Jakobo o fihla Harane
1Jakobo a tsoela pele leetong la hae, a ea fihla naheng ea baahi ba ka bochabela. 2Ha a talima, a bona seliba har'a thota, a bona mehlape e meraro ea linku e bothile pel'a sona, hobane mehlape eo e ne e noesoa selibeng seo. Lejoe le koahelang molomo oa seliba le ne le le leholo. 3Ha mehlape e bokane moo, balisana ba ne ba ee ba le phikolose, le tlohe molomong oa seliba, ba noese linku, ba boele ba le busetse litulong tsa lona, molomong oa seliba.
4Jakobo a re ho bona: “Bana beso, le tsoa kae?”
Bona ba araba, ba re: “Re tsoa Harane.”
5A re ho bona: “Na le tseba Labane, moa oa Nakore?”
Balisana ba re: “Rea mo tseba.”
6A re ho bona: “Na o ntse a phela hantle?”
Ba re: “O ntse a phela hantle. Bona, morali oa hae Ragele ke eo a e-tla le linku.”
7Jakobo a re: “Bonang mona, e sa le motšeare o moholo, ha e e-s'o be nako ea ho orosa mehlape; noesang linku, le tsamaee le e'o li fulisa.”
8Empa bona ba re: “Re sitoa ho etsa joalo, ho fihlela mehlape eohle e bokellana mona, ho phikolosoa lejoe, le tlosoa molomong oa seliba, ebe joale re tseba ho noesa linku.”
9Eare a sa ntsane a bua le bona, Ragele a fihla le linku tsa ntat'ae, hobane e ne e le molisana oa tsona. 10Ha Jakobo a bona Ragele, morali oa malom'ae Labane, le linku tsa malom'ae Labane, Jakobo a atamela, a phikolosa lejoe, a le tlosa molomong oa seliba, 'me a noesa linku tsa malom'ae Labane. 11Joale Jakobo a aka Ragele, a ba a lla. 12Jakobo a bolella Ragele hore ke seng le ntat'ae, le hore eena ke mora oa Rebeka. Ragele a matha, a ea tsebisa ntat'ae.
13Eare ha Labane a utloa litaba tsa Jakobo mochan'a hae, a matha ho ea mo khahlanyetsa, a mo kopa molaleng, a mo aka, a mo isa ka tlung ea hae. Jakobo a bolella Labane tsena tsohle, 14'me Labane a re ho eena: “Ruri u lesapo la ka le nama ea ka!” Jakobo a hlola le eena khoeli kaofela.
15Eaba Labane o re ho Jakobo: “Kaha u mochana oa ka, na u ka ntšebeletsa feela? Mpolelle: ke u lefe bokae?” 16Joale Labane o ne a e-na le barali ba babeli; lebitso la e moholo e ne e le Lea, 'me lebitso la e monyenyane e le Ragele. 17Mahlo a Lea a ne a le bolea, empa Ragele o ne a bōpehile hantle, a le motle haholo.
18Jakobo o ne a rata Ragele, 'me a re: “Ke tla u sebeletsa ka lilemo tse supileng, ke sebeletsa ho fumana Ragele, morali oa hao e monyenyane.”
19Eaba Labane o re: “Ho molemo hore ke mo nee uena, ho e-na le ho mo nea monna osele. Lula le 'na he.” 20Jakobo a sebeletsa bohali ba Ragele ka lilemo tse supileng, empa ka baka la lerato leo a neng a rata Ragele ka lona, lilemo tseo tsa ka litšiu tse seng kae.
Jakobo oa nyala
21Joale Jakobo a re ho Labane: “'Nee mosali oa ka, ke kene likobong tsa hae, hobane nako ea ka e phethehile.”
22Eaba Labane o mema banna bohle ba sebaka seo, o etsa mokete oa lenyalo. 23Ka phirimana Labane a nka morali oa hae Lea, a mo isa ho Jakobo, 'me eena a kena likobong tsa hae. 24Labane a nka lekhabunyane la hae Silepa, a le nea morali oa hae Lea, hore e be lekhabunyane la hae.
25Eare ha bo e-sa, ho bonahala hore ke Lea, Jakobo a re ho Labane: “Ke eng ee, eo u nketselitseng eona? Na ha ke u sebeletsa, ke ne ke sa sebeletse hore u 'nee Ragele? Joale u nthetselitse'ng?”
26Labane a re: “Mona haeso hase moetlo hore e monyenyane a nyaloe pele ho e moholo. 27Qeta beke le enoa, 'me u tla neoa le eno e mong, feela u ntšebeletse hape ka lilemo tse ling tse supileng, tseo u tla ntšebeletsa ka tsona.”
28Jakobo a lumela, a qeta beke ea enoa, Labane, a nt'o mo nea morali oa hae Ragele, hore e be mosali oa hae. 29Labane a nka lekhabunyane la hae Bileha, a le nea morali oa hae Ragele, hore e be lekhabunyane la hae. 30Jakobo a kena likobong tsa Ragele, 'me a rata Ragele ho feta Lea. A boela a sebeletsa Labane ka lilemo tse ling tse supileng.
Bana ba Jakobo
31Ha Morena a bona hore Lea ha a ratoe, a mo fa thari, empa Ragele ea e-ba nyopa. 32Lea ea e-ba moimana, a tsoala mora, 'me a mo rea lebitso la Rubene, hobane o ne a re: “Ruri Morena o bone matšoenyeho a ka, 'me joale monna oa ka o tla nthata.”
33Ea e-ba moimana hape, a tsoala mora, 'me a re: “Ruri Morena o utloile hore ha ke ratoe, 'me o mphile mora enoa hape.” Eaba o mo rea lebitso la Simeone.
34Ea boela ea e-ba moimana, a tsoala mora, 'me a re: “Joale monna oa ka o tla nkhomarela, hobane ke mo tsoaletse bara ba bararo.” Ka baka lena, enoa a mo rea lebitso la Levi.
35Ea boela ea e-ba moimana hape, a tsoala mora, 'me a re: “Joale ke tla boka Morena.” Ka baka lena, a mo rea lebitso la Juda; eaba o khaotsa ho beleha.
