1Joalokaha ntsintsi tse shoeleng
li nkhisa menkoane,
bothotoana le bona
bo senya bohlale le botumo.
2Pelo ea ea bohlale
e sekamela ho lokeng,
pelo ea ea sethoto
e sekamela bokhopong.
3Sethoto se tsamaea tseleng
se se na kelello,
bohle se ba bolella
hore lithoto ke bona.
4Haeba khalefo ea 'musi e u tlōkela,
tulo tsa hao u se k'a sutha ho tsona,
hoba boikokobetso
bo felisa liphoso tse kholo.
5Ho na le bokhopo
boo ke bo boneng mona lefatšeng,
phoso eo sesosa sa eona
e leng 'musi:
6Thoto li beoa litulong
tse phahameng haholo,
barui bona
ba beoe ho tse tlase-tlase.
7Ke bone makhoba a kaletse lipere,
mahosana 'ona
a tasola seka makhoba.
8Ea chekang lemena
a ka 'n'a oela ho lona,
ea heletsang lerako
a ka 'n'a lōngoa ke noha.
9Ea thuang majoe
a ka 'n'a pitloa ke 'ona,
ea rathang patsi,
a ka 'n'a hlajoa ke phatsa.
10Ha selepe se le nthithi,
se sa leotsoe,
eka khona moratha-patsi a be sefea;
athe setsebi
se thusoa ke bohlale ba sona.
11Ha noha e ka lōma
pele e k'hoefuoa,
mok'hoefi oa linoha
a ke ke a putsoa.
12Polelo tsa ea bohlale lia khahleha,
athe tsa sethoto tsona
lia se timetsa;
13ha se bua se ee se qale
ka ho phorohla,
se qetelle ka ho pōta
sa motho oa mapokaetsi.
14Sethoto ha se hèhla ha se khaotse!
Motho a ke ke a tseba
tse tla etsahala;
tse tla hlaha hoba a fete
li ka senoloa ke mang?
15Thoto se tepeletsoa
ke mosebetsi oa sona,
le tsela e eang motseng
ha se e tsebe.
16Ho malimabe naha
e busoang ke khosi ea moshanyana,
eo mahosana a eona
a ketekang e sa le hoseng!
17Ho lehlohonolo naha
e busoang ke khosi e tsoalehileng,
eo mahosana a eona
a ketekang ka nako ea teng,
a jelang ho matlafala,
e seng hore a tahoe.
18Bokhōba bo etsa
hore maballo a ntlo a kobehe,
ha matsoho a sa tšoare,
ntlo eo e ee e nele.
19Mokete o etsetsoa boithabiso,
veine eona e natefisa bophelo,
empa ka chelete
u ka fumana tsohle.
20Se rōhake khosi,
leha e le ka mehopolong ea hao,
kapa morui ha u le ka kamoreng
ea ho robala,
hoba nonyana e fofang
e ka utloa polelo tsa hao,
tlhatsinyane ha e rura
ea tsamaea e li bolela.
