Ho oa ha Jerusalema
(2 Likh. 24:18 – 25:17)
1Sedekiea o ne a e-na le lilemo tse mashome a mabeli a motso o mong ha a qala ho busa, 'me a busa ka lilemo tsa leshome le motso o mong, a le Jerusalema. Lebitso la 'm'ae e ne e le Hamutale, morali oa Jeremia, eo hahabo e neng e le Lebena. 2Sedekiea a etsa bobe mahlong a Morena. A latela tsohle tseo Jehoeakime a neng a ile a li etsa. 3Morena a halefela baahi ba Jerusalema le ba Juda, hoo a qeteletseng a ba lelekile kapele ho sefahleho sa hae.
Eaba Sedekiea o fetohela khosi ea Babilona.
4Ka letsatsi la leshome la khoeli ea leshome, ka selemo sa borobong sa puso ea Sedekiea, Nebukadenesare, khosi ea Babilona, a futuhela Jerusalema ka mabōtho a hae 'ohle, a fihla a hloma pel'a motse. Ba haha liqhobosheane ho o pota-pota. 5Motse oo oa etsetsoa thibella ho fihlela ka selemo sa leshome le motso o mong sa puso ea khosi Sedekiea.
6Ka letsatsi la borobong la khoeli ea bone, selemong sona seo, ha tlala e ne e se le kholo har'a motse, hoo sechaba sa naha eo se neng se se se hloka le thathana ea bohobe feela, 7baahi ba motse ba phunya likheo marakong. Bahlabani bohle ba baleha bosiu, ba tsoa ka khoro e pakeng tsa marako a mabeli, e pel'a tšimo ea khosi. Ba nka tsela e lebang phuleng. Bakalatiea ba ne ba ntse ba pota-potile motse oo. 8Bahlabani ba Bakalatiea ba phalalisa khosi Sedekiea, ba mo tšoara ha a le liphuleng tsa Jeriko. Bahlabani bohle ba khosi ba e qhalanela, ea sala e le inotši. 9Eaba Bakalatiea ba tšoara khosi Sedekiea, ba mo isa ho khosi ea Babilona, eona e le Ribela, naheng ea Hamate, moo ba ileng ba mo ahlōlela hona teng. 10Hona moo Ribela, khosi ea Babilona ea bolaea bara ba Sedekiea moo a ntseng a ba shebile, ea ba bolaea le balaoli bohle ba Juda. 11Sedekiea eena ba mo honya mahlo, ba mo tlama ka mahlaahlela a lethose, a isoa Babilona, moo a ileng a kenngoa chankaneng teng ho fihlela letsatsi la lefu la hae.
Ho chesoa Tempele
12Ka letsatsi la leshome la khoeli ea bohlano, e leng ka selemo sa leshome le metso e robong sa puso ea Nebukadenesare, khosi ea Babilona, Nebusaradane, molaoli oa balebeli, e leng mohlanka oa khosi ea Babilona, a tla Jerusalema. 13Nebusaradane a chesa Tempele ea Morena, le ntlo ea khosi, le matlo 'ohle a Jerusalema, le matlo 'ohle a banna ba mabitso. 14Bahlabani bohle ba Bakalatiea, ba neng ba e-na le molaoli oa balebeli, ba heletsa marako a pota-potileng Jerusalema. 15Joale Nebusaradane, molaoli oa balebeli, a thōpa batho ba neng ba setse motseng, le baphaphathehi ba ileng ba ineela ho khosi ea Babilona, le masalla a litsebi tsa mosebetsi oa matsoho. 16Nebusaradane a siea mafutsana a naha eo hore a leme masimo a morara le masimo a lijo.
17Litšiea tsa lethose, le litšehetso tsa tsona, le tanka ea lethose eo baprista ba tollang ka ho eona, tsena li ne li le ka Tempeleng ea Morena, 'me Bakalatiea ba li pshatla, ba nka lethose la tsona, ba le isa Babilona. 18Lipitsa le likharafu, le litima-mabone le likhaba, le lintho tsohle tse entsoeng ka lethose, tseo ho neng ho sebeletsoa ka tsona, ba li nka. 19Molaoli oa balebeli a nka le lipane le likotlolo, le lipitsa le liluloana tsa mabone, le likhaba le mehope, le lintho tse ling tse entsoeng ka khauta le ka silefera.
20Boima ba lethose lohle le entseng litšiea tse peli, le tanka eo baprista ba tollang ka ho eona, le litšehetso tseo khosi Solomone a neng a li etselitse Tempele ea Morena, bo ne bo ke ke ba lekanngoa. 21Bophahamo ba tšiea e le 'ngoe e ne e le limethara tse robeli, bolelele ba ho e pota-pota e le limethara tse hlano, morumo oa eona e le limilemethara tse mashome a supileng a metso e mehlano, 'me kahare e le phala. 22Kaholim'a eona ho ne ho e-na le kotola ea lethose, bophahamo ba eona e ka ba methara le halofo. Moqhaka oa eona, le likharenate tse pota-potileng kotola, kaofela li ne li entsoe ka lethose. Le tšiea ea bobeli e ne e tšoana le ena ea pele ka mokhabiso. 23Ho ne ho e-na le likharenate tse mashome a robong a metso e tšeletseng ka lehlakoreng le leng le le leng, 'me likharenate kaofela tse pota-potileng kotola li ne li le lekholo.
Sechaba sa Juda se isoa Babilona
24Molaoli oa balebeli a thōpa Seraea, Moprista e Moholo, le Sofonea, letsoho la Moprista e Moholo, le balebeli ba bararo ba monyako oa Tempele. 25Hona motseng moo, a ba a thōpa molaoli ea neng a okametse bahlabani, le banna ba supileng, bao e neng e le baeletsi ba khosi, a thōpa le mongoli e moholo eo e neng e le molaoli oa mabōtho, ea neng a hlabela sechaba sa naha eo mokhosi, le banna ba mashome a tšeletseng ba baahi ba naha eo, bao a ba fumaneng ba ntse ba le moo motseng. 26Nebusaradane, molaoli oa balebeli, a thōpa batho bana, a ba isa Ribela, ho khosi ea Babilona. 27Khosi ea Babilona ea ba khakhatha, ea ba bolaela hona moo Ribela, naheng ea Hamate.
Eaba ka mokhoa o joalo Bajuda ba ntšoa naheng ea bona. 28Ena ke palo ea batho bao Nebukadenesare a ileng a ba thōpa: Ka selemo sa bosupa sa puso ea hae ea e-ba Bajuda ba likete tse tharo le mashome a mabeli a metso e meraro.
29Ka selemo sa leshome le metso e robeli sa puso ea hae a thōpa batho ba makholo a robeli le mashome a mararo a metso e 'meli, e le batho ba tsoang Jerusalema.
30Ka selemo sa mashome a mabeli e meraro sa puso ea Nebukadenesare, Nebusaradane, molaloli oa balebeli, a thōpa Bajuda ba makholo a supileng le mashome a mane a metso e mehlano; kaofela ea e-ba batho ba likete tse 'ne le makholo a tšeletseng.
Jehoeakine o lokolloa chankaneng
31Ka letsatsi la mashome a mabeli a metso e mehlano, ka khoeli ea leshome le metso e 'meli, selemong sa mashome a mararo a metso e supileng, sa ho kenngoa chankaneng ha Jehoeakine, khosi ea Juda, Efile-Merodake, khosi ea Babilona, a qala ho busa. A hauhela Jehoeakine, khosi a Juda, a mo lokolla chankaneng. 32Efile-Merodake a mo tšoara hantle, a mo nea hlompho e fetang eo a neng a e nea likhosi tse ling tseo a li thōpileng.
33Jehoeakine a hlobola liaparo tseo a neng a li apara ha a le chankaneng, a jela tafoleng e le 'ngoe le khosi ka matsatsi 'ohle a ho phela ha hae. 34Ka letsatsi le leng le le leng khosi ea Babilona ea mo nea chelete ea ho iphelisa, ho fihlela a e-shoa.
