Iseraele, leseli la lichaba
1“Lōna lihlekehleke,
'mameleng!
Lōna chaba tse hōle,
utloang tsena!
Morena o mpitsitse
ke sa le pōpelong,
mohla ke tsoaloang
a mpitsa ka bitso la ka.
2O entse molomo oa ka
seka sabole e bohale,
a mpata moriting oa atla sa hae;
a nketsa motsu o leolitsoeng,
a mpata ka sehlajoeng sa hae.
3Eaba o re ho 'na:
‘Uena Iseraele, u mohlanka oa ka,
ke ka uena ke tlang ho tlotlisoa.’ ”
4Eaba 'na ke re:
“Ke sebelitse lelea,
ka fufulelloa ntat'a selala.
Empa se ntšoanelang
se ka atleng sa Morena,
moputso oa ka
o ho Molimo oa ka.”
5Morena ea nkhethetseng
ho ba mohlanka oa hae,
a nkhetha ke sa le pōpelong ea 'mè,
hore ke khutlisetse Jakobo ho eena,
ke bokelle chaba sa hae sa Iseraele,
hobane mahlong a hae kea tlotleha,
ke Molimo oa ka,
ke eena matla a ka.
6Joale Morena o re:
“Ke nthoan'e fokolang
hore u be mohlanka oa ka,
u khutlise merabe ea Jakobo,
u khutlise bana ba Iseraele
bao ke ba babaletseng.
Ke tla u etsa leseli ho balichaba,
u tl'u fihlise ho pholosa ha ka
pheletsong tsa lefatše.”
7Morena, Molopolli oa Iseraele,
eena Ea Halalelang,
o bua tjena ho mohlanka oa babusi,
ho ea ileng a nyelisoa,
a nyonyoa ke lichaba:
“Khosi li tla u bona,
li eme ka maoto,
mahosana le 'ona a tla u obamela,
ka baka la Morena,
eena ea tšepahalang,
Ea Halalelang oa Iseraele,
ea u khethileng.”
Jerusalema e hahoa bocha
8Morena o bua tjena:
“Ka nako ea mohau
ke ile ka u araba,
ka tsatsi la ho pholosoa
ke ile ka u thusa;
ka u boloka hore ka uena
ke etse selekane le lichaba,
hore ho tle ho khutlisoe naha,
ho ajoe lefa la eona le senyehileng.
9Ho batšoaruoa u tle u re:
‘Tsoang!’
Ho ba lefifing u re:
‘Tsoelang leseling!’
Ba tla fula kathōko ho litsela,
ba fule joaloka linku,
makhulo a bona
a be maralleng 'ohle.
10Ha ba ka ke ba lapa
kapa ba nyoroa,
kapa ba chesoa ke mocheso
oa tsatsi la lehoatata.
Ea ba utloelang bohloko
o tla ba tataisa,
a ba ise pel'a liliba tse kollang.
11“Thabeng tsohle tsa ka
ke tla etsa litsela,
'mila ea ka e katoe
e tle e phahame.
12Bonang! Ba tla tla ba e-tsoa hōle,
ba bang leboea,
ba bang bophirimela,
ba bang ba e-tsoa
naheng ea Sinime.”
13Lōna maholimo binang ka thabo,
uena lefatše nyakalla,
lōna lithaba binang ka nyakallo!
Morena o tšelisa sechaba sa hae,
o hauhela chaba se hae se tujoang.
14Empa Sione o itse:
“Morena o mphuraletse!
Morena oa ka o ntebetse!”
15“Na mosali a ka lebala lesea
leo a le anyesang,
a se k'a hauhela ngoana
oa pōpelo ea hae?
Leha eena a ka lebala,
'na ha nka ke ka u lebala!”
16Bona! ke ngotse bitso la hao
kahar'a liatla tsa ka,
marako a hao
ke ntse ke a bona kamehla.
17“Ba tla tsosa marako a hao,
ba tla khutla ba potlakile,
ba u hataketseng, ba u ripitla,
bona ba u balehe.
18Phahamisa mahlo a hao,
u thalatse kahohle;
chaba sa hao sea phutheha,
se tla ho uena.
Ke hlapanya ka bitso la ka,”
ho rialo Morena,
“ho uena
ba tla tšoana le mekhabiso,
u ikhabise ka bona
joaloka monyaluoa.
19“U fetohile lesupi, u hloka baahi,
le naha ea hao e senyehile,
e ke ke ea hlola e lekana,
e lakana chaba sa hao,
le hoja ba neng ba u ripitle
ba tla be ba le hōle.
20Bana bao u ba tsoetseng
nakong ea bofifi ba hao,
ba tla bua
moo u ntseng u utloa, ba re:
‘Baka sena se senyenyane,
ha se re lekane,
re ekeletse naha re tsebe ho haha.’
21Joale ka pelong ea hao u tla re:
‘Bana baa ke ba tsoaletsoe ke mang?
Ke ne ke shoeloe ke bana,
ka ba joaloka nyōpa,
ka thōpuoa,
ka isoa koana le koana.
Bana baa ba hōlisitsoe ke mang?
Ke ne ke setse ke le mong feela,
empa joale baa bona ba tsoa kae?’ ”
22Morena Molimo o bua tjena:
“Bona! ke tla hoèhla balichaba,
ke ba hoèhle ka letsoho,
ke phahamisetse lichaba
mokhele oa ka;
li tla khutlisa bara ba hao
li ba sikile,
li khutlise barali ba hao
li ba pepile.
23Likhosi e tla ba baholisi ba hao,
khosatsana tsa tsona
e be baanyesi ba hao.
Li tla u obamela
fahleho li talimile fatše,
li be li nyeke lerōle
le maotong a hao.
Ke moo u tla tseba
hore Morena ke 'na,
hobane ba ntšepileng
ba ke ke ba hlajoa ke lihlong.”
24Na mohale a ka amohuoa
khapo ea hae,
kapa mothópuoa a lopolloa
ho motlatlapi oa hae?
25Empa Morena o bua tjena:
“E, bahale ba tla amohuoa
bathōpuoa ba bona,
le ba sehlōhō ba amohuoe
khapo ea bona,
Ba loantšanang le uena
ke tla ba loantša,
bana ba hao ke ba lopolle.
26Bahatelli ba hao
ke tla ba fepa nama ea bona,
ba tahoe ke mali a bona
sa veine e ncha.
Batho bohle ba tla tseba
hore 'na Morena,
ke Mopholosi oa hao
le Molopolli oa hao,
eena Ea Matla oa Jakobo.”
