Nōha e èka mosali
1Nōha e ne e le masene ho feta liphoofolo tsohle tsa naha, tseo Morena Molimo a li entseng. Eaba e re ho mosali: “Na efela Molimo o itse: ‘Le se ke la ja lifate tsohle tse serapeng’?”
2Mosali a araba nōha, a re: “Re ka ja litholoana tsa lifate tse serapeng, 3empa ha e le litholoana tsa sefate se bohareng ba serapa, Molimo o itse: ‘Le se ke la li ja, le ho li thetsa le se ke la li thetsa, esere la shoa.’ ”
4Joale nōha ea re ho mosali: “Ruri ha le ka ke la shoa! 5Molimo o tseba hore mohla le ka se jang, mahlo a lōna a tla tutuboloha, le tšoane le Molimo, le tsebe botle le bobe.”
6Mosali a elelloa hore sefate seo se ka jeoa, se bile se khahla mahlo; le hore sea lakatseha, hobane se hlalefisa motho. Eaba o khōla tse ling tsa litholoana tsa sona, oa li ja; a ba a fa le monna oa hae, le eena a ja. 7Mahlo a bona bobeli a tutuboloha, 'me ba elelloa hore ha baa tena letho. Ba rokahanya mahaba a sefate sa feiee, ba iketsetsa meitlamo.
Molimo o ahlola motho
8Joale ba utloa ha Morena Molimo a bua, a ntse a tsamaea har'a serapa, moeeng o mapholi oa mantsiboea. Monna le mosali oa hae ba ipatela Morena Molimo har'a lifate tsa serapa. 9Morena Molimo a bitsa monna, a re ho eena: “U hokae na?”
10Monna a arabela, a re: “Ke ile ka utloa ha u ntse u tsamaea mona serapeng, ka tšaba, hobane ha kea tena letho, 'me ka ipata.”
11Joale Molimo a re: “Ke mang ea u boleletseng hore ha ua tena letho? Na u jele sefate seo ke u laetseng hore u se ke ua se ja?”
12Monna a re: “Mosali eo u 'neileng eena, hore a be le 'na, o mphile tse tsoang sefateng, 'me ka fela ka ja.”
13Joale Morena Molimo a re ho mosali: “Ke eng ee, eo u e entseng?”
Mosali a re: “Nōha e ile ea nqhekella, 'me ka fela ka ja.”
14Morena Molimo a re ho nōha:
“Har'a makhomo 'ohle,
le liphoofolo tsohle tsa naha,
u rohakehile,
kahobane u entse sena!
U tla hōlōba ka mpa ea hao,
u je lerōle ka matsatsi 'ohle
a ho phela ha hao.
15Ke tla hlahisa bōra
pakeng tsa hao le mosali,
le pakeng tsa malinyane a hao
le bana ba hae.
Bana ba hae
ba tla khoba hlooho ea hao;
uena u tla ba lōma serethe.”
16A re ho mosali:
“Ha u ithoetse,
ke tla u atisetsa bohlōkō.
U tla beleha bana ka bohlōkō,
u lakatse monna oa hao,
'me eena a u buse.”
17Joale ho Adama a re:
“Kahobane u mametse polelo
ea mosali oa hao,
ua ja sefate seo ke ileng ka u laela,
ka re: ‘U se ke ua se ja,’
mobu o rohakehile ka baka la hao.
U tla ja tse tsoang ho oona
ka ho sebetsa ka thata,
ka matsatsi 'ohle a ho phela ha hao.
18Mobu oo
o tla u melisetsa meutloa,
o u melisetse le tšehlo,
u je meroho ea naha.
19U tla ja bohobe
ka mofufutso oa phatla ea hao,
ho fihlela u boela mobung,
hobane u ntšitsoe mobung,
u lerōle,
'me u tla boela lerōleng!”
20Monna a rea mosali lebitso la Eva, hobane ke eena 'm'a batho bohle ba phelang. 21Eaba Morena Molimo o etsetsa Adama le mosali oa hae liaparo tsa matlalo, a ba apesa.
Motho o lelekoa serapeng sa Edene
22Morena Molimo a re: “Bonang, motho o se a tšoana le e mong oa rōna, ka ho tseba botle le bobe! Joale a se tšohe a otlolla letsoho la hae, a khōla le sona sefate sa bophelo, a e-ja, 'me a phela kamehla eohle!” 23Eaba Morena Molimo o mo ntša serapeng sa Edene, hore a e'o lema mobu oo a ntšitsoeng ho oona. 24A leleka motho. Ka bochabela ho serapa sa Edene a bea likerubime, le sabole e tukang malakabe, e tsokotsehelang ka nq'a tsohle, ho lebela tsela e eang sefateng sa bophelo.
