Moporofeta o fetoha motšabeli
1Lentsoe la Morena la fihla ho 'na, la re: 2“Uena ngoan'a motho, u phela har'a sechaba sa bafetoheli, se nang le mahlo empa se sa bone, se nang le litsèbè empa se sa utloe, hobane ke sechaba sa bafetoheli.
3“Ka baka leo, uena ngoan'a motho, moo ba ntseng ba u shebile, motšeare le itse nte! tlama thōtō ea hao, u ee bothōpuoeng; u tsamaee, u tlohe mona moo u leng hona teng, u ee sebakeng se seng. Le hoja e le sechaba sa bafetoheli, mohlomong ba tla imamela. 4Motšeare le itse nte! moo ba ntseng ba u shebile, u ntše thōtō ea hao, u itokisetse ho ea bothōpuoeng. Mantsiboea, moo ba ntseng ba u shebile, u tsamaee joaloka ba eang bothōpuoeng. 5Moo ba ntseng ba u shebile, u phunye lesoba leboteng la ntlo ea hao, u ntše thōtō ea hao le hona teng. 6U jare thōtō ea hao mahetleng ba ntse ba u shebile, u tsamaee ha shoalane e tšoara. U ikhurumetse sefahleho, e le hore u se ke ua bona tsela, hobane ke u entse sesupo ho ba ntlo ea Iseraele.”
7Ka etsa joalokaha ke laetsoe. Ka ntša thōtō ea ka letsatsi le ntse le chabile, joaloka thōtō ea ea eang bothōpuoeng. Mantsiboea ka phunya lesoba leboteng ka matsoho a ka. Ha shoalane e tšoara ka ntša thōtō ea ka, ka e jara mahetleng, moo ba ntseng ba nchebile.
8Ka la hosasane lentsoe la Morena la fihla ho 'na, la re: 9“Uena ngoan'a motho, na sechaba sa Iseraele, sechaba see sa bafetoheli, ha sea ka sa u botsa, sa re: ‘U etsa'ng?’
10“E-re ho sona: ‘Morena Molimo o bua tjena: Molaetsa ona ke oa khosana ea Jerusalema le bohle ba ntlo ea Iseraele ba phelang moo.’ 11E-re ho bona: ‘Ke 'na sesupo sa lōna.’
“Joalokaha ke entse ho uena, le ho bona ke tla etsa joalo; ba tla tsamaea, ba ee bothōpuoeng.
12“Khosana ea bona e tla jara thōtō ea eona mahetleng a eona, e le ka shoalane, e tsamaee. E tla tsoa le lesobeng leo ba e phunyelitseng lona leboteng, e ikhurumetse sefahleho e le hore e se ke ea bona tsela. 13Khosana eo ke tla e chehela leraba le tla e tšoasa, ebe ke e isa Babilona, naheng ea Bakalatiea. Le hoja khosana eo e tla shoela moo, empa e ke ke ea bona naha eo. 14Bohle ba nang le khosana eo, e leng balebeli ba eona le mabōtho 'ohle a eona, ke tla ba qhalanyetsa hohle lefatšeng, 'me ba tla bolaoa ka sabole.
15“Ha ke ba qhalanyetsa har'a lichaba, ke ba hasanya har'a linaha, ke hona ba tla tseba hore ke 'na Morena. 16Empa ba seng bakae ba bona ke tla ba pholosa, ba se ke ba bolaoa ka sabole, le ke sekoboto, le ke lefu la seoa, e le hore lichabeng tseo ba tla ea ho tsona ba tle ba bolele mesebetsi eohle ea bona e nyonyehang, lichaba tseo li tle li tsebe hore ke 'na Morena.”
Sesupo sa moporofeta ea thōthōmelang
17Lentsoe la Morena la fihla hape ho 'na, la re: 18“Uena ngoan'a motho, lijo tsa hao u li je u thōthōmela, metsi a hao u a noe u tlakasela, u tšoenyehile. 19E-re ho sechaba sa naha ena: ‘Morena Molimo o bua tjena ka baahi ba Jerusalema, le ka ba phelang naheng ea Iseraele: Ba tla ja lijo tsa bona ba tšoenyehile, ba noe metsi a bona ba tšohile, hobane naha ea bona e tla hlakoloa tsohle tse ho eona ka baka la meferefere ea bohle ba phelang ho eona. 20Metse e tla hloka baahi, naha e fetohe nanaola, 'me le tla tseba hore ke 'na Morena.’ ”
Maele a ratoang le molaetsa o sa ratoeng
21Lentsoe la Morena la fihla ho 'na, la re: 22“Uena ngoan'a motho, ke puo' ngoe eo le e buang naheng ee ea Iseraele, puo e reng: ‘Matsatsi aa lelefala, pono e 'ngoe le e 'ngoe e fetoha lefeela’? 23Ka baka leo, ba bolelle, u re: ‘Morena Molimo o bua tjena: Puo ena ke tla e felisa, 'me ha e sa tla hlola e buuoa naheng ena ea Iseraele.’ Empa ba bolelle, u re: ‘Matsatsi a atametse ao ka 'ona pono e 'ngoe le e 'ngoe e tla phethahatsoa.
24“ ‘Ha ho sa tla hlola ho e-ba le lipono tsa leshano, kapa boporofeta ba bohata kahar'a sechaba sa Iseraele. 25Ke 'na Morena, ke bua seo ke se ratang, 'me se tla phethahatsoa ho se tika-tiko. Lōna sechaba sa bafetoheli, mehleng ena ea lōna ke tla phethahatsa tsohle tseo ke li bolelang, ho rialo Morena Molimo.’ ”
26Lentsoe la Morena la boela la fihla ho 'na, la re: 27“Uena ngoan'a motho, ba ntlo ea Iseraele ba re: ‘Pono eo u e bonang ke ea mengoaha e mengata e tlang, 'me u porofeta tse tla etsahala ka matsatsi a tlang, a sa leng hōle!’
28“Ka baka leo, e-re ho bona: ‘Morena Molimo o bua tjena: Mantsoe a ka a ke ke a hlola a thisisoa, empa tseo ke li bolelang li tla phethahatsoa, ho rialo Morena Molimo.’ ”
