Mokete oa lenyalo, Kana
1Ka tsatsi la boraro ho ne ho e-na le mokete oa lenyalo Kana e Galelea, 'me 'm'a Jesu o ne a le teng. 2Jesu le barutuoa ba hae le bona ba ne ba memetsoe lenyalong. 3Ha veine e felile, 'm'a Jesu a re ho eena: “Ha ba na veine.”
4Jesu a re ho eena: “'Mè, hoo ho re ama ka'ng, rōna le uena? Nako ea ka ha e e-s'o fihle.”
5'M'ae a re ho basebeletsi: “Eng le eng eo a le bolellang eona, le e etse.”
6Joale linkho tse tšeletseng, tsa lejoe, tseo e 'ngoe le e 'ngoe ea tsona e neng e tlatsoa ka lilethana tse ka bang lekholo, li ne li beiloe moo ho ea ka moetlo oa tlhoekiso oa Bajuda.
7Jesu a re ho bona: “Tlatsang linkho ka metsi.” Ba li tlatsa tsoete!
8A re ho bona: “Khang joale, 'me le isetse motsamaisi oa mokete.”
Ba mo isetsa. 9Ha motsamaisi oa mokete a latsoa metsi a fetohileng veine, a sa tsebe moo e tsoang teng, ho mpa ho tseba basebeletsi ba khileng metsi, motsamaisi a bitsa monyali, 10a re ho eena: “Batho bohle ba ee ba qale ka veine e monate pele, 'me ha bamemuoa ba se ba noele, ba tlise e mpe; uena u bōlōkile veine e monate ho fihlela joale.”
11Mohlolo ona oa pele Jesu o o entse Kana e Galelea, a bonahatsa tlōtla ea hae, 'me barutuoa ba hae ba lumela ho eena.
12Kamora' moo, eena le 'm'ae le bana babo le barutuoa ba hae, ba theohela Kaperenauma, ba hlola teng matsatsi a se makae.
Tlhoekiso ea Tempele
13Paseka ea Bajuda e ne e le haufi, 'me Jesu a nyolohela Jerusalema. 14Ka Tempeleng a fumana ba rekisang likhomo, le linku, le maeba, le baananyi ba lichelete ba lutse. 15Hoba a etse sephali ka likhoele, a ba phahla bohle ka Tempeleng, le linku, le likhomo; a qhala lichelete tsa baananyi, 'me a phethola litafole tsa bona, 16a re ho ba rekisang maeba: “Tlosang ntho tsena mona; le se ke la etsa ntlo ea Ntate ntlo ea khoebo!”
17Barutuoa ba hae ba hopola hore ho ngotsoe, ho thoe: “Ho chesehela ntlo ea hao ho ntjele.”
18Joale Bajuda ba re ho eena: “U re bontša mohlolo ofe, ha e le moo u etsa tsee?”
19Jesu a ba araba, a re: “Qhaqhang tempele ena, 'me ke tla e tsosa ka matsatsi a mararo.”
20Eaba Bajuda ba re: “Tempele ena e ile ea hahuoa ka lilemo tse mashome a mane a metso e tšeletseng, empa uena u re u tla e tsōsa ka matsatsi a mararo?” 21Feela eena o ne a bua ka tempele eo e leng 'mele oa hae. 22Joale ha a tsohile bafung, barutuoa ba hae ba hopola hore o ne a rialo, 'me ba lumela Mangolo le boporofeta boo Jesu a bo boletseng.
Jesu o tseba batho bohle
23Ha a le Jerusalema moketeng oa Paseka, ba bangata ba lumela ho eena, ha ba bona mehlolo eo a e etsang. 24Empa Jesu o ne a sa ba tšepe, hobane a tseba batho bohle, 25le kahobane a ne a sa hloke ho bolelloa letho ka motho; kaha a ne a tseba se ka ho motho.
