Naha e abeloang Morena
1“ ‘Mohla le arolelanang naha ka lōtho, le aba lefa, le khethele Morena karolo e 'ngoe ea eona, e le sebaka se halalelang. Bolelele ba sona e be likilomethara tse leshome le metso e 'meli le halofo, bophara ba sona e be likilomethara tse leshome. Sebaka sena sohle e tla ba sebaka se halalelang. 2Mahlakore a setša sa Sehalalelo a tla lekana, lehlakore kaleng e be limethara tse makholo a mabeli le mashome a mahlano; bophara ba sebaka se pota-potileng setša sena e be limethara tse mashome a mabeli a metso e mehlano. 3Kahare ho sebaka se halalelang u tla siea karolo e bolelele ba limethara tse leshome le metso e 'meli le halofo, e bophara ba limethara tse hlano. Sehalalelo se halalelang ka ho fetisisa se be karolong ena. 4Karolo ena e halalelang ea naha e tla abeloa baprista, e leng basebeletsi ba Sehalalelo, ba atamelang kapele ho Morena ho mo beletsa. E tla ba setša sa matlo a bona le setša se halalelang sa Tempele. 5Karolo e 'ngoe e bolelele ba likilomethara tse mashome a mabeli a metso e mehlano, le bophara ba likilomethara tse hlano, e tla ba ea Balevi ba sebeletsang ka Tempeleng. Ke ea bona, ke moo ba tla haha metse ea bona teng.
6“ ‘Haufi le setša se halalelang, karolo e 'ngoe e bolelele ba likilomethara tse leshome le metso e 'meli le halofo, le bophara ba likilomethara tse peli le halofo, e tla ba setša sa motse, moo bana bohle ba Iseraele ba ka ahang teng.
Naha e abeloang khosana
7“ ‘Khosana e tla abeloa naha e ka mahlakoreng a mabeli a setša sa Tempele le sa motse. Naha ena e tla namela bophirimela le bochabela, e ikhōhle ka bolelele ba e 'ngoe ea linaha tse abetsoeng merabe ea bana ba Iseraele. 8Lena e tla ba lefa la khosana naheng ea Iseraele. Likhosana tsa ka li ke ke tsa hlola li hatella sechaba sa ka, 'me naha e setseng li tla e arolela ba ntlo ea Iseraele ho ea ka merabe ea bona.
Melao e busang khosana
9“ ‘Morena Molimo o re: Ho lekane lōna mahosana a Iseraele! Felisang likhōka le khatello, le etse se lokileng le se nepahetseng. Khaotsang ho tlatlapa sechaba sa ka, ho rialo Morena Molimo.
10“ ‘Le be le sekala se nepahetseng, le serōtō se nepahetseng, le moritšoana o nepahetseng. 11Serōtō le moritšoana li lekane, e 'ngoe le e 'ngoe ea tsona e kene haleshome morifing oo ho lekanngoang ka oona.
12“ ‘Ligera tse mashome a mabeli ke likeramo tse leshome le motso o mong; ligera tse sekete le makholo a mabeli ke mina e le 'ngoe.
13“ ‘Nyehelo eo le tla e etsa ke ena: Serōtō se le seng ho tse mashome a tšeletseng tsa koro le serōtō se le seng ho tse mashome a tšeletseng tsa harese. 14Nyehelo ea ole e be lefisoana ho a lekholo. 15Mohlapeng oa linku tse makholo a mabeli, o tsoang makhulong a nonneng a naha ea Iseraele, le tla nyehela ka konyana e le 'ngoe. Ka tsena tsohle le tla etsa nyehelo ea lijo, nyehelo ea secheso, nyehelo ea teboho, le nyehelo ea tefelo ea sebe, ho rialo Morena Molimo.
16“ ‘Sechaba sohle sa naha se tla etsetsa khosana ea Iseraele nyehelo ena. 17Khosana eona e tla etsa nyehelo ea secheso, le nyehelo ea lijo, le nyehelo ea lino, mohl'a mokete, le ha khoeli e thoasitse, le ka matsatsi a Lisabatha, le meketeng eohle e halalelang ea ba ntlo ea Iseraele. Khosana e tla lokisa nyehelo ea sebe, le nyehelo ea lijo, le nyehelo ea secheso, le nyehelo ea teboho ho etsetsa ba ntlo ea Iseraele tefelo ea sebe.
Linyehelo tsa Mekete e Halalelang
18“ ‘Morena Molimo o bua tjena: Ka letsatsi la pele la khoeli ea pele, u tla nka pohoana e se nang sepha, u hloekise Sehalalelo. 19Moprista o tla nka mali a phoofolo ea nyehelo e tlosang sebe, 'me ka 'ona a tlotse likosene tsa menyako ea Tempele, le manakana a mane a mohaoloana oa aletare, le likosene tsa khoro ea lebala le kahare. 20Ka letsatsi le bosupa la khoeli, u tla etsa joalo bakeng sa e mong le e mong ea entseng sebe ka baka la bofokoli kapa ka baka la ho se tsebe. Ka mokhoa o joalo le tla etsetsa Tempele pheko.
21“ ‘Ka letsatsi la leshome le metso e mene la khoeli ea pele, le tla etsa mokete oa Paseka, 'me ka matsatsi a supileng le je bohobe bo sa lomosoang. 22Ka lona letsatsi leo, khosana e tla nka pohoana, e iketsetse nyehelo e tlosang sebe, e be e etsetse le sechaba sohle sa naha. 23Ka letsatsi le leng le le leng la matsatsi a supileng a mokete, khosana e tla etsetsa Morena nyehelo ea secheso ka lipohoana tse supileng tse se nang sepha, le ka lipheleu tse supileng tse se nang sepha. Ka letsatsi le leng le le leng la matsatsi a supileng, e nke potsanyane, e etse nyehelo e tlosang sebe. 24Bakeng sa pohoana e 'ngoe le e 'ngoe le pheleu e ngoe le e 'ngoe, eo ho nyeheloang ka eona, khosana e tla etsa nyehelo ea koro e boima ba likilo tse leshome le metso e tšeletseng, le lilethara tse tharo tsa ole ea mohloaare.
25“ ‘Ho tloha ka letsatsi la leshome le metso e mehlano la khoeli ea bosupa, ka matsatsi a supileng a mokete, khosana e tla etsa nyehelo e tlosang sebe, le nyehelo ea secheso, le nyehelo ea lijo, le nyehelo ea ole ea mohloaare ka mokhoa o tšoanang.
