Molimo Ntat'a rōna oa re khalemela
1Ha e le mona re aparetsoe ke leru la lipaki le lekana-kana, le rōna a re lahleng tsohle tse re sitisang, le sebe se re khomaretseng, 'me re mathe ka tiisetso peisong eo re e beetsoeng. 2Re talimeng ho Jesu, moqali le mophethahatsi oa tumelo ea rōna. Ke eena eo, ka baka la thabo eo a neng a e lebeletse, a ileng a mamella mahlōkō a sefapano, a se ke a natsa ho tlontlolloa ka sona, 'me joale o lutse ka letsohong le letona la terone ea Molimo. 3Nahanang ea ileng a mamella likhanyetso tse kaalo-kaalo tsa baetsalibe, esere la nyahama lipelo, la khathala.
4Ntoeng ea lōna le sebe ha le e-s'o loane hoo mali a ka tšolohang, 5'me le se le lebetse mantsoe a khothatsang, a builoeng ho lōna le le bana ba Molimo, a reng:
“Mora oa ka,
se nyelise khalemelo ea Morena,
se khathale ha a u laea;
6hoba Morena o khalema
eo a mo ratang,
o shapa mora e mong le e mong
eo a mo amohelang.”
7Mamellang matšoenyeho e le khalemelo ea Molimo ea le nkang le le bana ba hae. Ana ke mora ofe eo ntat'ae a sa mo khalemeleng? 8Empa haeba le sa lumele ho khalemeloa joaloka bana bohle, ha le bana ba hae, le bana ba matšèho. 9Hape-hape re bile le bo-ntat'a rōna ba lefatše, ba ileng ba re khalemela, 'me ra ba hlompha; na joale ha re lokele ho ikokobeletsa Ntat'a rōna oa moea ka ho fetisisa, re tle re phele? 10Bo-ntat'a rōna ba re khalemetse ka nakoana feela, kamoo ba neng ba bona kateng, empa Molimo o re etsetsa molemo ka ho re khalemela, hore re tle re be le kabelo khalalelong ea hae. 11Khalemelo e 'ngoe le e 'ngoe ha e etsoa ha e thabise, e bohlōkō, empa hamorao bao e ba thapisitseng, e ba tlisetsa litholoana tsa khotso, tsa ho loka.
12Ka baka leo, phahamisang matsoho a lōna a khathetseng, le matlafatse mangoele a lōna a rerekelang. 13Tsamaisang maoto a lōna litseleng tse otlolohileng, e le hore leoto le hlotsang le tle le se ke la nonyetseha, le mpe le fole.
Se furalleng mohau oa Molimo
14Pheellang ho phela le bohle ka khotso le ka khalalelo, hobane ntle ho eona ha ho ea tla bona Morena. 15Hlokomelang hore ho se be ea furallang mohau oa Molimo, esere ha mela sebabane se seng se ferekanyang, 'me sa silafatsa ba bangata. 16Ho se be mang kapa mang eo e leng sehlola, kapa ea sa tšabeng Molimo joaloka Esau, eena ea neng a fane ka litokelo tsa boholo ba hae ba tsoalo ho reka mothangoana oa sejo. 17Lea tseba kamoo hamorao, ha a ne a lokela ho neoa tlhohonolofatso, a ileng a lahloa kateng, hobane o ne a sitoa ho etsolla seo a neng a ile a se etsa, leha a ne a leka ho etsa joalo ka meokho.
18Lōna ha lea tla thabeng e ka angoang ka matsoho, e tukang malakabe, e lefifi, e ntšo, e har'a sefefo, 19moo ho llang terompeta, ho utloahalang le lentsoe la ea buang. Ba neng ba le utloa ba ile ba ikōpela hore le mpe le khaotse. 20Ba ne ba ke ke ba mamela taelo e reng: “Esita le phoofolo ha e ka thetsa thaba, e tla tlepetsoa ka majoe.” 21Pono eo e ne e tšabeha hoo Moshe a ileng a re: “Ke tšohile, kea thōthōmela.”
22Empa le tlile thabeng ea Sione, motseng oa Molimo ea phelang, e leng Jerusalema ea leholimo, le ho likete-kete tsa oona tsa mangeloi. 23Le tlile phuthehong ea matsibolo ao mabitso a 'ona a ngotsoeng bukeng ea leholimo; le tlile le ho Molimo, moahlōli oa batho bohle, le ho meea ea ba lokileng, ba fihletseng phetheho. 24Le tlile ho Jesu, 'moelanyi oa Molimo le batho ka selekane se secha, eo mali a hae a hloekisang, a buang ka matla ho feta mali a Abele.
25Hlokomelang, le se ke la hana ho mamela ea buang. Baiseraele ba ileng ba hana ho mamela, ha a ba lemosa a le lefatšeng, ha baa ka ba phonyoha. Joale ebe rōna re ka phonyoha joang, haeba re furalla ea re lemosang a le leholimong? 26Mohlang oo lentsoe la hae la na la reketlisa lefatše, empa kajeno o boletse hona, a re: “Ke sa tla boela ke reketlisa lefatše hanngoe hape; e seng lona feela, empa le lona leholimo.” 27Joale mantsoe ana, “hanngoe hape”, a bolela ho tlosoa ha lintho tse ka sisinngoang, tse bōpiloeng, hore ho tle ho sale tse ke keng tsa sisinngoa.
28Kaha re amohela 'muso o ke keng oa sisinngoa, a re leboheng, re sebeletse Molimo ka mokhoa o khahlisang, ka tšabo le hlompho, 29hobane Molimo oa rōna ke mollo o chesang lore!
