Moredekai o kōpa thuso ea Esetere
1Ha Moredekai a tsebile tsohle tse entsoeng, a hahōla liaparo tsa hae, a apara tse mahoashe, a itšela ka molora, a tsamaea har'a motse, a ntse a bokolla haholo ka sello se bohlōkō. 2A fihla a ema kapele ho monyako oa khosi, hobane ho ne ho se ea ka kenang ka monyako oa khosi a apere tse mahoashe. 3Naheng e 'ngoe le e 'ngoe, eo taelo ena ea khosi e ileng ea fihla ho eona, ea e-ba seboko se seholo har'a Bajuda. Ba itima lijo, ba lla, ba bokolla; ba bangata ba ala tse mahoashe, ba ipitika moloreng.
4Makhabunyane a Esetere le mahaole a hae, a fihla a 'molella. Mofumahali Esetere a utloa bohlōkō haholo, 'me a rōmela liaparo ho Moredekai, hore a apare, a hlōbōle tse mahoashe, empa Moredekai a se ke a li amohela. 5Joale Esetere a bitsa Hatake, e mong oa mahaole a khosi ea neng a mo sebeletsa, a mo laela hore a e'o bona hore na molato ke ofe ho Moredekai, le hore na ke hobane'ng.
6Eaba Hatake o ea ho Moredekai, lebaleng le neng le le kapele ho monyako oa khosi. 7Moredekai a 'molella tsohle tse mo hlahetseng, le tsa chelete eo Hamane a tšepisitseng hore o tla e kenya letlōleng la khosi, hore ho tle ho timetsoe Bajuda. 8A mo nea le lengolo la taelo e phatlalalitsoeng Shushane, ea hore ho timetsoe Bajuda. A re a e'o le nea Esetere, a mo hlalosetse lona, a be a mo laele hore a ee kapele ho khosi, ho ea mo etsetsa thapeli, le ho batlela sechaba sa habo thuso ho khosi.
9Hatake a fihla, a bolella Esetere litaba tsa Moredekai. 10Esetere a boela a bua le Hatake, a mo nea taelo e eang ho Moredekai, a re: 11“Bahlanka bohle ba khosi, le sechaba sohle se linaheng tsa khosi, baa tseba hore mang kapa mang, e ka ba monna kapa mosali, ea kenang ka seotloaneng se kahare sa khosi, a sa bitsoa, molao o mong feela: Ke hore a bolaoe, haese feela eo khosi e ka mo supang ka lere la eona la khauta, hore a se ke a bolaoa. Empa e se e le matsatsi a mashome a mararo ke e-s'o ka ke bitsoa hore ke ee ho khosi.”
12Ba bolella Moredekai lipolelo tsa Esetere. 13Eaba Moredekai o re ba bolelle Esetere, ba re: “U se ke ua hopola hore kaha u le ka tlung ea khosi u tla phonyoha ha Bajuda ba bolaoa. 14Haeba ka nako ena u ka khutsa tu! ho namoleloa ha Bajuda le ho pholosoa ha bona, ho tla hlaha sebakeng se seng, empa ha e le uena le lelapa la ntat'ao le tla timetsoa. Ke mang ea ka tsebang haeba u beiloe litulong tseo, u beeloa nako e kang ee?”
15Esetere a re ba arabe Moredekai, ba re: 16“Tsamaea, u e'o phutha Bajuda bohle ba teng mona Shushane. Ka matsatsi a mararo, bosiu le motšeare, le itime lijo ka baka la ka, le se ke la ba la ja letho, kapa la noa letho. Le rōna le makhabunyane a ka re tla itima lijo ka mokhoa o joalo. Joale ke hona ke tla ea ho khosi, le hoja e tla be e se ka molao. Haeba ke e-shoa, ke tla shoa.”
17Moredekai a tsamaea, 'me a phetha tsohle tseo Esetere a mo laetseng tsona.
