Kahlōlo ea baetapele ba Iseraele
1Eaba Moea oa mphahamisa, o mphihlisa monyakong o ka bochabela oa Tempele ea Morena, o talimileng bochabela. Hona moo monyako ho ne ho eme banna ba mashome a mabeli a metso e mehlano; har'a bona ka bona Jaasaneea, mora oa Asure, le Pelatiea, mora oa Benaea, e leng baetapele ba sechaba.
2Morena a re ho 'na: “Uena ngoan'a motho, banna bana ke bona ba ntseng ba rera bokhopo, ba fana ka likeletso tse mpe har'a motse mona. 3Ba re: ‘Nako ea ho haha matlo e sa le hōle! Motse ona ke pitsa, 'me rōna re nama.’ 4Ka baka leo, porofeta, u ba hanyetse; porofeta uena ngoan'a motho.”
5Eaba Moea oa Morena o fihla ho 'na, o mpolella hore ke re: “Morena o bua tjena: Sena ke sona seo le se buileng, lōna ba ntlo ea Iseraele, hobane ke tseba mehopolo eohle ea lipelo tsa lōna. 6Le bolaile batho ba bangata motseng ona, 'me le tlatsitse literata tsa oona ka babolauoa.
7“Ka baka leo, Morena Molimo o bua tjena: Litōpō tseo le li lahletseng har'a motse ke eona nama, 'me motse ona oona ke pitsa, empa lōna ke tla le ntša kahar'a oona. 8Le tšaba ho bolaoa ka sabole, empa le tla bolaoa ka sabole, ho rialo Morena Molimo. 9Ke tla le ntša kahar'a motse ona, ke neelane ka lōna matsohong a balichaba, 'me ke le ahlōle! 10Le tla bolaoa ka sabōle, ke le ahlōlele meeling ea naha ea Iseraele, 'me le tla tseba hore ke 'na Morena. 11Motse ona e ke ke ea e-ba pitsa ho lōna, kapa lōna la ba nama e ka pitseng eo; ke tla le ahlōlela meeling ea naha ea Iseraele. 12Le tla tseba hore ke 'na Morena, hobane ha lea ka la latela litaelo tsa ka, kapa la boloka melao ea ka, empa le latetse melao ea lichaba tse le pota-potileng.”
13Eare ha ke ntse ke porofeta Pelatiea, mora oa Benaea, a shoa. Eaba ke itihela fatše ka sefahleho, ke hōoeletsa haholo, ke re: “Oho, Morena Molimo! Na u tla timetsa le masalla 'ohle a Iseraele?”
Tšepiso ea Molimo ho bathōpuoa
14Lentsoe la Morena la boela la fihla ho 'na, la re: 15“Uena ngoan'a motho, bana beno, e, bana beno bao u tsoalanang le bona, e leng bohle ba ntlo ea Iseraele, ke bona bao baahi ba Jerusalema ba itseng ho bona: ‘E-eang hōle le Morena! Naha ena re e filoe hore e be lefa la rōna!’
16“Ka baka leo he, u re ho bona: ‘Morena Molimo o bua tjena: Le hoja ke le leleketse hōle, har'a balichaba, 'me ke le hasantse har'a linaha, ka nakoana ke tla ba sehalalelo ho lōna linaheng tseo le ileng ho tsona.’
17“Ka baka leo he, u re ho bona: ‘Morena Molimo o bua tjena: Ke tla le phutha har'a balichaba, ke le phuthe linaheng tseo le neng le qhalanyelitsoe ho tsona, ke le buseletse naha ea Iseraele.’
18“Ba tla khutlela naheng ena, 'me ba hleke melingoana ena e nyonyehang, le manyala 'ohle a teng. 19Ke tla ba nea pelo e le 'ngoe, ke ba nee le moea o mocha, ke felise lipelo tsa bona tse thata, ke ba nee lipelo tse ikokobelitseng. 20Ba tla latela litaelo tsa ka, ba boloke melao ea ka, ba e phethahatse. E tla ba sechaba sa ka, 'na ke be Molimo oa bona. 21Empa ha e le bana bao lipelo tsa bona li ineetseng melingoana ea bona e nyonyehang, e manyala, ke tla ba otlela mesebetsi ea bona, ho rialo Morena Molimo.”
Tlōtla ea Molimo e tloha Jerusalema
22Joale likerubime tsa thathalatsa mapheo a tsona, tsa phahamisa le mabili a mahlakoreng a tsona, 'me tlōtla ea Molimo oa Iseraele ea e-ba kaholimo ho tsona. 23Tlōtla ea Morena ea tloha har'a motse, ea fihla ea lula holim'a thaba e ka bochabela ho motse. 24Ka pono e entsoeng ke Moea oa Molimo, Moea oa mphahamisa, oa nkisa ho bathōpuoa ba naheng ea Bakalatiea.
Eaba pono eo ke e boneng e tloha ho 'na, 25'me ka bolella bathōpuoa tsohle tseo Morena a mpontšitseng tsona.
