ESAEA 16

₁Thellang 'musi oa naha

ka ho romela likonyana,

li rōmeloe li e-tsoa Sela,

mose oane ho lehoatata,

li rōmeloe thabeng

ea morali oa Sione.

₂Barali ba Moabe

ha ba le malibohong a Arenone,

ba ka nonyana tse phuphuselang,

li lelekiloe sehlaheng sa tsona.

₃“Re eletse, u re etsetse qeto,

moriti oa hao

o re sireletse motšeare,

sa fifi la bosiu;

pata ba lelekiloeng,

u se eke baphaphathehi.

₄E-ba setšabelo sa Bamoabe,

Bamoabe ba lelekiloeng,

u ba sireletse ho ea ba timetsang.”

Motlatlapi o tla khaotsa ho tlatlapa,

mosenyi eena a khaotse ho senya,

mohatelli le eena

a felisoe naheng eo.

₅Ka mohau terone e tla tsitsisoa,

ea tla e lula a e lule ka botšepehi,

e leng e mong oa lelōko la Davida,

ea tla ahlōla ka toka,

a thahaselle ho loka.

₆Re utloile hore Moabe oa ikhantša,

ho ikhantša ha hae

ke ho tlōlang moeli,

oa ikakasa, oa ikhantša, o bohale,

empa boithoriso ba hae

ke ba lefeela.

₇Kahoo chaba sa Moabe

se tla itelela,

bohle ba itelele ba le 'moho,

ba llela lijo tse monate

tsa Kire-Herese,

ba lla pelo tsa bona li le bohlōkō.

₈Masimong a Heshebone le a Sibema

morara o ponne,

o motle-motle

o neng o taha babusi ba naha,

morara o neng o lemiloe

ho tloha Jasere,

o lemiloe ho ea fihla lehoatateng,

oo makala a oona

a neng a thathaletse,

ho ea tšela leoatle.

₉Ke llela morara oa Sibema

joalokaha Jasere e llela oa eona,

uena Heshebone le uena Elale

ke le tšèla ka likhapha!

Mehoo e thabelang ho butsoa

ha morara oa lōna,

le e thabelang kotulo ea lōna

e khaolitse.

₁₀Masimong a likhoiti

thabo le monyaka ha li sa le eo,

ha ho pina kapa mehoo

masimong a lōna a morara,

ha ho ea tlhōtlelang veine

tlhōtlelong sa hae,

hoba mehoo ea lōna

ke 'na ea a felisitseng.

₁₁Pelo ea ka e llela Moabe sa harepa,

le eona Kire-Herese e e llela joalo.

₁₂Ha Bamoabe ba nyolohela

bakeng tsa bona tsa borapeli,

ba nyolohela lefeela;

ha ba nyolohela tempeleng ea bona

ho ea rapela,

le teng ha ho na thuso.