ESEKIELE 1

₁Ka letsatsi la bohlano la khoeli ea bone selemong sa mashome a mararo, ha ke le har'a bathōpuoa pel'a nōka ea Kebare, ke ile ka bona maholimo a buleha, eaba ke bona lipono tsa Molimo.

₂Ka letsatsi la bohlano la khoeli, e leng selemo sa bohlano khosi Jehoeakine a thōpiloe, ₃lentsoe la Morena la fihla ho moprista Esekiele, mora oa Busi, a le pel'a nōka ea Kebare, naheng ea Bakalatiea, eaba matla a tsoang ho Morena aa mo tsukutla.

₄Ha ke talima ka bona sefefo se hlaha leboea, e le leru le leholo le tsekemang lehalima, le pota-potiloeng ke khanya. Bohare ba lona bo ne bo tšoana le lethose le hlenneng ke mollo. ₅Har'a sefefo seo ho ne ho e-na le ho kang libōpuoa tse 'ne, tse phelang. Sebōpeho sa tsona se ne se tšoana le sa motho, ₆empa se seng le se seng sa libōpuoa tsena se ne se e-na le lifahleho tse 'ne, le mapheo a mane. ₇Meomo ea tsona e ne e otlolohile; bohato ba maoto a tsona bo ka tlhako ea namane. A ne a phatsima joaloka lethose le hlakolisitsoeng. ₈Tlas'a lepheo ka leng ho ne ho e-na le letsoho le kang la motho. Bone ba tsona li ne li e-na le lifahleho le mapheo. ₉Mapheo a tsona a ne a thetsana. Ha li ne li tsamaea, li ne li toba pele feela, li sa retelehe.

₁₀Fahleho tsa tsona li ne li le tjena: Sebōpuoa ka seng se ne se e-na le sefahleho se kang sa motho, ka lehlakoreng le letona e le se kang sa tau, ka ho le letšehali e le se kang sa poho, 'me sebōpuoa ka seng se e-na le sefahleho se kang sa ntsu. ₁₁Lifahleho tsa tsona li ne li le joalo. Mapheo a tsona a ne a thathaletse, a lebile holimo. Mapheo a mabeli a sebōpuoa ka seng a ne a thetsana le a sebōpuoa se seng, 'me mapheo a mang a mabeli a koahetse 'mele. ₁₂Sebōpuoa ka seng ha se tsamaea se ne se toba pele feela. Li ne li e-ea hohle moo moea o neng o rata ho ea teng. Ha li tsamaea, li ne li sa retelehe.

₁₃Tšobotsi ea libōpuoa tsena tse phelang e ne e ka mashala a hlenneng, kapa e ne e ka lirumōla. Mollo oo o ne o tsekema har'a libōpuoa tsena, o khanya haholo, 'me lehalima le e-tsoa ho oona. ₁₄Libōpuoa tsena li ne li takolotsa, li e-ea pele le morao joaloka lehalima.

₁₅Ha ke ntse ke talimile libōpuoa tsena tse phelang, ka bona lebili le le fatše ka lehlakoreng la sebōpuoa ka seng, se nang le lifahleho tse 'ne. ₁₆Mabili ana a mane a ne a tšoana; lebili ka leng le ne le phatsima joaloka lehakoe la bohlokoa, le le joalokaha e ka le kena kahar'a lebili le leng. ₁₇Ha mabili ana a ne a tsamaea, a ne a bilikela kae kapa kae moo libōpuoa li eang teng; a ne a sa retelehe ha libōpuoa tsena li tsamaea. ₁₈Mabanta a 'ona a ne a phahame, a tšabeha, 'me bone ba 'ona a tletse mahlo ho a pota-pota.

₁₉Ha libōpuoa tsena tse phelang li tsamaea, le mabili a mahlakoreng a tsona a ne a tsamaea; ha libōpuoa li phahama, mabili le 'ona a ne a phahama. ₂₀Hohle moo moea o neng o rata ho ea teng, libōpuoa le tsona li ne li e-ea teng, 'me mabili le 'ona a ee le tsona, hobane moea oa libōpuoa tsena tse phelang o ne o le kahar'a mabili. ₂₁Ha libōpuoa li tsamaea, mabili le 'ona a ne a tsamaea; ha libōpuoa li ema, mabili le 'ona a ne a ema. Ha libōpuoa li phahamela holimo, mabili le 'ona a ne a phahama le tsona, hobane moea oa libōpuoa tsena tse phelang o ne o le kahar'a mabili.

₂₂Ntho e kang lōapi, e benyang joaloka leqhoa, e tšabehang haholo, e ne e okametse libōpuoa tsena tse 'ne, tse phelang. ₂₃Katlas'a lōapi lena, mapheo a mabeli a sebōpuoa ka seng a ne a thathaletse, a thetsane le a sebōpuoa se seng, a mang a mabeli a koahetse 'mele oa sebōpuoa ka seng. ₂₄Ha libōpuoa tsena li tsamaea, ka utloa molumo oa mapheo a tsona, o kang molumo oa metsi a hoasang, o kang oa lentsoe la Ea Matla 'ohle, o kang oa lerata la lebōtho le leholo. Ha li ema, li ne li phutha mapheo a tsona.

₂₅Ha li ntse li eme joalo, li phuthile mapheo a tsona, ha utloahala lentsoe le tsoang kaholimo ho lōapi le okametseng lihlooho tsa tsona. ₂₆Kaholimo ho lōapi leo le okametseng lihlooho tsa tsona, ho ne ho e-na le ntho e kang terone ea safire, 'me holim'a eona ho lutse ho kang motho. ₂₇Ho tloha lethekeng la hae ho ea holimo ka bona ho kang lethose le hlenneng, le har'a mollo; ho tloha thekeng ho ea tlase, motho eo a ka mollo, khanya e phatsimang e mo etselitse serakoe. ₂₈Serakoe seo se ne se phatsima joaloka mookoli har'a maru ha pula e e-na.

Serakoe sena e ne e le se tšoantšang tlōtla ea Morena. Eare ha ke se bona ka itihela fatše ka sefahleho, 'me ka utloa lentsoe la ea buang.