Selekane sa Horebe
1Moshe a bitsa Baiseraele bohle, 'me a re ho bona: “Lōna Baiseraele, mamelang melao le litaelo tseo ke le bolellang tsona kajeno, e le hore le tle le ithute tsona, le hore le tle le hlokomele ho li phetha.
2“Morena Molimo oa rōna, o ile a etsa selekane le rōna ha re le thabeng ea Horebe. 3Morena ha aa ka a etsa selekane sena le bo-ntat'a rōna, empa o se entse le rōna; rōna bohle ba ntseng ba phela kajeno. 4Morena o ile a bua le rōna lifahleho li talimane, a le holim'a thaba, a bua a le kahar'a mollo. 5Ka eona nako eo, ke ile ka ema pakeng tsa lōna le Morena, ho le bolella lipolelo tsa Morena. Ka lebaka la mollo lōna le ne le tšaba, 'me ha lea ka la hloella thabeng.”
Melao e leshome
“Eaba Morena o re:
6“ ‘Ke 'na Morena Molimo oa hao, ea u ntšitseng naheng ea Egepeta, moo u neng u le lekhoba teng.
7“ ‘U se ke ua ba le melimo e meng kantle ho 'na.
8“ ‘U se ke ua iketsetsa setšoantšo se betliloeng, leha e le setšoantšo sefe kapa sefe sa ntho e holimo, leholimong, kapa e tlase, lefatšeng; kapa e metsing, katlase ho lefatše. 9U se ke ua li khumamela, 'me u se ke ua li sebeletsa, hobane 'na, Morena Molimo oa hao, ke Molimo ea boulelang, ea otlang bana ka baka la bokhopo ba bo-ntat'a bona, ho isa molōkong oa boraro le oa bone oa ba ntlhoileng. 10Empa ba nthatang, ba bōlōkang melao ea ka, ke ba hauhela ho isa melōkong e sekete.
11“ ‘U se ke ua tlaela ka lebitso la Morena Molimo oa hao, hobane Morena a ke ke a tlohela ho otla ea tlaelang ka lebitso la hae.
12“ ‘Hlokomela letsatsi la Sabatha, u le halaletse, joalokaha Morena Molimo oa hao, a u laetse. 13U ka sebetsa ka matsatsi a tšeletseng, 'me ua etsa mesebetsi ea hao kaofela, 14empa letsatsi la bosupa ke la phomolo ea Morena Molimo oa hao. Ka letsatsi lena u se ke ua etsa mosebetsi ofe kapa ofe, uena, kapa mora oa hao, kapa morali oa hao, kapa mohlanka oa hao, kapa lekhabunyane la hao, kapa pholo ea hao, kapa tonki ea hao, kapa liphoofolo tsa hao tsohle, kapa mojaki ea ha hao, e le hore uena, le mohlanka oa hao, le lekhabunyane la hao, lōna le tle le phomole. 15Hopola hore le ne le le bahlanka naheng ea Egepeta. Morena Molimo oa lōna, o ile a le ntša moo ka matla, le ka letsoho la hae le otlolohileng. Ka baka lena, Molimo oa lōna, o le laetse ho bōlōka letsatsi la Sabatha.
16“ ‘Hlompha ntat'ao le 'm'ao, joalokaha Morena Molimo oa hao, a u laetse, e le hore u tle u phele halelele, u atlehe, naheng eo Morena Molimo oa hao, a u neang eona.
17“ ‘U se ke ua bolaea.
18“ ‘U se ke ua feba.
19“ ‘U se ke ua utsoa.
20“ ‘U se ke ua etseletsa motho e mong.
21“ ‘U se ke ua lakatsa mosali oa motho e mong. U se ke ua lakatsa hore ntlo ea motho e mong e be ea hao; leha e le tšimo ea hae, kapa mohlanka oa hae, kapa lekhabunyane la hae, kapa pholo ea hae, kapa tonki ea hae, kapa ntho e 'ngoe le e 'ngoe eo e leng ea motho e mong.’
22“Tsena ke lipolelo tseo Morena a ileng a li bolella sechaba sohle sa lōna, a le holim'a thaba, kahar'a mollo, le kahar'a leru, le kahar'a lefifi la bonka-ntjana, a bua ka lentsoe le matla. Eaba o khaotsa ho bua, o li ngola holim'a matlapa a mabeli, o 'nea tsona.”
Sechaba se kenelloa ke letsoalo
23“Eare ha le utloa lentsoe le tsoang har'a lefifi, ha thaba eona e ntse e tuka mollo, eaba lōna, le lihlooho tsohle tsa merabe, le baholo ba lōna, le atamela haufi le 'na, 24le re: ‘Bonang, Morena Molimo oa rōna, o re senoletse tlōtla ea hae, le boholo ba hae; le lentsoe la hae re le utloile le e-tsoa kahar'a mollo. Kajeno lena re bone hore Molimo o hle a bue le motho, ebe motho eo o ntse a phela. 25Joale ke hobane'ng re tšoanelang ho shoa? Khanare ena ea mollo e tla re timetsa! Ha re ka 'na ra utloa lentsoe la Morena Molimo oa rōna, ruri re tla shoa! 26Ke motho ofe ea kileng a utloa lentsoe la Molimo ea phelang, le bua le e-tsoa har'a mollo, joalokaha rōna re le utloile, 'me a 'na a phela? 27Uena, Moshe, atamela, u mamele tsohle tseo Morena Molimo oa rōna, a tla li bua; ebe uena u re bolella tsohle tseo Morena Molimo oa rōna, a tla li bua ho uena. Rōna re tla li mamela, 'me re li phethe.’
28“Morena a utloa lipolelo tsa lōna, ha le bua le 'na. Eaba Morena o re ho 'na: ‘Ke utloile lipolelo tsa sechaba sena, tseo se li buileng ho uena. Tsohle tseo se li buileng, se li buile ka nepo. 29Oho, e se eka lipelo tsa sona li ka ba tjena kamehla, sa ntšaba, sa bōlōka melao eohle ea ka, e le hore sona, le bana ba sona, se tle se atlehe kamehla eohle! 30E-ea, u re ho sona: Khutlelang litenteng tsa lōna. 31Empa uena u eme mona pel'a ka, 'me ke tla u bolella melao eohle, le litaelo, le litemoso, tseo u tla se ruta tsona, e le hore se tle se li phethe, naheng eo ke se neang eona, hore e be ea sona.’
32“Ka baka leo, hlokomelang ho etsa joalokaha Morena a le laetse. Le se ke la khelohela ka letsohong le letona kapa ka ho le letšehali. 33Le tsamaee ka tsela eo Morena Molimo oa lōna, a le laetseng hore le tsamaee ka eona, e le hore le tle le phele, le atlehe, 'me le phele halelele naheng eo e tla ba ea lōna.”
