Baiseraele ba khutlela hae
1“Ka nako eo ke tla ba Molimo, Molimo oa merabe eohle, merabe ea Iseraele, eona e be sechaba sa ka,”
ho rialo Morena.
2Morena o bua tjena:
“Sechaba se ileng
sa phonyoha sabole
se ile sa fumana mohau,
sa o fumana lehoatateng,
ha ke ne ke e-ea
ho phomotsa Iseraele.”
3Morena a n'a iponahatsa ho 'na,
a iponahatsa ho 'na
mehleng ea khale, a re:
“Ke u ratile ka lerato
la mehla eohle,
ka u atametsa ho 'na
ka kutloelo-bohlōkō.
4Ke tla boela ke tsosa
lithako tsa hao,
'me u tla tsoha
uena moroetsana, Jerusalema.
U tla boela u khaba
ka merōpa ea hao,
u kene motjekong
oa ba tjekang ba thabile.
5Thabeng tsa Samaria
u tla boela u lema morara,
balemi ba o leme,
ba je tholoana tsa oona.
6Tsatsi lea tla la hore
balebeli ba hlabe mokhosi,
ba o hlabe
ba le thabeng ea Efraime,
ba re: ‘Emang lōna,
re nyoloheleng Sione,
re nyoloheleng ho Morena,
Morena Molimo oa rōna.’ ”
7Morena o bua tjena:
“Binelang Jakobo ka thabo,
le 'minele,
binelang chaba se seholo
har'a lichaba.
Utloahatsang lithoko tsa lōna,
le re: ‘Oho, Morena,
namolela sechaba sa hao,
masalla a chaba sa hao,
chaba sa Iseraele.’
8Ke tla a tlisa
a e-tsoa naheng e ka lebōea,
ke a phuthe
ho tloha pheletsong tsa lefatše,
ke phuthe lifofu
ke be ke phuthe lihlotsa,
le basali ba baimana
ba khatheng la ho beleha,
ba khutlele koano
e le letšoelehali.
9Ba tla khutla
ba itšèla ka likhapha,
ke ba etelle pele,
bona ba ntse ba rapela.
Ke tla ba tsamaisa
pel'a melatsoana e phallang,
tseleng e bataletseng,
moo ba keng ba khōptjoa,
hobane 'na ke ntat'a Iseraele,
Efraime ke mora oa ka,
mora oa matsibolo.
10“Lōna lichaba,
utloang lentsoe la Morena,
le le phatlalatse
ho ea fihla mabōpong a hōle,
le re:
‘Ea qhalantseng Baiseraele
o tla boela a ba phutha,
a ba alose sa molisa
a alositse mohlape.’
11Morena o pholositse
bana ba Jakobo,
a ba lopolla matsohong
a ba matla ho ba feta.
12Ba tla tla ba bine
ba le holim'a Sione,
ba thabele bongata
ba limpho tsa Morena,
e leng koro le veine le ole,
le likonyana, le lipotsanyane
le manamane.
Ba tla tšoana le serapa
se noesetsoang hantle,
ba ke ke ba hlola
ba e-ba le mahlomola.
13Baroetsana ba tla etsa motjeko,
ba nyakalle,
ba nyakalle ba e-na le bahlankana
le 'ona maqheku.
Bofifi ba bona
bo tla fetoha e be thabo,
ke ba tšelise,
masoabi a bona e be nyakallo.
14Baprista ke tla ba fepa,
ke ba fepe ka tse manoni,
chaba sa ka se ateloe
ke limpho tsa ka tse ngata,”
ho rialo Morena.
Mohau oa Morena ho Baiseraele
15Morena o bua tjena:
“Mohoo o utloahetse Rama,
seboko le sello sa 'mokotsane;
Ragele o llela bana ba hae,
Ragele o hana ho tšeliseha,
hobane bana ba hae
ha ba sa le eo.”
16Morena o bua tjena:
“Khaotsa ho lla,
u hlakole meokho mahlong,
hoba mosebetsi oa hao
o tla fumana moputso,”
ho rialo Morena.
“Ba tla boela ba khutla
koana naheng ea lira.
17Tšepo ea hore
u tla ba le litlōhōlō e teng,
bana ba hao ba tla khutlela
naheng ea babo bona,”
ho rialo Morena.
18“Ruri ke utloile
Efraime a itelela, a re:
‘Uena u ile ua nkotla,
ua nkotla sa pohoana,
pohoana ea lethapisana;
nkhutlise ke hona,
'me ke tla khutla,
hobane uena u Morena,
Molimo oa ka.
19Ruri hoba ke khelohe
ke ile ka ikoahlaea,
eare hoba ke rutoe
ka kebisa hlooho ke ho soaba.
Ka hlajoa ke lihlong,
pelo ea ka ea nyahama,
ka inyatsetsa libe
tsa bocha ba ka.’
20Na ebe Efraime ke mor'a ka
eo ke mo ratang?
Na ebe ke eena ngoan'a ka
ea nkhahlang?
Leha ke ee ke mo nyatse,
ke ntse ke mo hopola,
pelo ea ka e mo hlōlōheloa haholo,
ke mo utloela bohlōkō haholo,”
ho rialo Morena.
21“Iketsetseng matšoao a tsela,
le itlhomele mekolokotoane,
le hlokomele 'mila
oo le tsamaeang ho oona.
Khutla, uena moroetsana, Iseraele,
khutlela metseng eo e leng ea heno.
22U tla phaila ho le hokae,
uena morali ea hlokang botšepehi?
Morena o etselitse lefatše
ntho e ncha:
Mosali o tla sireletsa monna!”
Katleho ea sechaba sa Molimo
23Morena oa mabōtho, Molimo oa Iseraele, o bua tjena: “Ha ke se ke khutlisitse sechaba sena bothōpuoeng, baahi ba Juda le ba metsana ea eona ba tla boela ba bua tjena:
“ ‘Morena a u hlohonolofatse,
uena leaho la toka,
uena u leng thaba e halalelang.’
24“Naheng ea Juda le metseng eohle ea eona ho tla aha balemi le balisana ba mehlape. 25Ba khathetseng ke tla ba khatholla, ba lapileng ke tla ba fepa.”
26Eaba joale kea phaphama, kea hlaphoheloa, ka fumana hore ke ne ke robetse hamonate.
27“Matsatsi aa tla,” ho rialo Morena, “ao ka 'ona ke tla atisa batho ba ntlo ea Iseraele, le ba ntlo ea Juda, ke be ke atise le tsona liphoofolo. 28Joalokaha ke ile ka hlokomela hore ke ba falatse, ke ba lihe, ke ba lahlele fatše, ke ba ripitle, ke ba hlōkōfatse, ka mokhoa o joalo ke tla hlokomela hore ke ba tsitsise, ke ba hōlise,” ho rialo Morena. 29“Ha nako eo e fihla ha ba sa tla hlola ba re:
“ ‘Bo-ntat'a ba jele morara o bolila,
meno a bana ba bona aa thèlla.’
30“Motho ka mong o tla shoa ka baka la bokhopo ba hae, e mong le e mong ea jang morara o bolila meno a hae a tla thèlla.”
Selekane se secha
31“Bonang, matsatsi aa tla,”
ho rialo Morena,
“ao ka 'ona
ke tla etsa selekane se secha,
ke se etse le ba ntlo ea Iseraele,
le ba ntlo ea Juda.
32“Ha se na ho tšoana
le selekane seo ke neng ke se etse
le baholo-holo ba bona,
ha ke ne ke ba tšoere ka letsoho,
ke ba ntša naheng ea Egepeta.
Le hoja ba ile ba senya
selekane sa ka,
ke ile ka ba Morena oa bona,”
ho rialo Morena.
33“Selekane seo ke tla se etsa
le ba ntlo ea Iseraele,
hoba matsatsi ao a fete,
ke sena,”
ho rialo Morena.
“Ke tla kenya molao oa ka
maikutlong a bona,
ke o ngole
kahar'a lipelo tsa bona;
ke be Molimo oa bona,
bona e be sechaba sa ka.
34Motho ha a sa tla hlola
a ruta ea ahisaneng le eena,
leha e le ngoan'abo,
a re: ‘Tseba Morena,’
hobane ba tla ntseba bohle,
ho tloha ho ea eisehang
ho isa ho ea hlomphehang,”
ho rialo Morena.
“Ke tla ba tšoarela
makhopo a bona,
ha ke sa tla hlola
ke hopola libe tsa bona.”
35Morena ea re fileng letsatsi
ho bonesa motšeare,
a b'a beela khoeli le linaleli
molao o sa fetoheng,
oa hore bosiu li bonese,
e be maseli,
eena ea tuluanyang leoatle
hore le hoase,
eo bitso la hae
e leng Moren'a mabōtho,
o bua tjena:
36“Haeba melao ena e ka felisoa,”
ho rialo Morena,
“mahlong a ka tlōhōlō tsa Iseraele,
ha e ka ke ea hlola e e-ba
sechaba!”
37Morena o bua tjena:
“Haeba maholimo a holimo
a ka lekanngoa,
le methèo ea lefatše e ka fihleloa,
ke tla furalla
litlōhōlō tsohle tsa Iseraele,
ka baka la tsohle
tseo li li entseng,”
ho rialo Morena.
38“Matsatsi aa tla,” ho rialo Morena, “ao ka 'ona motse ona o tla tsosoa ho tloha Toreng ea Hananele ho ea fihla Khorong e Hukung. 39Moeli o tla tloha moo, o be o e'o fihla leralleng la Garebe, o nt'o thinya o lebe Gōoata. 40Khohlo eohle eo ho lahleloang litōpō le molora ka ho eona, le naha eohle ho ea fihla molatsoaneng oa Kiderone, le ho ea fihla sekhutlong se ka bochabela, se bitsoang Khoro ea Lipere, naha eo eohle ho Morena e tla halalela. Motse oo o ke ke oa hlola o sa ripitloa, leha e le ho timetsoa le ka mohla.”
