ESAEA 41

₁“Lōna lihlekehleke

khutsang kapele ho 'na!

Lichaba a li ke li imatlafatse!

A li ke li atamele li bue,

re kopaneng 'moho

tulong sa kahlōlo.

₂“Ea tsoang bochabela

o il'a tlisoa ke mang,

eena ea hlōlang hohle

moo a eang teng?

Ea mo neileng matla

a ho hlōla lichaba ke mang,

hore a hatakele likhosi

tse mo emang kapele?

O li fekefa ka sabole,

a li fetole lerōle,

ka seqha sa hae

a li fefole sa 'mōkō!

₃Oa li phalalisa,

a tsoe a se na mongoapo,

a potlake hoo

ekang le mobu h'a sa o hata!

₄Ea entseng hore tsee li etsahale

ke mang?

Ea bitsitseng melōkō

ho tloha tšimolohong

ke mang?

Ke 'na Morena,

ebile ke 'na oa ho qala,

ke 'na Morena

ea tla ba le ba ho qetela.”

₅Ba lihlekehlekeng ba ile ba bona,

'me ba kenoa ke tšabo,

ba pheletsong tsa lefatše

bona ba thōthōmela,

eaba baa tla, ba atamelana,

₆motho ka mong

o thusana le mohahabo,

motho ka mong

o re ho ngoan'abo: “Matlafala!”

₇Kahoo sebetli

se khothatsa lelala la khauta,

ea photlang ka noto

o khothatsa sefuthi,

o re ho sona: “E kopane hantle!”

O khokhothela molimo oa bohata

ka lipekere, e le hore o tiee,

o se ke oa ketoha.

₈“Empa uena Iseraele,

u leng mohlanka oa ka,

uena Jakobo,

eo ke mo khethileng,

uena tlōhōlō sa Aborahama,

motsoalle oa ka,

₉ke u latile pheletsong tsa lefatše,

ka u bitsa

u le qoleng tse hōle tsa lona,

ka re ho uena:

‘U mohlanka oa ka,’

ke ikhethetse uena,

ha kea u lahla.

₁₀U se ke ua tšaba,

hobane ke na le uena,

u se tsielehe,

hobane ke Molimo oa hao.

Ke tla u matlafatsa,

ke be ke u thuse,

ke u tšehetse

ka tsoho la ka le letona,

ka tsoho le letona

le etsang ho loka.

₁₁“Batho bohle ba u halefelang

ba tla tlontloloha,

ba apareloe ke lihlong;

batho bohle

ba loantšanang le uena

ba tla fetoha lefeela,

ba be ba timele.

₁₂Leha u ka tsoma lira tsa hao,

ha u ka ke ua b'a li fumana.

Batho ba u futuhelang ka ntoa

ba tla tšoana le lefeela-feelane,

₁₃hoba ke 'na Morena,

Morena Molimo oa hao,

ea utlang tsoho la hao le letona,

ea reng: ‘Se tšabe,

'na ke tla u thusa.’

₁₄“U se ke ua tšaba,

uena Jakobo, sebōkōnyana,

uena Iseraele oa motoantoanyane;

ke 'na ea tla u thusa,”

ho rialo Morena,

Molopolli oa hao,

Ea Halalelang oa Iseraele.

₁₅“Bona, ke tla u etsa selei

se phōphōthang, se secha,

se nang le meno a nchocho.

U tla thua lithaba,

u li phōphōthe,

maralla 'ona u a sile, a ke 'mōkō;

₁₆tsena u tla li olosa,

moea o li fefole,

sefefo se matla se li hasanye.

Thabo ea hao e tla ba ho Morena,

tlōtla ea hao

e be Ea Halalelang oa Iseraele.

₁₇“Mafutsana le bahloki

ba batla metsi,

empa metsi ha ba a fumane,

maleme a bona

a omeletse ke lenyora.

Empa 'na Morena, ke tla ba araba,

'na Molimo oa Iseraele,

nke ke ka ba furalla.

₁₈Ke tla phunya mehloli ea linōka,

ke e phunye

tutulung tsa lehlabathe,

kahar'a likhohlo liliba li phorosele.

Lehoatata ke tla le fetola

le tlale matša,

naha e omeletseng

e runya-runye liliba.

₁₉Ke tla melisa

fate tsa likedare lehoatateng,

ke melise mositsane,

mohlakola le mohloaare;

matsoatlareng ke tla melisa

fate tsa molutu,

li mele hammoho

le tsa phaene le kiperese.

₂₀Batho ba tla bona tsena

ba be ba tsebe,

ba hlokomele, ba be ba utloisise:

Morena o entse tsena

ka letsoho la hae,

Ea Halalelang oa Iseraele

o li hlolile.”

₂₁“Ritelang nyeoe ea lōna,

lōna melingoana,”

ho rialo Morena.

“Bolelang mabaka a lōna,”

ho rialo Khosi ea Jakobo.

₂₂“Atamelang, le ke le bolele,

le re bolelle tse tla etsahala.

Re bolelleng

hore na tsa khale-khale ke life,

e le hore re tle re li nahane,

re be re tsebe

le pheletso ea tsona;

kapa le re bolelle

tse tla etsahala.

₂₃Re tsebiseng

tseo e leng hona li tla tla,

re tle re tsebe

hore efela le le melimo.

Etsang tse ntle

kapa le etse tse khopo,

re tle re bone,

ebe re tlaloa ke tšabo.

₂₄Bonang, ho hang lōna ha le letho,

mesebetsi ea lōna

ke mafeela-feelane;

ea ikhethelang lōna ke manyala!

₂₅“Ke tsositse e mong leboea,

'me ke enoa oa tla,

ea tsoang bochabela

o tla ipiletsa ho 'na.

O hatakela babusi

joaloka hoja e le seretse,

joaloka sebōpi se khoba letsopa.

₂₆Ea boletseng tsee tšimolohong

ke mang re tle re tsebe?

Kapa a li bolela pele,

re tle re re o ne a nepe?

Ha ho ea kil'a li bolela,

ha ho ea kil'a li senola,

polelo tsa hae

ha ho ea kil'a li utloa!

₂₇Ke 'na oa pele

ea boleletseng Sione:

‘Bona, ak'u ba bone ke bao!’

Ka rōma leqosa Jerusalema

ho isa molaetsa o molemo.

₂₈Ha ke talima melingoana

ha ke bone motho,

kahar'a eona ha ho moeletsi,

ha ho ea nkarabang ha ke e botsa.

₂₉Bonang, melingoana eo

ke ea bohata!

Mesebetsi ea eona ke ea lefeela,

melingoana ea bona

ke lefeela le kang moea!”