BAAHLOLI 2

₁Joale lengeloi la Morena la fihla Bokime, le e-tsoa Gilegale. La fihla ho Baiseraele, la re: “Ke le nyolotse Egepeta, ke le tlisitse naheng ena eo ke neng ke e hlapanyetse bontat'a lōna, ka re: ‘Nke ke ka roba selekane sa ka le lōna le ka mohla. ₂Feela lōna le se ke la etsa selekane le baahi ba naha ena, le heletse lialetare tsa bona.’ Empa ha lea ka la mamela lentsoe la ka. Joale le entse eng? ₃Ka baka leo, ke re: ‘Nke ke ka ba leleka kapele ho lōna; e tla ba leraba ho lōna, melimo ea bona e be sefi ho lōna.’ ”

₄Hoba lengeloi la Morena le bue mantsoe ana ho bana bohle ba Iseraele, sechaba sa bokolla haholo.

₅Sebaka seo ba se rea lebitso la Bokime, ba etsetsa Morena mahlabelo hona moo.

₆Ha Joshua a se a qhalile sechaba, motho e mong le e mong oa bana ba Iseraele a boela naheng eo a e jeleng lefa, a lula ho eona. ₇Sechaba sa sebeletsa Morena ka matsatsi 'ohle a bophelo ba Joshua, le ka matsatsi 'ohle a ho phela ha baholo ba ileng ba 'na ba phela kamora' lefu la Joshua, ba boneng mesebetsi eohle e meholo ea Morena, eo a ileng a e etsetsa Baiseraele.

₈Joale Joshua, mora oa Nune, mohlanka oa Morena, a shoa a e-na le lilemo tse lekholo le leshome. ₉Ba mo epela naheng eo a e jeleng lefa, e leng Timina-Herese, naheng e maralla ea Efraime, ka leboea ho thaba ea Gaashe. ₁₀Ha molōko oo oohle o se o oroselitsoe ho bo-ntat'a oona, ha hlaha molōko o mong, o sa kang oa tseba Morena, kapa mesebetsi eo Morena a e etselitseng Baiseraele.

₁₁Bana ba Iseraele ba siteloa Morena, ba sebeletsa bo-Baale. ₁₂Ba furalla Morena Molimo oa bo-ntat'a bona, ea ileng a ba ntša naheng ea Egepeta, ba latela melimo e meng, melimo ea lichaba tse ba pota-potileng, ba e khumamela, 'me ba halefisa Morena.

₁₃Ba furalla Morena, ba sebeletsa bo-Baale le Asetarote. ₁₄Bohale ba Morena ba tlōkōmela Baiseraele. A neelana ka bona matsohong a linokoane, 'me tsa ba senyetsa. A neelana ka bona matsohong a lira tsa bona tse ba pota-potileng, hoo ba neng ba ke ke ba hlola ba ema kapele ho lira tseo tsa bona. ₁₅Kamehla ha ba e-ea ntoeng, Morena o ne a ba loantša, joalokaha a ne a ile a bua, le joalokaha a ne a ile a ba hlapanyetsa, 'me ba tsieleha haholo.

₁₆Morena a ba hlahisetsa baahlōli ba ileng ba ba pholosa matsohong a linokoane tse ba senyetsang. ₁₇Empa ha baa ka ba mamela le baahlōli bao ba bona, hobane ba 'nile ba kheloha, ba latela melimo e meng, ba e khumamela. Kapele-pele ba kheloha tsela eo bo-ntat'a bona ba neng ba tsamaea ho eona, ba hlompha molao oa Morena, empa bona ha baa ka ba etsa joalo. ₁₈E ne e ee ere ha Morena a ba hlahisetsa moahlōli, Morena o ne a ee a be le moahōli eo, a ba pholose matsohong a lira tsa bona, ka matsatsi 'ohle a ho phela ha moahlōli eo. Morena o ne a ba utloela bohlōkō ka baka la ho lumaela ha bona ho bakoang ke ba ba hateletseng, ba ba robokelang. ₁₉Empa e ne e ee ere ha moahlōli a e-shoa, ba boele mekhoeng ea bona, ba etse tse khopo le ho feta bo-ntat'a bona; ba boele ba latele melimo e meng, ba e sebeletse, ba e khumamele. Ba ne ba sa ke be ba tlohele mesebetsi ea bona e khopo, kapa manganga a bona.

₂₀Khalefo ea Morena ea tlōkōmela Baiseraele, 'me a re: “Kaha sechaba sena se robile selekane sa ka, seo ke se laetseng bo-ntat'a sona, 'me se sa ka sa mamela lentsoe la ka, ₂₁le 'na, ho tloha joale, ha ke sa tla hlola ke leleka lichaba tse kapele ho sona, tseo Joshua a ileng a li siea ha a e-shoa. ₂₂Hona ke hore ke leke Baiseraele ka tsona, ke bone hore na ba tla bōlōka tsela ea Morena joalokaha bo-ntat'a bona ba ile ba e bōlōka, ba tsamaea ka eona, kapa che.” ₂₃Eaba Morena o tlohela lichaba tseo hore li sale, a se ke a potlakela ho li leleka, 'me a se ke a neelana ka tsona matsohong a Joshua.