Sechaba sa Juda se tla timetsoa
1Joale Morena a re ho 'na: “Leha Moshe le Samuele ba ne ba ka ema kapele ho 'na mona, pelo ea ka e ne e ke ke ea utloela sechaba sena bohlōkō. Tlosa batho bana kapele ho 'na! E-re ba tsamee! 2Haeba ba ka re ho uena: ‘Re tla ea kae?’ ba bolelle, u re: ‘Morena o bua tjena:
“ ‘Ba abetsoeng lefu,
ba tla bolaoa ke lefu,
ba abetsoeng sabole,
ba tla bolaoa ke sabole,
ba abetsoeng sekoboto,
ba tla bolaoa ke sekoboto,
ba abetsoeng bothōpuoa,
ba tla thōpuoa.’
3“Ke ba khethetse mekhoa e mene ea ho ba timetsa,” ho rialo Morena. “Sabole e tla ba bolaea, lintja li tla ba harōla, linonyana tsa leholimo le libatana tsa naha li tla ba ja, li ba felise. 4Ke tla etsa hore mebuso eohle ea lefatše e thōthōmele ke tšabo ka baka la seo Manase, mora oa Hesekiea, khosi ea Juda, a neng a se etse Jerusalema.
5“U tla utloeloa bohlōkō ke mang,
uena Jerusalema?
U tla lleloa ke mang,
uena Jerusalema?
U tla fapoheloa ke mang
ho u botsa bophelo?
6Ke furaletsoe ke uena,
ua 'n'a checha ka santhao,”
ho rialo Morena.
“Ke tla u tšoara
ka letsoho la ka ke u timetse,
ke se ke khathetse ke ho u hauhela.
7Ke tla ba fèfèra
ka fereko ea ho fèfèra,
ke ba fèfèrèlè menyakong ea motse.
Ke tla ba bolaela bana,
chaba sa ka ke se felise,
hobane tsela tsa sona tse khopo
ha sea li kheloha.
8Ke tla eketsa bahlolohali
har'a sechaba sena,
ba ngatafale
ho feta hlabathe la leoatle.
Har'a mp'a motšeare
ke tla tlisa motimetsi,
a timetse basali
ba tsoetseng bahlankana,
hang-hang tšabo le thōthōmelo
li ba oele holimo.
9Ea nang le bana ba supileng
o tla khathala,
a khathalle ruri, a ilibane.
Tsatsi le tla mo likella
e nts'e le motšeare,
a hlajoe ke lihlong,
a be a tlontlolohe.
Masalla a sechaba
ke tla neelana ka 'ona,
ke a nee lira
li a bolaee ka sabole,”
ho rialo Morena.
Jeremia o ipelaetsa ho Morena
10Ke malimabe hakaakang, 'mè,
ha u il'a mpeleha,
ua mpelehela
hore ke be motho oa liqabang,
motho oa meferefere
har'a lefatše lohle!
Ha kea ka ka alima
kapa ka alimana,
empa e mong le e mong
oa nthōhaka.
11Eaba Morena o re:
“Ruri uena
ke tla u matlafatsa haholo,
ruri lira tsa hao
li tla be li u rapele,
li u rapele nakong ea mahlōnōkō,
li u rapele le nakong ea litsietsi.
12“Na motho a ka roba tšepe,
a roba tšepe kapa lethose
le tsoang lebōea?
13Matlotlo a hao le maruo a hao,
ke tla neelana ka 'ona,
a etsoe lelobelo
ka thupa ea 'mōoana,
ka baka la libe tsohle tsa hao,
libe tseo u li entseng
naheng ena eohle.
14Ke tla u etsa lekhoba,
khoba la lira tsa hao,
ke u etse lekhoba
naheng eo u sa e tsebeng.
Khalefo ea ka e tla hotetsa mollo,
e hotetse mollo o tla u chesa.”
15“Ua tseba, uena Morena,
ak'u nkhopole, u ke u nketele,
ak'u mphetetse ho batubi ba ka;
kaha u na le mamello,
se ke ua ntimetsa,
hopola ke hlapaoloa
ka lebaka la hao.
16Hoba ke utloe lipolelo tsa hao,
li ile tsa ka bohobe ho 'na,
ka li ja,
ea e-ba thabo le monyaka
oa pelo ea ka,
hobane 'na
ke bitsoa ka lebitso la hao,
oho, uena Morena,
Molimo oa mabōtho!
17Ha ke e-s'o ka ke lula
mokhatlong oa basomi,
ha ke e-s'o ka ke ithabisa le bona;
ke ituletse ke le inotši
ka baka la matla a hao,
hobane u entse
hore ke halefe haholo.
18Ke hobane'ng bohlōkō ba ka
ha bo sa fele?
Qeba la ka le phēphētha bolalu,
le hana ho fola?
Na u tla itšoantša
le mothetsi ho 'na,
u be joaloka seliba
liba se metsi a pshang?”
19Ka baka leo, Morena o bua tjena:
“Haeba u ka baka
ke tla u busetsa tulong tsa hao,
haeba u bua polelo tse ntle
e seng tsa mafeela,
e tla ba uena molomo oa ka,
u ntšebeletse,
chaba sena se ee ka litsela tsa hao,
e seng uena u ee ka litsela tsa sona.
20Ke tla u etsa lerako
le hahelelitsoeng la lethose,
chaba sena
u tle u tsebe ho se hlōla.
Se tla u loantša,
empa se ke ke be sa u hlōla,
hoba ke na le uena
ho u pholosa le ho u lopolla,”
ho rialo Morena.
21“Ke tla u pholosa
matsohong a ba khopo,
ke u lopolle
matsohong a ba sehlōhō.”
