Tumeliso
1'Na Paulosi, moapostola ea sa rōngoang ke batho, kapa ke motho, empa ea rōmiloeng ke Jesu Kreste le Molimo Ntate ea mo tsositseng bafung, 2'na le bana babo rōna bohle, re lumelisa likereke tsa Galatia, re re:
3Mohau le khotso ea Molimo Ntat'a rōna le ea Morena Jesu Kreste li ke li be le lōna. 4Kreste o itetse ka baka la libe tsa rōna, hore a tle a re lopolle lefatšeng lena le khopo, ho ea ka thato ea Molimo Ntat'a rōna. 5Tlōtla e ke e isoe ho eena kamehla le mehla. A ho be joalo!
Molaetsa o molemo o mong feela
6Ke makatsoa ke ha le phakisa ho furalla ea le bitsitseng ka mohau oa Kreste, 'me le ineela molaetseng osele. 7Hase hore ho teng o mong osele, empa ho teng ke batho ba le ferekanyang, ba ratang ho sokamisetsa molaetsa o molemo oa Kreste hosele. 8Empa ha e mong, leha e ka ba rōna kapa lengeloi le tsoang leholimong, a ka le bolella molaetsa o fapaneng le oo re le boleletseng oona, a ke a rōhakehe. 9Joalokaha re se re ile ra rialo pele, le joale ke sa boela ke rialo: Ha e mong a le bolella molaetsa o fapaneng le oo le o amohetseng, a ke a rōhakehe.
10Na ebe ke rialo ho khahlisa batho kapa Molimo? Na ebe ke batla ho thabisa batho? Hoja ke sa ntsane ke thabisa batho, nkabe ke se mohlanka oa Kreste.
Kamoo Paulosi e bileng moapostola kateng
11Bana beso, ke le tsebisa hore molaetsa o molemo oo ke o boletseng, hase o qapiloeng ke motho, 12hobane ha kea ka ka o neoa kapa ka o rutoa ke motho, empa ke o senoletsoe ke Jesu Kreste.
13Efela le utloile tsa metsamao ea ka ea mehleng e fetileng, ke sa le oa tumelo ea Sejuda, le kamoo ke 'nileng ka hlorisa Kereke ea Molimo hampe kateng, ke leka ho e felisa. 14Ke ne ke feta thaka tsa ka tse ngata tsa sechaba sa heso ka ho bōlōka tumelo ea Sejuda, ke boulela meetlo ea baholo-holo haholo. 15Empa eare ha ea nkhethileng ke sa le pōpelong ea 'mè, ea mpitsitseng ka mohau oa hae, a khahloa 16ke ho ntšenolela Mora oa hae, hore ke tle ke bolele molaetsa o molemo oa hae har'a balichaba, ka se ke ka batla keletso ho motho. 17Le teng, ha kea ka nyolohela Jerusalema ho bao e bileng baapostola pele ho 'na, empa ke ile ka ikela Arabia, ka nt'o khutlela Damaseka hape.
18Kamora' mona, hoba ho fete lilemo tse tharo, ka nyolohela Jerusalema ho ea tsebana le Kefase. Ka hlola le eena matsatsi a leshome le metso e mehlano, 19empa ha kea ka ka bona baapostola ba bang, haese Jakobo, ngoan'abo Morena. 20Molimo oa tseba hore tsena tseo ke le ngollang tsona hase leshano. 21Eaba ke ea linaheng tsa Siria le Silesia. 22Likereke tsa Kreste tse Judea li ne li e-s'o bone sefahleho sa ka; 23li ne li utloile feela ha ho thoe: “Ea neng a re hlorisa mehleng e fetileng, joale o bolela molaetsa o molemo oa tumelo eo a neng a leka ho e felisa.” 24Tsa tlotlisa Molimo ka baka la ka.
