JAKOBO 4

₁Lintoa le liqabang tse har'a lōna li bakoa ke'ng? Na ha li bakoe ke litakatso tse mpe tse loanang ka ho lōna? ₂Lea lakatsa, empa ha le fumane. Lea bolaea, le na le mohōnō, empa ha le atlehe. Lea qabana, lea loana; ha le fumane letho, hobane ha le kōpe ho Molimo. ₃Lea kōpa, empa ha le fumane letho, hobane le kōpa ka mokhoa o mobe, hore le tle le khotsofatse litakatso tsa lōna.

₄Lōna bakoenehi, na ha le tsebe hore ho etsa setsoalle le lefatše ke bōra ho Molimo? Mang le mang ea ratang ho ba motsoalle oa lefatše o iketsa sera sa Molimo. ₅Kapa le hopola hore Mangolo ha a bolele letho, ha a re: “Moea oo Molimo a o kentseng ho rōna o o boulela haholo?” ₆Empa Molimo o re neile mohau o moholo ka ho fetisa. Ke ka hona ho thoeng:

₇Ka baka leo, ikokobeletseng Molimo. Loantšang Diabolosi, 'me o tla le baleha. ₈Atamelang ho Molimo, 'me o tla atamela ho lōna. Lōna baetsalibe, hlatsoang matsoho a lōna; lōna ba qea-qeang, hloekisang lipelo tsa lōna. ₉Lemohang bosōtō ba lōna, le hlomohe, le bokolle; letšeho la lōna le fetohe lillo, thabo ea lōna e fetohe masoabi. ₁₀Ikokobetseng pel'a Morena, 'me o tla le phahamisa.

₁₁Bana beso, le se ke la buana hampe. Ea buang ngoan'abo hampe, kapa ea mo ahlōlang, o bua molao hampe, 'me oa o ahlōla. Haeba u ahlōla molao, ha u sa le ea phethang molao, empa u se u le ea ahlōlang. ₁₂O mong feela moetsi oa molao le moahlōli: Ke ea nang le matla a ho pholosa le ho timetsa. Ebe uena u mang u ka ahlōlang oa heno?

₁₃Mamelang, lōna ba reng: “Kajeno kapa hosasane re tla ea motseng o itseng, moo re tla hlola teng selemo sohle re hoèbè, re tle re rue.” ₁₄Ha le tsebe hore na la hosasane le tla le tlela le eng, kapa bophelo ba lōna bo tla ba joang, hobane le tšoana feela le moholi, o bonahalang nakoana, o nt'o nyamela. ₁₅Bakeng sa ho re: “Ha Morena a rata, re tla phela, re etse hona kapa hane,” ₁₆joale lea ikakasa, 'me lea ithorisa. Boithoriso bohle bo joalo bo bobe. ₁₇Ka baka leo, ea tsebang ho etsa ho hotle, empa a sa ho etse, o etsa sebe.