ESAEA 3

₁Bonang Morena,

Moren'a mabōtho,

o khatheng la ho amoha

Jerusalema le Juda,

tsohle tseo le iphelisang ka tsona,

a li amohe lijo tsohle

le metsi 'ohle.

₂O tla li amoha

mohale le mohlabani,

moahlōli le moporofeta,

senohe le moholo oa sechaba;

₃le molaoli oa bahlabani le lehosana,

moeletsi le setsebi sa mesebetsi

le ea hlalefetseng ho upella.

₄Baokameli ba bona

e tla ba bashanyana,

tlokotsebe tsa bana

e be babusi ba bona.

₅Batho bohle ba tla hatellana,

motho ka mong a hatelle e mong,

ba ahisaneng le bona ba hatellane.

Bacha ba tla tsohela

baholo ba bona matla,

ba eisehang ba tsohele

batlotlehi matla.

₆Motho o tla tšoara

e mong oa bana babo,

a mo tšoare

a le lapeng labo, a re:

“U na le seaparo,

e-ba 'musi oa rōna,

masupi ana a ke a busoe ke uena!”

₇Mohlang oo eo o tla meketsa, a re:

“Ha nka ke ka ba pheko ea lōna,

lapeng ha ka

ha ke na lijo le seaparo,

u ke ke ua nketsa, musi,

'musi oa chaba sena!”

₈Jerusalema e khothometsehile,

Juda eona e se e putlame fatše;

polelo le ketso tsa tsona

li fetohetse Morena,

li khopisa mahlo a tlotlehang a hae.

₉Fahleho tsa tsona lia li qosa,

li ipoletse sebe sa tsona

joaloka Sodoma,

le ho se pata li sitoa ho se pata.

Li malimabe hakaakang!

Koluoa ena li imemetse eona!

₁₀Tsebisa ba lokileng

hore tsohle li tla loka

ba tla ja litholoana

tsa mesebetsi ea bona.

₁₁Ho malimabe ba khopo,

hobane koluoa

e tla ba oela holima,

ba putsoe

ho ea ka mesebetsi ea bona.

₁₂Bacha ba hatella chaba sa ka,

basali ke bona babusi ba sona;

chaba sa ka,

balisa ba lōna baa le khelosa,

ba le faposa tseleng ea lōna.

₁₃Morena oa ema,

o bolela qōso ea hae,

oa ema, o ahlōla lichaba.

₁₄Morena o qōsa baholo

ba chaba sa hae

o qōsa le babusi ba sona, o re:

“Tšimo ea ka ea morara

e lobetsoe ke lōna,

matlo a lōna

a tletse tse amohiloeng mafutsana.

₁₅Ke ka baka la'ng

ha le hatakela sechaba sa ka,

mafutsana le 'ona le a tlatlapa?”

ho rialo Morena, Moren'a mabōtho.

₁₆Morena o re:

“Basali ba Sione baa ikhōhōmōsa,

ba tsamaea melala ba e thamotse,

ka mahlo a bona ba ntse ba bonya,

ba roanyaketsa, ba hatela haufi,

maqaqailana a bona a lla masekana.

₁₇Kahoo Morena

o tla khōphosa hlooho tsa bona,

hlooho tsa bona

a li phumole mafatla.”

₁₈Mohl'a tsatsi leo,

Morena o tla ba amoha mekhabiso:

mefitšane le meqhaka

le lifaha tsa molala;

₁₉masale, lipetja le 'ona masira;

₂₀le likōla, le lithōthō, le linyepa,

le libotlolo tsa litlolo, le lithatho;

₂₁le masale a monoana

le masale a linkong,

₂₂le liaparo tse majabajaba,

le litipe, le mekotlana;

₂₃le liipone, le liaparo tsa lene,

le lituku le litjale.

₂₄Bakeng sa monko o monate

ho tla nkha phu!

Bakeng sa senyepa e be lerapo,

bakeng sa moriri o lōhiloeng

ba phumohe mafatla,

bakeng sa aparo tse ntle

e be tse mahoashe,

bakeng sa fahleho tse borethe

e be tse mabali.

₂₅Banna ba lōna

ba tla bolaoa ka sabole,

e leng bona bahale ba lōna ntoeng.

₂₆Menyako ea Sione e tla lla,

e bokolle,

Sione e rapalle fatše,

e fetohe lesupi.