Ho sebeletsa lelea
1Ka boela ka nahana, 'me ka bona liketso tsohle tsa khatello tse etsoang mona lefatšeng:
Ka bona meokho ea ba hatelloang,
feela bona ba se na motšelisi;
bahatelli ba bona
ba e-na le matla,
feela ba hatelloang
ba se na motšelisi.
2Kahoo ka lebohela
ba seng ba shoele,
ho e-na le bana
ba ntseng ba phela.
3Bobeli ba fetoa
ke ea e-s'o tsoaloe,
ea e-s'o ka ba a bona bokhopo,
bokhopo bo etsoang mona lefatšeng!
4Ka hlokomela hore boikitlaetso bohle le katleho eohle, li tsoaloa ke ho hōnōhelana ha batho. Hona le hona ke lefeela le tšoanang le ho lelekisa moea feela.
5Sethoto se phutha matsoho a sona,
'me se ipolaee ka bosona.
6Seatla se le seng
se fupereng khotso
se feta tse peli
tse tšoereng ka thata,
tse lelekisang moea feela.
Ba babeli ba feta ea mong
7Eaba ke boela ke bona mafeela mona lefatšeng:
8Motho ea mong to! ka monoana,
ke eo,
ha a na mora, ha a na ngoan'abo,
o sebetsa ka thata a sa khaotse,
le eena ka boeena
ha a khotsofalle leruo la hae.
Joale oa ipotsa:
“Ke sebeletsa mang,
ha ke itima tsa boithabiso?”
Le hona ke lefeela,
ke ho sebeletsa lelea!
9Ba babeli ba feta ea mong,
moputso oa bona oa hlamatseha.
10Ha e mong a e-oa,
e mong oa mo tsosa;
ho malimabe ea oang
ho se na mothusi!
11Ba babeli baa futhumatsana
ha ba kopanetse likobo;
ea robetseng a le mong
a ka futhumala joang?
12Ntjapeli ha e hlōloe ke sebata,
thapo e khoele li tharo
e lieha ho khaoha.
13Mohlankana ea futsanehileng, empa a le bohlale, o feta khosi e tsofetseng, e sethoto, e seng e sa tsebe le ho mamela likeletso. 14Mohlomong mohlankana eo o tsoa chankaneng ho tla ba khosi, kapa ebe o tsoaletsoe bofutsaneng, empa a tsoalloa 'musong oo e tla ba oa hae. 15Ke bone batho bohle ba phelang mona lefatšeng, ba tsamaeang le mohlankana ea tla hlahlama khosi. 16Batho bao khosi e tla ba busa ha ba na palo, empa le eona khosi ha e se e fetile e ke ke ea thabeloa ke ba tla e hlahlama. Ruri le hona ke lefeela le tšoanang le ho lelekisana le moea feela.
