Basali ba morabe oa Benjamine
1Banna ba Iseraele ba ne ba ile ba hlapanya ha ba le Misepa, ba re: “Ha ho le ea mong oa rōna ea tla neana ka morali oa hae hore a nyaloe ke ba morabe oa Benjamine.”
2Sechaba sa fihla Bethele, sa lula teng kapele ho Molimo, ho fihlela ka phirimana. Sa bokolla habohlōkō, 3sa re: “Oho, Molimo oa Iseraele, ke hobane'ng ha hoo ho etsahetse naheng ea Iseraele, hore ebe kajeno morabe o mong oa Iseraele ha o eo?”
4Ka le hlahlamang sechaba sa tsoha e sa le ka malungoalungoana, sa haha aletare, sa nyehela ka linyehelo tsa secheso, le ka linyehelo tsa teboho.
5Bana ba Iseraele ba re: “Ke mang har'a merabe ea Iseraele ea sa kang a tla phuthehong ea Morena?” Ke hobane ba ne ba entse kano e kholo malebana le ea sa tlang phuthehong ea Morena, e neng e le Misepa, ba re: “Ruri o tla bolaoa!”
6Bana ba Iseraele ba itšoabela ka baka la bana babo bona ba morabe oa Benjamine, ba re: “Kajeno morabe o mong o felisitsoe naheng ea Iseraele. 7Baa ba setseng re tla etsa joang ka bona hore ba be le basali, kaha re hlapanyelitse Morena hore re ke ke ra neana ka barali ba rōna hore ba ba nyale?”
8Ba boela ba re: “Ke morabe ofe har'a merabe ea Iseraele, o sa kang oa phuthehela Misepa ho Morena?” Ba bona hore ha ho motho le ea mong ea ileng a tla liahelong a e-tsoa Jabeshe-Gileade, a e-tla phuthehong. 9Sechaba sa baloa, 'me ba fumana ho se motho le ea mong oa baahi ba Jabeshe-Gileade.
10Kahoo sechaba sa rōmela banna ba bahale, ba likete tse leshome le metso e 'meli, sa re: “Tsamaeang le e'o bolaea baahi ba Jabashe-Gileade ka sabole; le bolaee basali le bana. 11Seo le tla se etsa ke sena: Monna e mong le e mong ea kileng a robala le mosali, le mosali e mong le e mong ea kileng a robala le monna, bao le ba bolaee ho hang.” 12Har'a baahi ba Jabeshe-Gileade ba fumana baroetsana ba makholo a mane, ba neng ba e-s'o ka ba robala le monna; eaba ba ba isa liahelong tsa Shilo, e naheng ea Kanana.
13Sechaba sohle sa rōmela maqosa ho ba morabe oa Benjamine, ba neng ba le lefikeng la Rimone, sa bua le bona, sa ba phatlalletsa khotso. 14Ka eona nako eo ba morabe oa Benjamine ba khutla. Baiseraele ba ba nea basali bao ba ileng ba ba pholosa har'a basali ba Jabeshe-Gileade, empa basali bao ba se ke ba ba lekana.
15Sechaba sa itšoabela ka baka la ba morabe oa Benjamine, hobane Morena o ne a hlahisitse sekheo har'a merabe ea Iseraele. 16Joale baholo ba sechaba ba re: “Baa ba setseng re tla ba fumanela basali kae, ha e le moo basali ba bolailoe morabeng oa Benjamine?” 17Eaba ba re: “Bana ba phonyohileng e be lefa la ba morabe oa Benjamine, e le hore morabe ona o se ke oa fela naheng ea Iseraele. 18Empa re ke ke ra ba nea barali ba rōna hore ba ba nyale.” Bana ba Iseraele ba ne ba ile ba hlapanya, ba re: “Ea ka nyallanang le ba morabe oa Benjamine a rōhakehe!”
19Ba boela ba re: “Bonang, ka selemo se seng le se seng ho ba le mokete oa Morena, mane Shilo e ka leboea ho Bethele, ka bochabela ho 'mila o moholo o nyolohang Bethele, o e-ea Shekeme, ka boroa ho Lebona.”
20Ba laela ba morabe oa Benjamine, ba re: “Tsamaeang le e'o lalla har'a lirapa tsa morara. 21Le lebelle, 'me e tle ere ha le bona baroetsana ba Shilo ba e-tla motjekong, le rōpōhe har'a lirapa tsa morara, monna e mong le e mong a ikabe ka mosali oa hae har'a baroetsana bao ba Shilo, a ikele naheng ea morabe oa Benjamine. 22Ha bo-ntat'a bona, kapa likhaitseli tsa bona, ba ka tla ho le tsekisa, re tla re ho bona: ‘Ba tšoareleng, hobane e mong le e mong oa bona o ikhapetse mosali joalokaha banna ba ee ba etse ntoeng. Haeba le ne le ba neile barali ba lōna, le ka be le le molato.’ ”
23Ba morabe oa Benjamine ba etsa joalo, ba inkela basali ba ba lekaneng, ho latela palo ea bona, har'a baroetsana ba tlileng motjekong, ba ba shobelisa. Ba boela naheng ea habo bona, ba tsosa lithako tsa metse ea bona, ba phela kahar'a eona.
24Ka eona nako eo bana ba Iseraele ba tloha moo, e mong le e mong a ea morabeng oa habo, le lelapeng la hae. Ba tloha, monna e mong le e mong a ea naheng ea habo eo a e jeleng lefa.
25Mehleng eo ho ne ho se na khosi naheng ea Iseraele, motho ka mong o ne a iketsetsa seo eena a reng se nepahetse.
