HOSEA 11

₁“Ke ratile Iseraele

e sa le lesea,

ka bitsa mor'a ka

hore a tsoe Egepeta.

₂Ha ke ntse ke pheeletse

ho ba bitsa khafetsa,

ba 'na ba suthella thōko ho 'na;

ba nyehella bo-Baale ka mahlabelo,

ba chesetsa melingoana mokubetso.

₃Ke 'na ea rutileng Efraime,

ka mo ruta ho tataea,

ka mo nenesa ka letsoho la ka;

empa ha baa ka ba ela hloko

hore ke 'na ea ba hlokometseng.

₄Ke ne ke ba hula

ka khoele tsa mohau,

ke ba hula ka mehal'a lerato;

ka tlosa joko molaleng oa bona,

ka inamela fatše, ka ba fepa.

₅“Ba tla khutla

ba khutlele naheng ea Egepeta,

ba busoe ke khosi ea Asiria,

hobane ba hanne ho khutlela ho 'na.

₆Sabole e tla tsèkèma

har'a metse ea bona,

e robe mekoallo ea likhoro tsa bona,

merero ea bona eohle e e nyopise.

₇Chaba sa ka

se itheretse ho mphuralla;

leha se ka ipiletsa

ho Ea Holimo-limo,

ha a ka ke a b'a se hlomamisa hape.

₈“Uena Efraime, nka u lahla joang?

Uena Iseraele,

ka neelana ka uena joang?

Nka u timetsa sa Adema joang?

Ka u etsisa Seboime joang?

Pelo ea ka e nkhanela ho etsa joalo,

lerato la ka lea hlasimoloha.

₉Nke ke ka phetha tsa khalefo ea ka,

nke ke ka timetsa Efraime hape,

hoba 'na ke Molimo, ha ke motho;

ke Ea Halalelang ea lulang har'a lōna,

ha nka ke ka tla ke halefile.

₁₀Etlare ha Morena a puruma sa tau,

chaba sa hae se mo sale morao;

etlare ha a puruma,

bana ba hae ba tle,

ba tle ba thōthōmela,

ba e-tsoa bophirima.

₁₁Ba tla pakasela sa nonyana e fōfa,

ba pakasele ba e-tsoa Egepeta,

ba pakasele sa leeba ba e-tsoa Asiria,

ke ba ahise matlung a bona,”

₁₂Efraime o nteetse hare,

a nteela hare ka mashano,

ba ntlo ea Iseraele bona ka thetso;

Juda eena o nts'a fetohetse Molimo,

Molimo ea tšepahalang,

Molimo ea halalelang.