Josefa o hlalosa toro ea Faro
1Kamora' hoba lemo tse peli li fete, Faro a lora, 'me a ipona a eme pel'a nōka. 2A bona likhomo tsa lithole tse supileng, tse ntle, tse nonneng, li nyoloha nōkeng, li ntse li fula mohlakeng. 3A boela a bona lithole tse ling tse supileng, tse mpe, tse otileng, li nyoloha nōkeng kamora' tseo, li ema pel'a tse lebōpong. 4Eaba likhomo tse mpe, tse otileng, li koenya likhomo tse ntle, tse nonneng. Joale Faro a phaphama.
5A boela a khaleha, a lora khetlo la bobeli, 'me a bona liqoapi tse supileng tsa koro, tse tenya, tse ntle, li mela lehlakeng le le leng. 6Kamora' tseo ha mela tse supileng, tse manneng, tse phutsisitsoeng ke moea oa bochabela. 7Eaba liqoapi tse manneng li koenya liqoapi tse tenya, tse nonneng. Faro a boela a phaphama, 'me a hlokomela hore oa lora.
8Hoseng a tsoha moea oa hae o tšoenyehile; a re ho latoe linōhe tsohle tsa Egepeta, le bahlalefi bohle ba hona teng. Faro a ba phetela toro ea hae, empa ha se ke ha e-ba le ea mong ea ka mo hlalosetsang eona.
9Joale moqhatsetsi e moholo a bua le Faro, a re: “Kajeno ke hopola liphoso tsa ka. 10Mohla Faro a neng a halefetse bahlanka ba hae, a na a nkenya chankaneng, tlung ea mookameli oa balebeli ba chankana, ke e-na le moapehi e moholo. 11Ka bosiu bo bong, rōna le eena ra lora toro; e mong le e mong a lora toro ea hae, e nang le tlhaloso ea eona. 12Mohlankanyana oa Moheberu, eo e neng e le mosebeletsi oa mookameli oa balebeli ba chankana, o ne a e-na le rōna. Ra mo phetela litoro tsa rōna, 'me a re hlalosetsa tsona, a hlalosetsa e mong le e mong ho ea ka toro ea hae. 13Joalokaha a ile a re hlalosetsa, ho ile ha etsahala joalo; 'na ke ile ka khutlisetsoa mosebetsing oa ka, 'me moapehi eena o ile a fanyehoa.”
14Faro a re ho tlisoe Josefa, 'me ba phakisa ba mo ntša chankaneng. Josefa a beola litelu, a apara liaparo lisele, eaba o tlisoa kapele ho Faro.
15Faro a re ho Josefa: “Ke lorile toro, 'me ha ho le ea mong ea ka e hlalosang, empa ke utloile ho thoe uena ha u utloa toro, u ee u e hlalose.”
16Josefa a arabela Faro, a re: “Hase 'na; ke Molimo ea tla senolela Faro tse molemo.”
17Eaba Faro o re ho Josefa: “Bona, torong ea ka ke ne ke eme lebōpong la nōka. 18Ka bona lithole tse supileng, tse ntle, tse nonneng li nyoloha lōkeng, li ntse li fula mohlakeng. 19Ka boela ka bona lithole tse ling tse supileng li li latela; li tšèrèma, li le mpe haholo, li otile. Naheng eohle ea Egepeta ha ke e-s'o bone tse joaloka tsona ka bobe. 20Lithole tse mpe, tse otileng, tsa koenya lithole tsa pele tsa supileng, tse nonneng, 21empa hoba li li koenye ho ne ho sa bonahale hore li kile tsa li koenya, hobane li 'nile tsa sala li le mpe joaloka pele. Eaba kea phaphama.
22“Ka boela ka lora ke bona liqoapi tse supileng li mela lehlakeng le le leng, li le tenya, li le ntle. 23Ka bona hape liqoapi tse supileng, tse ponneng, tse manneng, tse phutsisitsoeng ke moea oa bochabela, li mela kamorao ho tsena. 24Eaba liqoapi tse manneng li koenya tse supileng, tse ntle. Ke ile ka phetela linōhe, empa ha ho le se seng se ka ntlhalosetsang.”
25Eaba Josefa o re ho Faro: “Litoro tsena tsa Faro ke ntho e le 'ngoe; Molimo o senoletse Faro seo a leng lekhatheng la ho se etsa.
26“Likhomo tse supileng, tse ntle, ke lilemo tse supileng; le liqoapi tse supileng, tse ntle, ke lilemo tse supileng, 'me toro tsena ke ntho e le 'ngoe. 27Likhomo tse supileng, tse otileng, tse mpe, tse ileng tsa nyoloha kamora' tsona, ke lilemo tse supileng; le liqoapi tse supileng, tse manneng, tse phutsisitsoeng ke moea oa bochabela, e tla ba lilemo tse supileng tsa tlala.
28“Ke sona seo ke se boleletseng Faro, ha ke re: ‘Molimo o bontšitse Faro seo a leng lekhatheng la ho se etsa.’
29“Bona, lilemo tse supileng tsa nala e kholo li tla tla naheng eohle ea Egepeta. 30Kamorao ho tsona ho tla fihla lilemo tse supileng tsa tlala, 'me nala eohle e tla lebaloa naheng ea Egepeta. Tlala ena e tla senya naha ena, 31'me nala e ke ke ea hlola e tsejoa naheng ena ka baka la tlala e tla latela, hobane e tla ba kholo haholo.
32“Ho ipheta ha toro ena ea Faro ho bolela hore ntho ena Molimo o e tiisitse, 'me haufinyane Molimo o tla e phethahatsa.
33“Joale eka khona Faro a batle monna ea bohlale, ea masene, a okamele naha ea Egepeta. 34Faro a ke a etse tjena: a khethe baokameli holim'a naha ena, 'me ba nke karolo e le 'ngoe ho tse hlano tsa kotulo ea naha ea Egepeta, lilemong tsena tse supileng tsa nala. 35Ba phuthe lijo tsohle tsa lilemo tsena tsa nala tse tlang, ba bōkelle koro e be tlas'a taolo ea Faro, 'me ba e bōlōke, e tle e be lijo metseng. 36Lijo tseo li bōlōkeloe lilemo tse supileng tsa tlala e tla oela naha ea Egepeta, e le hore naha ena e se ke ea timetsoa ke tlala.”
Josefa o etsoa 'musi oa Egepeta
37Keletso ena ea khahla Faro, ea khahla le bahlanka ba hae bohle. 38Eaba Faro o re ho bahlanka ba hae: “Na re ka fumana monna ea kang eo; monna eo moea oa Molimo o leng teng ka ho eena?”
39Faro a re ho Josefa: “Kaha Molimo a u senoletse tsena tsohle, ha ho ea masene, le ea bohlale joaloka uena. 40U tla okamela lelapa la ka.
“Sechaba sa ka sohle se tla hlompha litaelo tsa hao, 'me 'na ke tla u feta feela ka ho lula teroneng.”
41Faro a re ho Josefa: “Bona, ke u beile holim'a naha eohle ea Egepeta.”
42Joale Faro a ntša lesale la hae la monoana, a le kenya monoaneng oa Josefa; a mo apesa liaparo tse entsoeng ka lesela la lene, 'me a mo roesa sekhama sa khauta molaleng. 43A mo palamisa kariking e hlahlamang ea hae, 'me batho ba hooa, ba re: “Suthang!”
Ka mokhoa o joalo a 'mea holim'a naha eohle ea Egepeta.
44Faro a re ho Josefa: “Ke 'na Faro! Kantle ho tumello ea hao ha ho motho ea tla phahamisa letsoho kapa leoto naheng ea Egepeta.” 45Faro a rea Josefa lebitso la Safenate-Paniea, 'me a mo nyalisa Asenate, morali oa Potifera, moprista oa One. Josefa a ea lekola naha eohle ea Egepeta.
46Josefa o ne a e-na le lilemo tse mashome a mararo ha a kena tšebeletsong ea Faro, khosi ea Egepeta. Josefa a tloha ho Faro, a potoloha le naha eohle ea Egepeta.
47Ka lilemo tsena tse supileng tsa nala, lefatše la e-ba le chai e kholo, 48'me Josefa a bōkella lijo tsohle tsa lilemo tseo tse supileng, tse neng li le teng naheng ea Egepeta, a li bōlōka metseng. Lijo tse tsoang masimong a motse o mong le o mong a li bōlōka motseng oo. 49Josefa a bōkella koro e ngata haholo, joaloka lehlabathe la leoatle, ho fihlela a khaotsa ho e bala, hobane e ne e ke ke ea baloa.
50Pele selemo sa tlala se fihla, Josefa a ba le bara ba babeli bao a ileng a ba tsoalloa ke Asenate, morali oa Potifera, moprista oa One. 51Josefa a rea letsibolo la hae lebitso la Manase, hobane o ne a re: “Molimo o ntebalitse matšoenyeho a ka 'ohle, le lelapa lohle la ntate.”
52Oa bobeli a mo rea lebitso la Efraime, hobane o ne a re: “Molimo o mphile bana lefatšeng la matšoenyeho a ka.”
53Eaba lilemo tsa nala, tse neng li le teng naheng ea Egepeta, lia feta, 54'me lilemo tse supileng tsa tlala tsa qala ho fihla joalokaha Josefa a ne a boletse. Tlala ea e-ba teng linaheng tsohle, empa naheng eohle ea Egepeta lijo li ne li le teng. 55Ha naha eohle ea Egepeta e se e lapa, sechaba sa llela Faro hore a se fe lijo, 'me Faro a re ho Baegepeta bohle: “E-eang ho Josefa, le etse seo a le bolellang sona.”
56Ha tlala e se e aparetse lefatše lohle, Josefa a bula lisiu tsohle, 'me a rekisetsa Baegepeta koro, hobane tlala e ne e le kholo naheng ea Egepeta. 57Linaha tsohle tsa tla Egepeta, ho Josefa, ho reka koro, kaha lefatše lohle le ne le aparetsoe ke tlala ea bo-ja-likata.
