1Ka khoeli ea bosupa Ishemaele, mora oa Netaniea, setlōhōlō sa Eleshama, eo e neng e le oa mali a borena, e bile e le e mong oa balaoli ba khosi, a tla ho Gedaleea, mora oa Ahikama, motseng oa Misepa, a e-na le banna ba leshome. Eare moo ba ntseng ba e-ja ba le 'moho, 2Ishemaele, mora oa Netaniea, le banna ba leshome, bao a neng a e-na le bona ba raoha, ba hlatha Gedaleea, mora oa Ahikama, setlōhōlō sa Shafane, ka sabole, ba bolaea ea neng a khethiloe ke khosi ea Babilona hore e be 'musi oa naha eo. 3Ishemaele a bolaea le Bajuda bohle ba neng ba e-na le Gedaleea motseng oa Misepa, hammoho le bahlabani ba Bakalatiea ba neng ba le moo.
4Hoba ho fete letsatsi Gedaleea a bolailoe, ho e-s'o be le motho ea ka tsebang tsa polao eo, 5banna ba mashome a robeli, ba beotseng litelu, ba hahotseng liaparo tsa bona, ba iphatsitseng, ba fihla ba e-tsoa Shekeme, le Shilo, le Samaria, ba tliselitse Tempele ea Morena linyehelo tsa lijo le mokubetso. 6Ishemaele, mora oa Netaniea, a tloha Misepa ho ea ba khahlanyetsa, a tsamaea a ntse a lla. Ha a fihla ho bona, a re: “Tloong ho Gedaleea, mora oa Ahikama.” 7Ha ba fihla har'a motse, Ishemaele, mora oa Netaniea, le banna bao a neng a e-na le bona, ba ba bolaea, ba ba lahlela ka mokoting.
8Empa ba leshome ba bona ba re ho Ishemaele: “Se ke ua re bolaea, hobane re na le matlotlo ao re a patileng har'a naha, e leng koro le harese, le ole le mahe a linotši.” Eaba oa ba tlohela, a se ke a ba bolaea ha a bolaea bana babo bona. 9Mokoti oo Ishemaele a ileng a lahlela litōpō tsa banna ba bolailoeng hammoho le Gedaleea ka ho oona, ke oo khosi Asa a neng a o cheke e le karolo ea boitšireletso ba hae ntoeng ea hae le Baasha, khosi ea Iseraele. Ishemaele, mora oa Netaniea, o ile a o tlatsa ka litōpō.
10Eaba Ishemaele o thōpa barali ba khosi le masalla 'ohle a sechaba a neng a le Misepa, ao Nebusaradane, molaoli oa balebeli ba khosi, a neng a a beile tlas'a bolisa ba Gedaleea, mora oa Ahikama. Ishemaele, mora oa Netaniea, a a thōpa, a tsamaea le 'ona, a tšelela mose ho Baamone.
11Ha Johanane, mora oa Karea, le balaoli bohle ba mabōtho ba neng ba e-na le eena, ba utloela tsa bobe bo entsoeng ke Ishemaele, mora oa Netaniea, 12ba nka bahlabani bohle ba bona, ba futuhela Ishemaele, mora oa Netaniea, ba mo fumana haufi le letša le leholo la Gibeone. 13Batho bohle ba neng ba e-na le Ishemaele ba thaba haholo ha ba bona Johanane, mora oa Karea, le balaoli ba mabōtho ba neng ba e-na le eena. 14Batho bohle bao Ishemaele a neng a ba thōpile Misepa ba khutlela ka ho Johanane, mora oa Karea. 15Ha e le Ishemaele, mora oa Netaniea, le bahlabani ba hae ba robeli, ba phonyoha matsohong a Johanane, ba balehela ho Baamone.
Ho baleheloa Egepeta
16Johanane, mora oa Karea, le balaoli bohle ba mabōtho ba neng ba e-na le eena, ba nka masalla a batho ba ileng ba pholosoa motseng oa Misepa, matsohong a Ishemaele, mora oa Netaniea, hoba Ishemaele a bolaee Gedaleea, mora oa Ahikama. E ne e le banna le basali le bana le bahlanka bao a ba khutlisitseng Gibeone. 17Ba tsoela pele joalo ho fihlela ba emisa Kimehame, haufi le Betlelehema, ba ntse ba le tseleng ea bona ho ea Egepeta, 18ba baleha Bakalatiea. Ba ne ba ba tšaba, hobane Ishemaele, mora oa Netaniea, o ne a ile a bolaea Gedaleea, mora oa Ahikama, eo khosi ea Babilona e neng e mo khethile hore e be 'musi oa naha eo.
