho lona,

le ka ho ratoa

ke ea ahileng sehlahleng.

Tlhohonolofatso

e theohele holim'a Josefa,

holim'a hlooho

ea ea khethehileng

har'a bana babo.

₁₇Pholoan'a hae ea letsibolo

e khabile ka tlōtla,

naka tsa eona

ekare ke naka tsa nare,

ka tsona e tla sututsa

machaba 'ohle,

e a fihlise pheletsong tsa lefatše.

Naka tseo

ke likhōthō-khōthō tsa Efraime,

naka tseo

ke likete-kete tsa Manase.’

“ ‘Sebulone, nyakalla

ha u le leetong la hao,

le uena, Isakare, nyakalla

ka litenteng tsa hao!

₁₉Ba tla bitsa lichaba

ba li bitsetse thabeng,

teng ba nyehele

ka mahlabelo a ho loka;

hoba ba tla mōkōnya limōmōnane

tsa maoatleng,

le matlotlo a bofihla a lehlabathe.’

“ ‘Ho ke ho tumisoe

ea anafalitseng Gade,

Gade o qachama joaloka tauhali,

o harola letsoho kapa lehata.

₂₁Eena o ikhethetse karolo ea mantlha,

o abetsoe seabo sa molaoli.

O tlile le hlooho tsa merabe,

a phethahatsa ho loka ha Morena,

le litaelo tsa hae ho Baiseraele.’

“ ‘Dane eena ke linyane la tau,

le tlōlang le e-tsoa Bashane.’

“ ‘Uena, Nafthali,

u ratoa ka ho fetisa,

mahlohonolo a Morena

a u atetse;

'muso oa hao

o tloha leoatleng ho ea boroa.’

“ ‘Ashere a hlohonolofale

ho feta merabe eohle,

bana babo

ba ke ba mo rate haholo,

maoto a hae a tlotsoe

ka ole ea mohloaare.

₂₅Mekoallo ea hae

e be ea tšepe le ea lethose,

matla a boqhekung

a tšoane le a bocheng ba hae.’

₂₆“Ha ho ea kang

Molimo oa Jeshurune,

ea kallang maholimo

ho tla le thusetsa,

ea tlang ka tlōtla ea hae

a le holim'a maru.

₂₇Leaho la hao

ke Molimo oa mehla eohle,

matsoho a mehla eohle

a u tšehetsa;

a phalalisa sera kapele ho uena,

a u laela hore u se timetse.

₂₈Joale Iseraele o phela ka khotso,

seliba sa Jakobo se inotši feela,

naheng ea koro le ea veine e ncha;

e, maholimo a nesa pula.

₂₉U lehlohonolo hakaakang,

uena Iseraele!

Ke mang

ea ka tšoanang le uena?

Le sechaba

se pholositsoeng ke Morena,

ke thèbè ea lōna e le thusetsang,

ke eena sabole ea tlōtla ea lōna.

Lira tsa lōna li tla ineela ho lōna,

lōna le li hatakele holimo.”