Tola
1Kamora' lefu la Abimeleke, ha hlaha Tola, mora oa Pua, setlōhōlō sa Dodo, monna oa lelōko la Isakare, a namolela Baiseraele. Tola o ne a ahile Shamire, naheng e maralla ea Efraime. 2Ea e-ba moahlōli oa Baiseraele ka lilemo tse mashome a mabeli a metso e meraro. Eaba oa shoa, 'me a epeloa Shamire.
Jaire
3Kamora' Tola ha hlaha Jaire oa Mogileade. Ea e-ba moahlōli oa Baiseraele ka lilemo tse mashome a mabeli a metso e 'meli. 4O ne a e-na le bara ba mashome a mararo, ba neng ba palama lipetsana tsa litonki tse mashome a mararo. Ba ne ba e-na le metse e mashome a mararo naheng ea Gileade, eo le kajeno-ea-bokajeno e ntseng e bitsoa Metse ea Jaire. 5Jaire a shoa, 'me a epeloa Kamone.
Baamone ba hatella Baiseraele
6Bana ba Iseraele ba boela ba siteloa Morena. Ba sebeletsa bo-Baale, le bo-Asetarote, le melimo ea Arame, le melimo ea Sidone, le melimo ea Moabe, le melimo ea bana ba Amone, le melimo ea Bafilesita; ba furalla Morena, ba se ke ba hlola ba mo sebeletsa. 7Khalefo ea Morena ea tlōkōmela Baiseraele, a neelana ka bona matsohong a Bafilesita, le matsohong a Baamone. 8Ka sona selemo seo, bao ba ba hatella, 'me ba robokela bana ba Iseraele. Ka lilemo tse leshome le metso e robeli, ba hatella bana bohle ba Iseraele ba neng ba phela kamose oane ho Jorodane, naheng ea Baamore, e Gileade. 9Baamone ba tšela Jorodane ho ea loantša le Juda, le Benjamine, le ba ntlo ea Efraime, 'me Baiseraele ba tsieleha haholo.
10Joale bana ba Iseraele ba ipiletsa ho Morena, ba re: “Re u sitetsoe, hobane re furaletse Molimo oa rōna, re sebelelitse bo-Baale.”
11Morena a re ho bana ba Iseraele: “Na ha kea ka ka le namolela ho Baegepeta, le ho Baamore, le ho Baamone, le ho Bafilesita? 12Basidone, le Baamaleke, le Bamaone, le bona ba ile ba le hatella, eaba le ipiletsa ho 'na, 'me ka le namolela matsohong a bona. 13Empa le mphuraletse, la sebeletsa melimo esele; ka baka leo, ha ke sa tla hlola ke le namolela. 14Tsamaeang le e'o llela ho melimo eo, eo le e khethileng; a e ke le lopolle nakong ena ea tsietsi ea lōna.”
15Empa bana ba Iseraele ba re ho Morena: “Re sitiloe. Uena u re etse eng kapa eng eo u bonang e lokela, ha feela u ka mpa ua re namolela ka letsatsi lena, rea u rapela.” 16Eaba ba lahla melimo e meng, ba sebeletsa Morena. Morena a hauhela Baiseraele ka baka la bosōtō ba bona.
17Bana ba Amone ba phutheha, ba hloma Gileade. Bana ba Iseraele le bona ba kopana, ba hloma Misepa. 18Sechaba, se e-na le mahosana a Gileade, sa buisana, sa re: “Ke monna ofe ea tla qala ho loantša Baamone? Monna eo e tla ba eena moetapele oa baahi bohle ba Gileade.”
