1“Tsena ke li buile ho lōna hore le se ke la koeneha. 2Ba tla le tebela matlung a thapelo; etsoe nako ea tla eo ka eona mang kapa mang ea le bolaeang, a tla hopola hore o sebeletsa Molimo. 3Tsena tsohle ba tla li etsa hobane ba sa ka ba tseba Ntate leha e le 'na. 4Empa ke le boleletse tsena, hore ha nako ea tsona e fihla, le hopole hore ke le boleletse tsona.
Mosebetsi oa Moea o Halalelang
“Ha kea ka ka le bolella tsena ho tloha qalong, hobane ke ne ke e-na le lōna.
5“Joale ke ea ho ea nthōmileng, 'me ha ho le ea mong oa lōna ea mpotsang, a re: ‘U ea kae?’ 6Kahobane ke le boleletse tsena, lipelo tsa lōna li tletse masoabi. 7Empa ke le bolella 'nete: Ho molemo ho lōna hore ke ee, hobane ha ke sa ee, Mothusi a ke ke a tla ho lōna; athe ha ke e-ea, ke tla mo rōmela ho lōna. 8Ha eo a e-tla, o tla kholisa lefatše ka tsa sebe, le ka tsa tōka, le ka tsa kahlōlo; 9ka tsa sebe, hobane ba sa lumele ho 'na; 10ka tsa tōka, hobane ke ea ho Ntate, 'me ha le sa tla hlola le mpona; 11ka tsa kahlōlo, hobane 'musi oa lefatše lena o se a ahlōtsoe.
12“Ke sa na le tse ngata tseo nkabeng ke le bolella tsona, empa le ke ke la li kopa hajoale; 13athe ha eo, Moea oa 'nete, a e-tla, o tla le tsamaisa 'neteng eohle, hobane a ke ke a bua tsa hae, empa o tla bua tseo a li utloang, 'me o tla le tsebisa tse tlang. 14Eena o tla ntlotlisa, hobane o tla nka ho tsa ka, a le tsebise tsona. 15Tsohle tseo Ntate a nang le tsona ke tsa ka; ka baka leo, ke itse o nka ho tsa ka, a le phatlalletse tsona.
Masoabi a tla fetoha thabo
16“Kamora' nakoana ha le sa tla mpona, empa kamora' nakoana, le tla boela le mpona.”
17Joale ba bang ba barutuoa ba hae ba botsana, ba re: “Ke eng eo a re bolellang eona, ha a re: ‘Kamora' nakoana ha le na ho mpona, empa kamora' nakoana le tla boela le mpona?’ le ha a re: ‘Kahobane ke ea ho Ntate?’ ” 18Joale ba re: “Ke ho re'ng ha a re: ‘Kamora' nakoana?’ Ha re tsebe seo a se bolelang.”
19Jesu a tseba hore ba rata ho 'motsa, 'me a re ho bona: “Na le botsana ka taba ee, hobane ke itse: ‘Kamora' nakoana, ha le na ho mpona, empa kamora' nakoana le tla boela le mpona?’ 20Kannete-nete kea le bolella: Le tla lla, 'me le tla hlomoha, athe lefatše le tla thaba; le tla soaba, empa masoabi a lōna a tla fetoha thabo. 21Mosali ha a beleha o utloa bohlōkō, hobane nako ea hae e fihlile, empa ha a se a belehile, ha a sa hlola a hopola bohlōkō ba pelehi, ka baka la thabo ea hore ho tsoetsoe motho lefatšeng. 22Efela le lōna le soabile hajoale, empa ke tla boela ke le bona, 'me pelo tsa lōna li tla thaba; ha ho ea tla le amoha thabo ea lōna. 23Mohlang oo ha le na ho mpotsa letho. Kannete-nete, kea le bolella hore eng kapa eng eo le e kōpang ho Ntate ka lebitso la ka, o tla le nea eona. 24Ho fihlela joale ha le e-s'o kōpe letho ka lebitso la ka; kōpang, 'me le tla fuoa, hore thabo ea lōna e be e phethehileng.
Ke hlōtse lefatše
25“Ke buile litaba tsena ho lōna ka lipapiso; nako ea tla eo ka eona ke sa tl'o hlola ke bua ho lōna ka lipapiso, empa ke tla le tsebisa Ntate ka mokhoa o tōtōbetseng. 26Mohlang oo le tla kōpa ka lebitso la ka, empa ha ke re ho lōna ke tla le rapella ho Ntate, 27hobane Ntate ka sebele sa hae oa le rata, kaha le nthatile, 'me le lumetse hore ke tsoa ho Molimo. 28Ke tsoa ho Ntate, 'me ke tlile lefatšeng; ke tloha lefatšeng hape, ke ea ho Ntate.”
29Barutuoa ba hae ba re: “Bona, joale u bua ka mokhoa o tōtōbetseng, e seng ka papiso. 30Joale rea tseba hore u tseba tsohle, 'me ha ho hlokahale hore mang kapa mang a u botse; ka hona re lumela hore u tsoa ho Molimo.”
31Jesu a ba araba, a re: “Na joale lea lumela? 32Bonang, nako ea tla, 'me e se e fihlile, ea hore le qhalane, e mong le e mong a ee ha hae, 'me le ntšiee ke le mong; feela ha ke mong, hobane Ntate o na le 'na.
33“Litaba tsena ke li buile ho lōna hore le tle le fumane khotso ho 'na. Le tla ba le matšoenyeho lefatšeng, empa khothalang, 'na ke hlōtse lefatše.”
