Sebe sa Bajuda le kotlo ea bona
1“Sebe sa Bajuda se ngotsoe
ka pene ea tšepe,
sa ngoloa pelong tsa bona,
sa ngoloa ka daemane e le nchocho,
sa ngoloa le manakeng
a lialetare tsa bona.
2Le bana ba bona ba ntse ba hopola,
ba hopola lialetare tsa bona,
aletare tsa Ashera,
tse tlas'a fate tse talana
tse holim'a maralla.
3Thaba ea ka le naha e e potileng,
maruo le matlotlo 'ohle a lōna,
tsena ke tla fana ka tsona
e be lelobelo,
ke fane ka libaka tsa lōna,
baka tsa lōna tsa borapeli,
ka baka la sebe
se entsoeng naheng ena eohle.
4Ka baka la phoso tsa lōna
le tla lahleheloa,
le lahleheloe ke lefa
ke le file lona.
Ke tla le etsa makhoba
a lira tsa lōna
ke le etse makhoba
naheng eo le sa e tsebeng,
hobane le entse
hore khalefo ea ka e tuke,
e laime malakabe kamehla eohle.”
5Morena o bua tjena:
“Ho ke ho rōhakehe
ea itšepisitseng batho,
eena ea tšepileng matla
a letsoho la hae,
eo pelo ea hae
e furaletseng Morena.
6O tla tšoana le sehlahla
se metseng har'a lehoatata,
ha a ka ke a bona
le tse molemo ha li e-tla.
O tla aha matsoatlareng
a omeletseng a lehoatata,
a ahe naheng e lenyèkèthè,
e hlokang baahi.
7“Ho lehlohonolo motho
ea itšepetseng Morena,
eo tšepo ea hae
e leng eena Morena.
8O tla tšoana le sefate
se lemiloeng pel'a metsi,
seo metso ea sona
e namelang pel'a molatsoana.
Ha se ke se tšosoa
ke ho fihla ha lebatama,
mahlaku a sona
a matalana kamehla,
ka nako ea komello
ha se ke se tšoenyeha,
kamehla se beha
litholoana tsa sona.”
9Pelo e tletse mano
ho feta lintho tsohle,
e senyehile
hoo e ke keng ea phekoloa,
ke mang ea ka e utloisisang?
10“Ke 'na Morena ea lekolang lipelo,
mohopolo le oona o lekoloa ke 'na.
Ke putsa motho
ho ea ka liketso tsa hae,
ho latela tholoana
tsa mesebetsi ea hae.”
11Joaloka nonyana
e fuamang mahe e se a eona,
ea ruang ka mano le eena o joalo,
bohareng ba bophelo ba hae
maruo ao a tla mo fella,
qetellong bothoto ba hae
bo bonahale.
12Terone e tlōtlehang, e phahameng,
haesale ho tloha tšimolohong,
ke sona sebaka
sa Sehalelelo sa rōna.
13Oho, uena Morena,
tšepo ea Iseraele,
bohle ba u furallang
ba tla tlontlolloa,
bohle ba u furallang
ba tla timela,
hoba ba furaletse Morena,
liba sa metsi a bophelo.
Jeremia o kōpa thuso ho Morena
14Mpholise, Morena,
'me ke tla fola,
mpholose, Morena,
'me ke tla pholoha,
hobane ke uena eo ke mo rorisang.
15Ba ntse ba re ho 'na:
“Li kae lipolelo tsela tsa Morena?
Ha a ke a li phethahatse joale!”
16'Na ha kea khaotsa ho ba molisa
ea u salang morao,
ha ke e-s'o labalabele
tsatsi la litsietsi,
polelo tsa ka le uena ua li tseba.
17Uena se k'a etsa hore ke u tšohe,
u setšabelo sa ka
nakong ea litsietsi.
18Bahlorisi ba ka
ba ke ba hlabisoe lihlong,
'na ke se ke ka hlabisoa lihlong;
etsa hore bona ba tšohe haholo,
'na ke se ke be ka tšosoa ke letho.
Ak'u ba tlisetse tsatsi la litlokotsi,
timetso ea bona
u e phethathatse habeli.
Ho boloka tsatsi la Sabatha
19Morena o ile a bua tjena ho 'na: “Tsamaea, u e'o ema khorong eo batho ba kenang ka eona, moo likhosi tsa Juda li kenang li bileng li tsoang le teng; u eme le likhorong tsohle tsa Jerusalema. 20U re ho bona: ‘Utloang lentsoe la Morena, lōna likhosi tsa Juda, le lōna bohle ba morabe oa Juda, le lōna baahi bohle ba Jerusalema, lōna ba kenang ka likhoro tsena. 21Morena o bua tjena: Haeba le rata ho phela, itlhokomeleng, le se ke la nka thōtō ka letsatsi la Sabatha, kapa la e kenya ka likhoro tsa Jerusalema. 22Le se ke le ntša thōtō ka matlung a lōna, kapa la etsa mosebetsi ofe le ofe ka letsatsi la Sabatha. Empa lōna le boloke letsatsi la Sabatha le halalela, joalokaha ke ne ke laele bo-ntat'a lōna moholo. 23Feela ha baa ka ba mamela, leha e le ho sekèha tsèbè; ba ile ba satalatsa melala ea bona, hore ba se ke ba utloa kapa hona ho ithuta. 24Empa haeba lōna le ka 'mamela ka hloko,’ ho rialo Morena, ‘la se ke la kenya thōtō ka likhoro tsa motse ona ka letsatsi la Sabatha, la halaletsa letsatsi la Sabatha ka ho se etse mosebetsi ofe kapa ofe ka lona, 25likhosi tse lutseng teroneng ea Davida, 'moho le mahosana a tsona, li tla kena ka likhoro tsa motse ona. Likhosi tseo, 'moho le mahosana a tsona, li tla kena li palame likariki tsa ntoa, li palame le lipere, li e-na le banna ba Juda le baahi ba Jerusalema, 'me motse ona o tla ba le baahi kamehla eohle. 26Batho ba tla tla ba e-tsoa metseng ea Juda, le libakeng tse pota-potileng Jerusalema; ba e-tsoa le naheng ea Benjamine, le liphuleng, le lithabeng, le naheng e ka Boroa, ba tlise linyehelo tsa secheso le mahlabelo, le linyehelo tsa lijo, le mokubetso, le linyehelo tsa teboho, ba li tlise ka tlung ea Morena. 27Empa haeba le sa 'mamele, le sa halaletse letsatsi la Sabatha, le kena ka likhoro tsa motse oa Jerusalema le nkile thōtō ka letsatsi la Sabatha, likhorong tseo tsa Jerusalema ke tla besa mollo o ke keng oa tingoa, o tla chesa matlo a likhosi tsa Jerusalema.’ ”
