Jeremia tlung ea sebōpi sa linkho
1Lena ke lentsoe la Morena, le ileng la fihla ho Jeremia, la re: 2“Ema, u theohele tlung ea sebōpi sa linkho, 'me ha u le moo ke tla u bolella molaetsa oa ka.”
3Eaba ke theohela tlung ea sebōpi sa linkho, 'me ka fumana se ntse se rita linkho ka lebili la sona. 4Nkho eo sebōpi se neng se e bōpa ka letsopa ea senyeha se ntse se e bōpa, eaba se boela se qala ho hōpa e 'ngoe e tla se khotsofatsa.
5Joale lentsoe la Morena la fihla ho 'na, la re: 6“Na ke hore uena, ntlo ea Iseraele, nke ke ka u etsa joalokaha sebōpi se etsa ka letsopa la sona?” ho rialo Morena. “Seo letsopa le leng sona matsohong a sebōpi, ke seo uena ntlo ea Iseraele, u leng sona matsohong a ka. 7Neng kapa neng nka phatlalatsa hore ke tla fōthōla, ke heletse, ke timetse sechaba kapa 'muso, 8empa haeba sechaba seo, seo ke neng ke se soketse, se bakela bokhopo ba sona, ke tla thibela koluoa eo ke neng ke se ke rerile ho e lihela holim'a sona. 9Neng kapa neng nka phatlalatsa hore ke tla thea sechaba, ke hlomamise 'muso. 10Empa haeba sechaba seo se etsa bokhopo mahlong a ka, se sa mamele lentsoe la ka, ke tla fetola maikutlo a ka malebana le molemo oo ke neng ke rerile ho se etsetsa oona.
11“Ka baka leo, tsamaea, u e'o bua le banna ba Juda le baahi ba Jerusalema, u re: ‘Morena o bua tjena: Bonang mona! Ke ntse ke le ralla bobe, ke lokisa morero oa ho le otla. Motho ka mong a khelohe tsela ea hae e khopo, a tsamaee tseleng e lokileng, liketso tsa hae li be ntle.’ 12Empa bona ba re: ‘Ha ho sa na thuso! Re tla tsoela pele mererong ea rōna, motho ka mong a phethe litakatso tsa pelo ea hae e khopo, e manganga.’ ”
Sechaba se furalla Morena
13Ka baka leo, Morena o bua tjena:
“Lōna botsisisang har'a balichaba:
Ea kileng a utloa
tse kang tsee ke mang?
Moroetsana oa Iseraele
o entse ntho e tšabehang haholo!
14Na thabeng tsa Lebanone
lehloa le ka qhibiliha?
Na metsi a mapholi,
a tsoang thabeng tseo,
na metsi ao
a ke a khaotse ho phalla?
15Empa chaba sa ka se ile sa ntebala,
sa chesa mokubetso,
sa o chesetsa melimo ea bohata;
melimo ena e entse hore
se be se khōptjoe,
se khoptjoe ha se tsamaea
tseleng tsa sona,
ha se tsamaea
tseleng tsa boholo-holo;
ea se hlahlathelisa
tseleng tse kathōko,
tse sa batallang,
tse tletseng makukuno.
16Naha ea sona se e fetotse nanaola,
e fetohile sekhobo sa mehla eohle,
bo-mofeta-ka-tsela
ba ee ba e makalle,
hlooho tsa bona
ba be ba li thukuthe.
17Mohl'a tsatsi la ho timetsoa
ha chaba sena,
ke tla se furalla,
se bone sekotlo feela,
ke se hasanye
kapele ho lira tsa sona,
joaloka moea o pukang
o e-tsoa bochabela.”
Sechaba se rera Jeremia
18Eaba ba re: “Tloong, re loheleng Jeremia mano, hobane baprista ba tla 'ne ba be teng, ba re rute Molao; ba bohlale ba tla 'ne ba be teng, ba re eletse; le baporofeta ba tla 'ne ba be teng ho re bolella molaetsa. Tloong ke hona, re iqapeleng tseo re ka mo qōsang ka tsona, re se ke ra natsa lipolelo tsa hae.”
19Oho, Morena, ak'u 'mamele!
Utloa seo baqōsi ba ka
ba se buang!
20Na botle bo ka buseletsoa ka bobe?
Baqōsi ba ka, ba ncheketse lemena!
Hopola, ke ile ka ema
kapele ho uena,
ka ba buella
ho ba faposa khalefo ea hao.
21Etsa hore bana ba bona
ba bolaoe ke sekoboto,
mali a bona a tšolloe ke sabole,
basali ba bona
ba shoeloe ke bana ba bona,
basali ba bona e be bahlolohali,
banna ba bona
ba bolaoe ke lefu la seoa,
bahlankana ba bona
ba bolaeloe ntoeng ka sabole.
22Ba tlisetse batupi
ka ho panya ha ntši,
seboko se utloahale
malapeng a bona,
hoba ba ncheketse lemena
ke tle ke oele ka ho lona,
ba chehetse maoto a ka leraba,
ba le patile.
23Uena Morena,
u tseba merero ea bona eohle,
merero ea bona ea ho mpolaea.
Se k'a ba tšoarela
bokhopo ba bona,
kapa ua tlosa sebe sa bona
mahlong a hao;
a ba ke ba ketoloe kapele ho uena,
u ba otle nakong ena
eo u ba halefetseng ka eona.
