ESAEA 44

₁“Joale mamela, uena Jakobo,

mohlanka oa ka,

uena Iseraele eo ke mo khethileng.

₂Morena, eena ea u bōpileng,

ea u entseng u sa le popelong,

ea tla u thusa, o bua tjena:

Se tšabe, uena Jakobo,

mohlanka oa ka,

le uena Jeshurune

eo ke mo khethileng.

₃“Ke tla nesetsa pula

naheng e omeletseng,

ke phallise melatsoana

mobung o omeletseng;

ke tla theolela Moea oa ka

holim'a litlōhōlō tsa hao,

ke theolele mahlohonolo a ka

holim'a tsona.

₄Li tla mela

har'a joang bo botalana,

joaloka fate tsa moluoane

lebōpong la nōka.

₅E mong o tla re:

‘'Na ke oa Morena;’

e mong eena a ipitse

ka lebitso la Jakobo,

oa boraro a ngole,

a ngole ka letsoho la hae,

a re: ‘'Na ke oa Morena!’

ebe o ipitsa

ka lebitso la Iseraele.”

₆“Morena, Khosi ea Iseraele

le Molopolli,

Morena oa mabōtho o bua tjena:

‘Ke 'na oa pele le oa ho qetela,

kantle ho 'na ha ho na Molimo.

₇Ea tšoanang le 'na ke mang?

Ha a ke a phatlalatse!

A ke a bolele kapele ho 'na

se etsahetseng haesale

ke thèa chaba sa ka khale-khale,

a bolele

le tse tlang ho etsahala.

E, a ke a senole tse tlang ho tla.

₈U se ke ua thōthōmela,

u se ke ua tšaba.

Na ha kea ka ka bolela hoo,

ka ho senola khale-khale?

Lōna le lipaki tsa ka;

na ho teng Molimo e mong

kantle ho 'na?

Che, ha ho Lefika le leng,

ha ke tsebe le le leng!’ ”

₉Bohle ba etsang melimo ea bohata

ke lefeela,

melimo eo ba e ratang

ke mafeela-feelane.

Ba ka e buellang ba foufetse;

ha ba bone, ha ba tsebe

hore ba tla tlontloloha.

₁₀Ea etsang molimo oa bohata,

kapa ea bōpang setšoantšo,

eena o sebeletsa lelea.

₁₁Ba e khumamelang

ba tla tlontloloha,

ba e etsang

hase letho ke batho feela.

A ba ke ba tle kaofela,

ba phehe khang le 'na;

ba tla kenoa ke tšabo,

ba tlontlolohe.

₁₂Lelala le nka tšepe

le e bese mollong,

le e khobe ka hamore,

le bōpe molimo oa bohata,

le e khobe

ka tsoho la lona le sefutho,

ho fihlela le lapa,

le felloa ke matla,

metsi le sa a noe,

le be le khathale.

₁₃Sebetli sa lehong

se lekanya ka khoèlè ea sona,

se tšoaee

moralo oa molingoana ka pene,

se sebelise phalo ho betla lehong,

ebe se le tšoaea ka ho methang.

Joale ebe sea betla,

se etsa tšoantšo sa motho,

tšoantšo sa motho

ea khahlehang haholo,

se tla beoa ka tlung.

₁₄Motho o rema fate tsa likedare,

kapa a reme tsa kiperese le tsa eike,

a reme le fate

tse teng kahar'a moru,

a hlome feiee,

pula e e noesetse;

₁₅ke patsi eo motho

a besang mollo ka eona;

e 'ngoe ea eona

o ikomosa ka eona,

a bese mollo ho pheha bohobe.

O betla le molingoana ka eona,

a o khumamele,

a etse molimo oa bohata,

a o obamele.

₁₆Ka patsi e 'ngoe o besa mollo,

a phehe lijo tsa hae ho oona,

a bese nama, a e je, a be a khōre.

Mollong oo o ee a ikomose, a re:

“A! ke futhumetse,

ke orile mollo!”

₁₇Ka e setseng

o betla molimo oa bohata,

molingoana oa hae,

a o obamele, a o khumamele,

a o rapele, a re ho oona:

“Ak'u mpholose,

u molimo oa ka!”

₁₈Melingoana ha e na tsebo,

ha e na kutloisiso,

mahlo a eona a netiloe,

ha e bone letho,

kelello li koalehile,

ha e utloisise letho.

₁₉Ha ho ea keng a inahane,

ha ho ea nang le tsebo

kapa kutloisiso ea ho re:

“Ke besitse mollo ka patsi e 'ngoe,

ka pheha bohobe ka mashala a eona,

ka besa le nama ka ba ka e ja.

Na nka etsa molingoana

ka patsi e setseng?

Na nka obamela sekoqo sa patsi?”

₂₀Khopolo e joalo

e ka ho itjella molora,

pelo e thetsehileng

e ea mo khelosa,

a ke ke a ipholosa, kapa a re:

“Ho ka tsohong la ka le letona

na hase thetso?”

₂₁“Hopola ntho tsena, uena Jakobo,

uena Iseraele,

hobane u mohlanka oa ka;

ke u bopile, u mohlanka oa ka,

uena Iseraele,

ha nka ke ka u lebala.

₂₂Ke hlakotse tšito tsa hao

joaloka leru,

ka hlakola libe tsa hao

joaloka moholi,

khutlela ho 'na,

hobane ke u lopolotse.”

₂₃Binang ka nyakallo, lōna maholimo,

hobane tsena Morena o li entse;

hōoeletsang

lōna likhohlo tsa lefatše,

lōna lithaba binang haholo,

le lōna meru

le fate tsohle tse ho lōna,

hobane Morena o lopolotse Jakobo,

o bonahalitse tlōtla ea hae,

a e bonahatsa ka Iseraele.

₂₄Morena, Molopolli oa hao,

eena ea u entseng u sa le pōpelong,

o bua tjena:

“Ke 'na Morena

ea entseng lintho tsohle,

ea alileng maholimo

ke le inotši,

ea phutholotseng lefatše

ke le inotši.

₂₅Ke 'na ea nyopisang

lipontšo tsa baporofeta ba bohata,

ea fetolang linohe e be lithoto,

ea nyōpisang tsebo ea bahlalefi,

a e fetole lefeela-feelane.

₂₆Ke 'na ea phethahatsang

polelo tsa mohlanka oa ka,

ea phethisang

merero ea baromuoa ba ka,

ea reng ho Jerusalema:

‘U tla ba le baahi!’

ea reng ho metse ea Juda:

‘Le tla hahuoa!’

ho lithako tsa eona:

‘Ke tla le tsosa!’

₂₇Ke 'na ea reng ho maliba:

‘Pshang!

Linōka tsa lōna ke tla li pshesa!’

₂₈Ke 'na ea reng ho Siruse:

‘U molisana oa ka,

u tla phetha tsohle

tseo ke li ratang;

u tla re thako tsa Jerusalema

li tsosoe,

u re methèo ea Tempele e raloe.’ ”