Taelo ea Siruse malebana le Tempele
1Khosi Dariuse a laela hore ho fuputsoe ka tlung ea libuka e Babilona, eo ho bōlōkoang matlotlo ka ho eona. 2Motseng oa Ahemeta, ka tlung ea khosi e naheng ea Bamede, ha fumanoa lengolo. Ho lona ho ne ho ngotsoe tjena:
3“Ka selemo sa pele sa puso ea hae, khosi Siruse a etsa taelo malebana le Tempele ea Molimo e Jerusalema. Taelo eo e ne e re: ‘Ho hahoe Tempele, e leng sebaka seo ho tla nyehelloa mahlabelo ho sona, 'me methèo ea eona e tiee. Bophahamo ba eona e be limethara tse mashome a mabeli a metso e supileng, bophara ba eona e be limethara tse mashome a mabeli a metso e supileng. 4Mabota a be le mela e meraro ea majoe, le mola oa mapolanka a entsoeng ka lifate tse ncha. Litšenyehelo tsa teng li ntšoe letlōleng la khosi. 5Thepa ea Tempele ea Molimo, e entsoeng ka khauta, le e entsoeng ka silefera, eo Nebukadenesare a neng a e nke ka Tempeleng e Jerusalema, a e isa Babilona, e khutlisetsoe Tempeleng e Jerusalema, e beoe litulong tsa eona, ka Tempeleng ea Molimo.’ ”
Karabo ea Dariuse
6Eaba Dariuse o ba araba ka lengolo, o re:
“Joale uena Tatenai, 'musisi oa naha e ka bophirimela ho nōka ea Euferatese, le uena Shetare-Bosenai, le metsoalle ea lōna, e leng bahlanka ba 'muso, ba ka bophirimela ho nōka ea Euferatese, le emelle thōko. 7Le se ke la 'na la kena-kenana le mosebetsi oa Tempele ea Molimo. Tlohelang 'musisi oa Bajuda le baholo ba Bajuda ba hahe Tempele ena ea Molimo setšeng sa eona.
8“Hape ke le laela seo le tšoanetseng ho se etsetsa baholo ba Bajuda, malebana le ho hahoa ha Tempele ena ea Molimo.
“Litšenyehelo tsa bona li ntšoe letlōleng la khosi, e leng lekhethong le tsoang ho baahi ba naha e ba bophirimela ho nōka ea Euferatese, e le hore mosebetsi o se ke oa khaotsa. 9Le se ke be la fosa: Ka letsatsi le leng le le leng le ba nee tseo ba li hlokang, e leng lipohoana, le lipheleu, le likonyana tsa ho etsetsa Molimo oa maholimo linyehelo tsa secheso; le ba nee le koro, le letsoai, le veine, le ole ho ea kamoo baprista ba Jerusalema ba kōpang kateng, 10e le hore ba tle ba etsetse Molimo oa maholimo mahlabelo a monko o monate, 'me ba tsebe ho rapella khosi le bara ba eona.
11“Ho feta moo, ke le laela hore mang kapa mang ea tla fetola taelo ena, ho rutloe balaka ea ntlo ea hae, a totomeloe ho eona, a thakhisoe ho eona, a leketle, 'me ntlo ea hae e fetohe qubu ea moiteli. 12Molimo ea khethileng Jerusalema hore a khumamelloe teng, a ke a timetse likhosi tsohle, le lichaba tsohle, tse tla kenya letsoho ho fetola kapa ho senya Tempele ena ea Molimo, e Jerusalema.
“Ea laelang joalo ke 'na, Dariuse. Taelo ena e phethoe ka ho tlala.”
Ho haha Tempele hoa qetoa
13Eaba bo-Tatenai, 'musisi oa naha e ka bophirimela ho nōka ea Euferatese, le Shetare-Bosenai, le metsoalle ea bona, ba phetha ka ho tlala tsohle tseo khosi Dariuse a ba laetseng tsona. 14Baholo ba Bajuda ba 'na ba tsoela pele ho haha, 'me ba atleha ho ea kamoo bo-moporofeta Hagai le Sakariea, mora oa Ido, ba neng ba ba khothatsa kateng. Ba haha Tempele, ba ba ba e qeta, ho ea ka taelo ea Molimo oa Iseraele, le ho ea ka litaelo tsa Siruse, le Dariuse, le Aretaseresese, likhosi tsa Peresiea. 15Ka letsatsi la boraro la khoeli ea Hlakubele, e leng ka selemo sa botšelela sa puso ea khosi Dariuse, Tempele ena ea qetoa ho hahuoa.
Tempele ea khakoloa
16Bana ba Iseraele, le baprista, le Balevi, le bohle ba neng ba thōpiloe, ba keteka mokete oa ho khakōla Tempele ea Molimo ka thabo. 17Moketeng ona oa ho khakōla Tempele ea Molimo, ba ile ba nyehela ka lipohoana tse lekholo, le ka lipheleu tse makholo a mabeli, le ka likonyana tse makholo a mane. Bakeng sa nyehelo e tlosang sebe sa Baiseraele bohle, ba nyehela ka liphooko tse leshome le metso e 'meli, ho latela palo ea merabe ea Iseraele. 18Ba hlophisa baprista ho ea ka lihlopha tsa bona, le Balevi ho ea ka mesebetsi ea bona, bakeng sa tšebeletso ea Molimo Jerusalema, joalokaha ho ngotsoe Bukeng ea Moshe.
Paseka
19Ka letsatsi la leshome le metso e mene la khoeli ea pele, ba neng ba thōpiloe ba etsa mokete oa Paseka. 20Baprista le Balevi ba itlhoekisa kaofela, 'me bohle ba hloeka. Balevi ba hlaba konyana ea Paseka, ba e hlabela bohle ba neng ba thōpiloe, le bana babo bona, e leng baprista, 'me le bona ba itlhabela eona. 21Paseka ea jeoa ke bana ba Iseraele ba neng ba thōpiloe, le ba ileng ba ikhaohanya le manyala a balichaba, hore ba sebeletse Morena Molimo ea Iseraele. 22Ba keteka mokete oa mahobe a sa lomosoang ka matsatsi a supileng, ba o keteka ka thabo. Morena o ne a ba thabisitse, a entse hore khosi ea Asure e ba rate, e ba thuse ho haha Tempele ea Molimo, Molimo oa Iseraele.
